မေလ ၂၈ ရက်နေ့တွင်စတင်သော ဒုတိယအကြိမ် သျှမ်းပြည်နယ်လွှတ်တော်ဒသမပုံမှန် အစည်းအဝေးတွင် ကျောက်မဲလွှတ်တော်အမတ် တင်သွင်းသော လူထုအား ချောမဆွဲရန်ဆိုသည့်အဆိုတခု စစ်နှင့်ပတ်သက် သည်ဟုဆိုကာ ပယ်ဖျက်ခြင်းခံရကြောင်းသိရသည်။

လွှတ်တော်အစည်းအဝေးအား ၃ ရက်သာကျင်းပရာတွင် လက်နက်ကိုင်တပ်ဖွဲ့များမှ လူထုအား အသေခံ လမ်းပြအဖြစ် ခိုင်းစေသည်မှာ မဖြစ်သင့်၊ မရှိသင့် – ဆိုသည့် ကျောက်မဲမြို့နယ် ကျားခေါင်းပါတီ SNLD ပြည်နယ်လွှတ်တော်အမတ် စိုင်းထွန်းဉာဏ် ၏အဆိုအား လွှတ်တော်ဥက္ကဌက လက်ခံသော်လည်း သျှမ်းပြည်နယ်အစိုးရရုံးမှ ပယ်ဖျက်ခိုင်းသည်ဟုဆိုကာ ဆွေးနွေးခွင့်မရခဲ့ကြောင်း ၄င်းက ပြောသည်။

“ ကျနော်က – သျှမ်းပြည်နယ်အတွင်းစစ်ရေးစစ်ရာကိစ္စရပ်များတွင် အရပ်သားများကို အတင်းအဓမ္မလမ်းပြခိုင်း စေမှုများအားကန့်ကွက်ကြောင်း – ဆိုတဲ့အဆိုတင်သွင်းတယ်။ မေလ ၁၀ ရက်နေ့တုန်းကတင်ထားတာ။ ဘယ်လက်နက်ကိုင် မဆို စစ်မြေပြင်မှာ ရွာသားတွေကို လမ်းပြခိုင်းတာမဖြစ်သင့် မပြုသင့်တော့ဘူး၊ ဒီလို ကိစ္စမျိုးကမ္ဘာပေါ်မှာဘယ်နိုင်ငံမှမရှိဘူး။ လွှတ်တော်မှာ ဒါကိုနဲနဲဆွေးနွေးခွင့်ရရင် ဒါဒေသခံလူထုလုံခြုံရေး အတွက် လမ်းစ ဘဲလေ။ ဒါပေမယ့် နက်ဖြန်လွှတ်တော်က ပြီးဆုံးတော့မယ်။ ကျနော့အဆို ဆွေးနွေးဖို့ အတွက် ခေါင်းစဉ်ပါမလာဘူး။ ကျနော်ဖုန်းဆက်လိုက်တော့ ညွှန်ကြားရေးမှူးက – ‘လွှတ်တော်ဥက္ကဌကလက်ခံပြီးလို့ အစိုးရရုံးကိုပို့ပေးပြီးပြီ ’ -တဲ့။ အစိုးရရုံးက – ‘ဒီအဆိုက ဘာကိုပြောချင်တာလဲ။ ဖြစ်နိုင်ရင် ပယ်လိုက်ပါ ’ -လို့ပြန် ပြောလာလို့ လွှတ်တော်မှာ ဆွေးနွေးဖို့ခေါင်းစဉ်မှာ ပါမလာတောဘူး ”- ဟု စိုင်းထွန်းဉာဏ်က သျှမ်းသံတော်ဆင့် အားပြောပြသည်။

စည်းမျဉ်းအရ လွှတ်တော်ဥက္ကဌ မှလက်ခံသော အဆိုများအား လွှတ်တော်တွင်ဆွေးနွေးပိုင်ခွင့်ရှိကြောင်း ၊သို့သော် လက်ရှိအဆိုမှာ စစ်နှင့်ပတ်သက်သည်ဟုဆိုကာ ပယ်ဖျက်ခြင်းခံရကြောင်း ၄င်းကပြောဆိုသည်။

“ကျနော့ဘက်ကတော့ အစိုးရစစ်တပ်လို့ ခေါင်းစဉ်မတပ်ထားဘူး။ ဘယ်လက်နက်ကိုင်တပ်ဖွဲ့မဆို -လို့ ထည့်ထားတယ်။ စစ်နဲ့ပတ်သက်လာရင်လွှတ်တော်ရော အစိုးရရော ကြောက်နေသေးတဲ့အခြေအနေရှိတယ်။ ခုက အစိုးရရုံးက စစ်နဲ့ပတ်သက်လို့ဆိုပြီးဆွေးနွေးခွင့်မပေးလို့ပြောလာတဲ့အတွက် လွှတ်တော်ဟာ အစိုးရအောက်မှာဘဲရှိနေပြီးတော့ အစိုးရဟာလည်း စစ်တပ်အောက်မှာဘဲရှိနေသေးတယ်လို့မြင်တယ်။ ဒါလုံးဝမဖြစ်သင့်ဘူးလို့ပြောချင်ပါတယ် ”- ဟု စိုင်းထွန်းဉာဏ်ကပြောသည်။

မေလ ၃ ရက်နေ့က ကျောက်မဲမြို့တွင် တအာင်းအမျိုးလက်နက်ကိုင် တပ် နှင့် အစိုးရစစ်တပ်တို့အကြား တိုက်ပွဲဖြစ်ပွါးစဉ်က တော့ဆန်ရွာဘက်ဖြတ်သန်းသည့်အစိုးရစစ်ကြောင်းမှာ ဒေသခံရွာသား (ဦး) လုံးစိုင်းဘ ကျော်ဆိုသူအား အသေခံလမ်းပြအဖြစ်ဖမ်းဆီးခေါ်ဆောင်သွားကြောင်း၊ လမ်းတွင် မြေမြုပ်မိုင်းနင်းမိကာ လုံးစိုင်းဘကျော် ခြေထောက် ဒဏ်ရာရရှိသွားကြောင်း၊ အဆိုပါ ဖြစ်စဉ်အား ဒေသခံရွာသားများက တိုင်ကြားစာပေးပို့ပြီးလူထုလုံခြုံရေးအတွက် ကူညီဆောင်ရွက်ပေးရန် တောင်းဆိုရာ လွှတ်တော်တွင် ဆွေးနွေးပေးရန် အဆိုတင်သွင်းခဲ့ခြင်းဖြစ်ကြောင်း စိုင်းဘဉာဏ်၏ပြောပြချက်အရသိရသည်။

တိုက်ပွဲများဆက်တိုက်ဖြစ်ပွါးလာနေသော တိုင်းရင်းသားဒေသများ၊ အထူးသဖြင့် သျှမ်းပြည်မြောက်ပိုင်းတွင် လူထုအား အသေခံလမ်းပြအဖြစ်ဖမ်းဆီးခေါ်ဆောင်ခဲ့သည်မှာ ယနေ့တိုင် ပြုလုပ်နေဆဲဖြစ်ပြီး မြေမြုပ်မိုင်း များကိုလည်း ပြန်လည်ရှင်းလင်းပေးခြင်းမရှိကြောင်း၊ လယ်ယာခြံမြေဆင်းရင်း မိုင်းနင်းမိသဖြင့် သေကြေ၊ ဒဏ်ရာရရှိသွားသောဒေသခံလူထု အများအပြားရှိနေသေးကြောင်း စစ်ဘေးရှောင်များအား ကူညီမှုပေးနေ သည့် နမ္မတူဒေသခံများပြောပြချက်အရသိရသည်။