၂၀၂၀ -၂၀၂၁ ခုနှစ် ဘတ်ဂျက်အတည်ပြုပြီး ဘတ်ဂျက် ခွဲဝေ သည့်နေရာတွင် မြို့နယ်အလိုက် မျှတစွာ ခွဲဝေသင့်ကြောင်း ဒေသန္တရစီမံကိန်း နှင့် ဘဏ္ဍာငွေ အရအသုံးဆိုင်ရာ စိစစ်ရေးကော်မတီ အဖွဲ့ဝင်က သုံးသပ် ခဲ့သည်။
မေလ ၁၈ ရက် ယမန်နေ့က ပြန်လည်ခေါ်ယူသည့် ဒုတိယအကြိမ် သျှမ်းပြည်နယ်လွှတ်တော် အထူးအစည်းအဝေးတွင် မတ်လ ၁၈ နှင့် ၁၉ – ၂ ရက် သာ ဆွေးနွေးပြီး ဘတ်ဂျက် အတည်ပြုခဲ့ကြောင်း သိရသည်။
“ ဘတ်ဂျက်ခွဲဝေမှုတိုင်းမှာ ကျမတို့ ဒီဘတ်ဂျက်ကို အတည်ပြုတော့မယ်ဆိုရင် အမြဲတမ်း ပြဿနာတက်တယ်။ ဘတ်ဂျက်ခွဲဝေမှုမှာ မျှတမှု မရှိတာ၊ ကွာခြားမှု အများကြီး ရှိနေတဲ့ဟာ ဘတ်ဂျက်ခွဲဝေ တဲ့နေရာမှာ ခရိုင်အလိုက် ကို်ယ်ပိုင် အုပ်ချုပ်ခွင့်ရ ဒေသအလိုက် မြို့နယ် အလိုက် လူဦးရေ အနည်းအများအပေါ်မူတည်မယ်။ ဒေသအခြေနေအရ လိုအပ်ချက်အပေါ် မူတည်ပြီးတော့ ဘတ်ဂျက်ကို အချိုးကျ မျှတစွာ ခွဲဝေထားသင့်တယ်ဆိုပြီးတော့ သုံးသပ်တယ်။” ဟု သျှမ်းပြည်နယ်လွှတ်တော် ဒေသန္တရစီမံကိန်း နှင့် ဘဏ္ဍာငွေ အရအသုံးဆိုင်ရာ စိစစ်ရေးကော်မတီ အတွင်းရေးမှူး လည်းဖြစ် သီပေါမြို့ ပြည်နယ်လွှတ်တော်အမတ် နန်းစမ်းစမ်းအေး က သျှမ်းသံတော်ဆင့် ကိုပြောသည်။
၂၀၂၀ -၂၀၂၁ ခုနှစ်အတွက် ငွေကျပ်သန်းပေါင်း ၃၃၉၉၈၀.၃၃၆ ကို မေလ ၁၉ ရက် ယနေ့ လွှတ်တော်အတွင်း အတည်ပြုပြီး ၄င်းဘတ်ဂျက်အားလုံးကို ပြည်ထောင်စုသို့ ပြန်လည်တင် ပြရမည် ဖြစ်ကြောင်း သိရသည်။
“အတည်ပြုပြီး ဘတ်ဂျက်ကို ပြည်ထောင်စုကိုပြန်တင်ရသေးတယ်။ တင်ပြီးရင် ပြည်ထောင်စု က ပြန်ဖျက်ချအုံးမယ်။ ဘယ်လောက် ဖျက်ချမယ် ဘယ်လောက်ပဲ ရမယ်ဆိုလဲ မသေချာသေးဘူး။” ဟု နန်းစမ်းစမ်းအေး က သျှမ်းသံတော်ဆင့် ကိုပြောသည်။
ဒုတိယအကြိမ် သျှမ်းပြည်နယ် လွှတ်တော်သက်တမ်းမှာ အစည်းအဝေးများ ပြုလုပ်ကျင်းပနိုင်မှု ကို ပြန်ကြည့်လျှင် ယနေ့အထိ ပုံမှန်အစည်းအဝေး (၁၈) ကြိမ်၊ အရေးပေါ် အစည်းအဝေး (၃ ) ကြိမ် နှင့် ယခုအစည်းအဝေး အပါအဝင် အထူးအစည်းအဝေး ၂ ကြိမ် စုစုပေါင်း ၂၃ ကြိမ် ကျင်းပနိုင်ခဲ့ ခြင်း ဖြစ်သည်။