နိုင်ငံရေးရည်မှန်းချက် မတူညီမှုကြောင့် စစ်ကောင်စီ ခန့်အပ်လိုက်သည့် ပြည်ထောင်စု ရွေးကောက်ပွဲ ကော်မရှင် အစည်းအဝေးကို ရှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD) ကျားခေါင်း ပါတီ က တက်ရောက်မည် မဟုတ်ကြောင်း သတင်းရရှိသည်။
စစ်ကောင်စီက ခန့်အပ်လိုက်သည့် ပြည်ထောင်စု ရွေး/ကော် နှင့် နိုင်ငံရေးပါတီများ ဖေဖော်ဝါရီ ၂၆ ရက်တွင် တွေ့ဆုံဆွေးနွေးရန် နိုင်ငံရေးပါတီအားလုံးကို ဖိတ်ကြားခဲ့ကြောင်း သိရသည်။
ထိုကိစ္စနှင့် ပတ်သက်ပြီး SNLD ပါတီမှ အထွေထွေ အတွင်းရေးမှူး စိုင်းလိတ် က “ ကျနော်တို့သွားမတက်ပါဘူး။ နိုင်ငံရေးရည်မှန်းချက် နဲ့ မျှော်လင့်ချက်က စစ်ကောင်စီတို့နဲ့ မတူညီဘူး။ ပြီးတော့ နိုင်ငံရေးလုပ်ဆောင်ချက်က အင်မတန် ကွာဟမှုရှိတယ်” ဟု သျှမ်းသံတော်ဆင့်ကိုပြောသည်။
ထိုအစည်းဝေးကို မတက်ကြောင်းကိုလည်း SNLD ပါတီ အနေဖြင့် အစည်းဝေးထိုင်ပြီး ဆုံဖြတ်ချက်ချပြီးကြောင်းလည်း စိုင်းလိတ်က ဆိုသည်။
“ဘာမှထင်မြင်ချက်တော့ ပေးစရာမလိုဘူး။ ၂၆ ရက်တက်ဖို့ ဖိတ်ထားတဲ့ အစည်းဝေးကိုတော့ ကျနော်တို့ ပါတီကနေ သွားမတက်ပါဘူး။ အကြောင်းတော့မပြန်ဘူး” ဟု စိုင်းလိတ်က ဆိုသည်။
အလားတူ တအောင်းအမျိုးသား ပါတီ (TNP) ကလည်း ထိုအစည်းဝေးကို တက်ရောက်မည်မဟုတ်ကြောင်း သိရသည်။
“ ကျနော်တို့ကတော့ မတက်ဘူးဗျ။ အကြောင်းပြန်လိုက်ပါပြီ။ ကျနော်တို့ အဆင့်သင့်မဖြစ်သေးဘူး။ သွားရေးလာရေးလည်း အခက်ခဲရှိလို့” ဟု TNP မှ အထွေထွေ အတွင်းရေးမှူး မိုင်းအုဏ်းခိုင် က သျှမ်းသံတော်ဆင့်ကိုပြောသည်။
SNLD ပါတီသည် ၂၀၂၀ အထွေထွေရွေးကောက်ပွဲတွင် သျှမ်းပြည်တွင် (၄၂)နေရာအနိုင်ရရှိပြီး၊ TNPပါတီသည် (၁၂)နေရာ အနိုင်ရရှိထားသည့် ပါတီဖြစ်သည်။
တပ်မတော်သည် ဖေဖော်ဝါရီ ၁ ရက်နေ့မှစပြီး ရွေးကောက်ပွဲ မဲရလဒ်မသမာမှု ဆိုသည့်ခေါင်းစဉ်ဖြင့် နိုင်ငံတော်၏ အာဏာကို တစ်နှစ်သိမ်းယူပြီး တနှစ်ပြည့်ပါက ရွေးကောက်ပွဲပြန်လည် ပြုလုပ်ပေးမည်ဖြစ်ကြောင်း ကြောညာခဲ့သည်။
ထို့နောက် တပ်မတော် ကာကွယ်ရေး ဦးစီးချုပ်သည် စစ်ကောင်စီ အစိုးရ ကို ဖွဲ့စည်းကာ နိုင်ငံရေး ပါတီ၊ တိုင်းရင်းသားပါတီများကိုထည့်သွင်းခဲ့သည်။
စစ်ကောင်စီ အနေဖြင့် သျှမ်းပြည်အင်အားကြီး ပါတီဖြစ်သည့် SNLDပါတီကို နိုင်ငံတော် အဆင့်တွင် ပါဝင်ရန် ကမ်းလှမ်းခဲ့သော်လည်း SNLDပါတီအနေဖြင့် လက်မခံခဲ့ပေ။
Leave a Comments