သျှမ်းပြည် မြောက်ပိုင်း သီပေါမြို့နယ်အတွင်း ကျန်းမာရေး၊ ပညာရေးအတွက် လမ်းပန်းဆက်သွယ်ရေး ခက်ခဲသည့် နမ့်ဟူးနွဲ့ ကောင်းခါးလမ်း အားပြုပြင်ရန်အတွက် လာမည့်နှစ်တွင် ဘတ်ဂျက်လျာထားခြင်း မရှိသေးကြောင်းသိရသည်။

ဒုတိယအကြိမ်မြောက် သျှမ်းပြည်နယ် လွှတ်တော် ၁၅ ကြိမ်မြောက် ပုံမှန် အစည်းအဝေး တတိယနေ့ ဇွန် ၁၂ ရက်နေ့တွင် သီပေါမြို့နယ် မဲဆန္ဒနယ်အမှတ်(၁) ပြည်နယ် လွှတ်တော် ကိုယ်စားလှယ် နန်းစမ်းစမ်းအေးက – “ သီပေါမြို့နယ် မန်ဟဲကျေးရွာအုပ်စုနှင့် ဘော်ကြိုကျေးရွာအုပ်စု ဆက်လမ်း နမ့်ဟူးနွဲ့ကောင်းခါးလမ်းသည် လက်ရှိမှာ မြေသားကြမ်းတမ်း မတ်စောက်ပြီး အကွေ့အကောက်များသည့် တောင်တက်လမ်းဖြစ်ကြောင်း၊ ကတ္တရာလမ်းအဖြစ် အဆင့်မြင့်တင်နိုင်သည့် အမျိုးအစားဖြစ်သည့် အတွက် အဆိုပါ လမ်းအား လာမည့်နှစ်ဘတ်ဂျက်ဖြင့် ဆောက်လုပ်ပေးနိုင်ရန် အစီစဉ် ရှိ၊မရှိ” မေးခွန်း အပေါ် လမ်းပန်းဆက်သွယ်ရေး ဝန်ကြီး ခွန်ရဲထွေးက ဖြေကြားပေးခဲ့ခြင်းဖြစ်သည်။

“၂၀၁၉ – ၂၀၂၀ ဘဏ္ဍရေး နှစ် မှာတော့ သီပေါမြို့နယ်ရဲ့ အခြားလမ်း ၅ လမ်းမှလုပ်ငန်း အတွက် ၅၃၂. ၅ သန်း သုံးစွဲဖို့ လျာထားတောင်းခံထားပါတယ်။ ဒါကြောင့် နမ့်ဟူးနွဲ့ ကောင်းခါး မြေသားလမ်းအတွက် ၂၀၁၉- ၂၀၂၀ ခုနှစ်မှာ လျာထားခြင်း မရှိသေးကြောင်း” လမ်းပန်း ဆက်သွယ်ရေး ဝန်ကြီး ခွန်ရဲထွေး က ပြောသည်။

နှစ်စဉ်ရရှိသည့် ဘဏ္ဍာငွေ အခြေအနေအရ လတ််တလော လိုအပ်မှုများကို ဦးစားပေးအလိုက် စိစစ်ရွေးချယ်ကာ မြို့နယ် စိစစ်ရေးဆွဲရေးကော်မတီက တောင်းခံလာပါက ဆက်လက်လျာ ထား ဆောင်ရွက်သွားမည် ဖြစ်ကြောင်းလည်း ခွန်ရဲထွေး က လွှတ်တော်တွင် ဖြေကြားခဲ့သည်။

သီပေါမြို့နယ် ကော်မတီမှရေးဆွဲထားသည့် ကျေးလက်လမ်း ၁၃ နှစ် စီမံကိန်း ၂၀၂၄- ၂၀၂၅ ဘဏ္ဍာရေးနှစ် ၊ ၂၀၂၅ – ၂၀၂၆ ဘဏ္ဍာရေးနှစ်များမှာ မြေမှကျောက်ချောလမ်းသို့ ဆောင်ရွက် ရန် လျာထားကြောင်း သိရသည်။

အဆိုပါ နမ့်ခမ်း ကောင်းခါး ကားလမ်းသည် ပွင့်လင်းရာသီမှာပင် ကား၊ ဆိုင်ကယ် တက်၍မရကြောင်း၊ လမ်းပန်းဆက်သွယ်ရေး အဆင်မပြေသည့် အတွက် ကောင်းခါး ရွာမှ စာသင်ကျောင်း ဆေးပေးခန်း လျှပ်စစ်မီးများ လုံးဝ မရရှိကြောင်း လည်း သီပေါမြို့ မဲဆန္ဒနယ် အမှတ်(၁) ပြည်နယ် လွှတ်တော် ကိုယ်စားလှယ် နန်းစမ်းစမ်းအေး က ပြောသည်။

မူလတန်း ကလေးငယ်များသည် နေ့စဉ် လမ်း ၂မိုင် ကျော် လျှောက်ပြီး မန်ဟဲကျေးရွာ နမ့်ဟူးနွဲ့ကျေးရွာသို့ ကျောင်းသွားတက်နေရကြောင်း၊ အဆိုပါကလေးများအတွက် လုံခြုံ ဘေးကင်း မှုကို မည်သူကိုမှ တာဝန်မယူကြောင်းလည်း နန်းစမ်းစမ်းအေး အဆိုတင်သွင်းသည့် အချိန်တွင် ထည့်သွင်းပြောဆိုခဲ့သည်။

ထို့ပြင် ရွာသား များ နာမကျန်းဖြစ်ပါကလည်း ဆေးရုံ ဆေးခန်းသို့သွားနိုင်ရန် မသက်နိုင်သည့် အတွက် ကျန်းမာရေး အကြောင်း သိရှိနားလည်သူဖြင့်သာ ကုသနေရကြောင်း ၄င်းကဆိုပါသည်။

အဆိုပါ လမ်းအား အဆင်ပြေချောမွေ့စွာသွားလာနိုင်ရန်အတွက် ဆောက်လုပ်ပေးမည်ဆို ပါက သီပေါမြို့နယ်ရှိ ပန်ကျီးကျေးရွာ နမ့်ဟူးနွဲ့ရွာ ရှိ အိမ်ခြေပေါင်း ၉၄ အိမ် လူဦးရေ ၄၈၀ ကျော်၏ အခက်အခဲကို ဖြေရှင်းနိုင်မည် ဟုလည်း သိရသည်။

ကျေးလက်လမ်း ဖွံ့ဖြိုး ဦးစီးဌာနမှ မြို့နယ် အလိုက် ရန်ပုံငွေ ခွဲဝေရာတွင် သီပေါမြို့အတွက်ပါဝင်မှု အချိုးမှာ ၃၃.၁ ရာခိုင်နှုန်းဖြစ်ကြောင်း၊ ပြည်ထောင်စု ဘဏ္ဍာရန်ပုံငွေ၊ ပြည်နယ် ရန်ပုံငွေ ခွင့်ပြုချက်များမှာ နှစ်စဉ် စုစုပေါင်း ပျမ်းမျှ ၄၁၅ သန်းရရှိခဲ့ကြောင်း သိရသည်။