စစ်ကောင်စီ အသစ်ခန့်အပ်လိုက်သည့် ပြည်ထောင်စုရွေးကောက်ပွဲကော်မရှင်နှင့် တွေ့ဆုံရန်အတွက် ရှမ်းတိုင်းရင်းသားများ ဒီမိုကရက်တစ်ပါတီ (SNDP) သွားရောက်တွေ့ဆုံမည် စုံစမ်းသိရသည်။

စစ်ကောင်စီ အသစ်ခန့်အပ်လိုက်သည့် ပြည်ထောင်စု ရွေး/ကော်နှင့် နိုင်ငံရေးပါတီများ ဖေဖော်ဝါရီ ၂၆ရက်တွင် တွေ့ဆုံရန် အတွက် နိုင်ငံရေး ပါတီ အားလုံးကို ဖိတ်ကြားခဲ့ကြောင်းသိရသည်။

“ ကျနော်တို့ ပါတီနဲ့ မဟာမိတ်ပါတီတွေကတော့ သွားတက်ဖြစ်မယ်။ သွားတက်သင့်တယ်ထင်လို့သွားကြမှာပါ” ဟု SNDP မှ ပြောရေးဆိုခွင့်ရှိသူ လုံးစိုင်းဖိုးအောင် က သျှမ်းသံတော်ဆင့်ကို ပြောသည်။

စစ်ကောင်စီ အသစ်ဖွဲ့စည်းလိုက်တဲ့ ပြည်ထောင်စု ရွေး/ကော်နှင့် တွေ့ဆုံမှုသည် SNDP၏ သဘောဆန္ဒအရ ဖြစ်ကြောင်း လည်း လုံးစိုင်းဖိုးအောင် ကပြောသည်။

“ SNDPပါတီရဲ့ ဆုံးဖြတ်ပိုင်ခွင့်ရှိတဲ့သူတွေ သွားတက်မှာပါ” ဟု လည်း ၎င်း က ပြောသည်။

အဆိုပါတွေ့ဆုံသွားတက်ရောက်မည့် သူများကို ဖေဖော်ဝါရီ ၂၅ရက် တွင်နေပြည်တော် အရောက်သွားရမည် ဟုလည်း သိရသည်။

တပ်မတော်သည် ဖေဖော်ဝါရီ ၁ရက် တွင် ရွေးကောက်ပွဲ ရလဒ်မသမာမှုဆိုသည့် ခေါင်းစဉ်ဖြင့် နိုင်ငံတော်၏ အာဏာကို တနှစ်သိမ်းယူပြီး တနှစ်ပြည့်ပါက ရွေးကောက်ပွဲပြန်လည်ပြုလုပ်မည်ဟု ကြေညာခဲ့သည်။

ထိုကြေညာပြီးနောက်လည်း နိုင်ငံတော် အတိုင်ပင်ခံ ပုဂ္ဂိုလ်ဒေါ်အောင်ဆန်းစုကြည် နှင့် သမ္မတဦးမြင့်ဝင် အပါအဝင် နိုင်ငံတော်ရဲ့ အကြီးအကဲများကို ဖေဖော်ဝါရီ ၁ရက်တွင် ဖမ်းဆီးချုပ်နှောင်ခဲ့သည်။

ထို့ စစ်တပ်မှ အာဏာသိမ်းပြီးနောက် မြန်မာတဝှမ်းရှိ ပြည်သူများလည်း ယနေ့ထိတိုင် ဒီမိုကရေစီ ပြန်ရရှိဖို့အတွက် ဆန္ဒထုတ်ဖော်နေကြသည်။

စစ်ကောင်စီ မှ ပြန်လည် ပြုလုပ်မည့် ရွေးကောက်ပွဲကိုလည်း လက်မခံကြောင်း၊ ပြည်သူများမှပေးခဲ့သည့် ၂၀၂၀ ရွေးကောက်ပွဲ မဲရလဒ်ကိုသာ လက်ခံကြောင်းနှင့် ဖမ်းဆီးထားသည့်နိုင်ငံတော် အကြီးအကဲများနှင့် နိုင်ငံရေးသမားများနှင့် ပြည်သူများကို ချက်ချင်ပြန်လွှတ်ပေးရန် ပြည်သူများက တောင်းဆိုနေကြသည်။