တောင်ကြီး မြို့ နယ်လျှပ်စစ် အင်ဂျင်နီယာ (EPC) ရုံးရှေ့တွင် တောင်ကြီး တက္ကသိုလ် ကျောင်းသားလူငယ်များမှ ထိုင်သပိတ်ပြုလုပ်ကာ မီတာခ အခွန်မဆောင်ရေး ဆန္ဒပြတောင်းဆို မှုကြောင့် ငွေလက်ခံကောင်တာ ယာယီပိတ် ထားရကြောင်းသိရသည် ။

အဆိုပါကျောင်းသားလူငယ်များ အနေဖြင့် ယနေ့ (ဖေဖော်ဝါရီ ၂၄) ရက်မနက် ၈ နာရီခန့် ကစပြီး EPC ရုံးရှေ့တွင် ထိုင်သပိတ်ပြုလုပ်ကာ စစ်အာဏာသိမ်းခြင်းကို ဆန့်ကျင်သည့် အနေဖြင့် မီတာခ အခွန်လာဆောင်သည့်ပြည်သူများကို လှုံ့ဆော်ခဲ့ကြခြင်းဖြစ်သည် ။

ကျောင်းသားလူငယ်များအနေနှင့် “ကျွန်တော်တို့ကို ပစ်မယ့်ကျည်ဆံတွေအတွက် အခွန်ဆောင်ရမှာလား” ၊ “အခွန်မဆောင်ခြင်းဖြင့် အာဏာရှင်စနစ်ကို ဆန့်ကျင်ကြ” ၊ ”အခွန်မဆောင်ခြင်းသည် CDM ကို အထောက်အကူဖြစ်သည်” စသည့် ဆိုင်းဘုတ်များ ကိုင်ဆောင်လျှက် စစ်အာဏာသိမ်း အစိုရ ကို ဆန့်ကျင်ဆန္ဒပြခဲ့ကြသည် ။

ယင်းသို့ဆန္ဒပြနေစဉ် ရဲတပ်ဖွဲ့များ ရောက်ရှိလာကာ ဆန္ဒပြကျောင်းသားလူငယ်များ အား EPC ရုံးရှေ့တည့်တည့် တွင် မနေကြရန် လမ်းတစ်ဖက်တွင်သာ ဆန္ဒပြရန် ပြောဆို ခဲ့ သောကြောင့်ကျောင်းသားများမှာ လမ်းအလည်ကျွန်းမျော တွင် ရပ်ကာ ဆက်လက် ကြွေးကြော်ဆန္ဒပြခဲ့ကြပြီး အနီးနားရှိ လက်ဖက်ရည်ဆိုင်များ မှ ပိတ်သိမ်း သွားသည် ကိုလည်းတွေ့မြင်ခဲ့ရသည် ။

EPC ရုံးအတွင်းတွင်လည်း စစ်သားများ ၊ ရဲများ ဖြင့် စောင့်ကြပ်လျှက်ရှိပြီး နေ့လည် ၁၂ နာရီတွင် ငွေလက်ခံကောင်တာ ယာယီပိတ် သိမ်းကြောင်း ဆိုင်းဘုတ်ထောင်ထားသည် ကို တွေ့မြင်ရပါသည် ။

တောင်ကြီး EPC ရုံးဝန်ထမ်းများ အချို့သည် စစ်အာဏာသိမ်းပြီး ရက်ပိုင်းအတွင်း CDM တွင်ပါဝင်လာသူများ ရှိပြီး လမ်းလျှောက်ဆန္ဒပြရာတွင်လည်း ပါဝင်ခဲ့ကြသည် ။ အဆိုပါ CDM တွင် ပါဝင်သောဝန်ထမ်းများကိုလည်း ဖမ်းဆီး အရေးယူမှုများ ရှိခဲ့ကြောင်း သိရှိရပါသည် ။