သျှမ်းပြည်မြောက်ပိုင်း နမ့်ဆန်မြို့နယ် အထက်မန်လွယ်ကျေးရွာသား ၆ ဦးကို ကချင်လွတ်မြောက်ရေး တပ်မတော် (KIA) တပ်ဖွဲ့မှ ဖမ်းဆီးခေါ်ဆောင်သွားကာ ယနေ့ချိန်ထိ ပြန်လည်လွှတ်ပေးခြင်းမရှိသေးကြောင်းစုံစမ်းရရှိသည်။
ထိုသို့ မလွှတ်လာပေးသည့်အပေါ် ကျေးရွာ/သား ၃၀၀ နီးပါးတို့သည် ယနေ့ (ဇန်နဝါရီ ၁၂)ရက် မနက်ပိုင်းတွင် အထက်မန်လွယ်ကျေးရွာမှ မန်တုံမြို့ဘက်သို့ လှည့်လည်စီးတန်း ဆန္ဒထုတ်ဖော်ခဲ့ကြောင်းသိရသည်။
“ ၁၀ ရက်နေ့ကတည်းက ဖမ်းသွားတာ။ ထင်းသွားခုတ်ရင်းနဲ့ ဖမ်းသွားတာပါ။ ခုချိန်ထိပြန်မလွှတ်လာသေးဘူး။ အဲ့ဒါကြောင့် ကျေးရွာ/သားတွေက ဆန္ဒထုတ်ဖော်ပြခဲ့တာပါ” ဟု အထက်မန်လွယ်ကျေးရွာအုပ်စု အုပ်ချုပ်ရေးမှူး မိုင်းသိန်းထိုက်ဇော် က သျှမ်းသံတော်ဆင့်ကို ပြောသည်။
ဆန္ဒပြရာတွင် အထက်မန်လွယ်ကျေးရွာမှ မန်မိုင်မိန်းကွမ်းကျေးရွာ ကိုဖြတ်ပြီး မန်တုံဘက်ကို လှည့်လည်ကာ ဆန္ဒထုတ်ဖော်ခဲ့ကြကြောင်း၊ ထိုဆန္ဒထုတ်ဖော်ရာတွင် ဖမ်းဆီးသွားသည့် ဒေသခံ (၆)ဦးကို အမြန်ပြန်လွှတ်ပေးရန် တောင်းဆိုကြကြောင်း မိုင်းသိန်းထိုက်ဇော်က ပြောသည်။
လွန်ခဲ့သည့် ဇန်နဝါရီ ၁၀ရက်တွင် KIA တပ်ဖွဲ့ မှ အရပ်သား ၇ ဦးဖမ်းဆီးသွားရာ ထိုရက် ညနေပိုင်းအချိန်တွင် ကျေးရွာအုပ်ချုပ်ရေးမှူး နှင့် ကျေးရွာလူကြီးများ၏ အာမခံပေးမှုကြောင့် ဒေသခံတဦးကို KIA တပ်ဖွဲ့ က ပြန်လွှတ်လာပေးခဲ့ကြောင်း မိုင်းသိန်းထိုက်ဇော် က ဆိုသည်။
အဆိုပါ အထက်မန်လွယ်ကျေးရွာ အုပ်ချုပ်ရေးမှူးသည် ယမန်နေ့ (ဇန်နဝါရီ ၁၁ ရက်) အဖမ်းခံရသူရှိမည်နေရာကို သွားရောက်ခဲ့သော်လည်း တစုံတဦးမျှ မတွေ့ရှိခဲ့ဘဲ ပြန်လှည့်လာရကြောင်း အထက်မန်လွယ်ကျေးရွာ ဥက္ကဌ ဦးကျော်စိန် က သျှမ်းသံတော်ဆင့် ကို ပြောသည်။
“ ကျနော် မနေ့ကဖမ်းခံရတဲ့သူတွေရှိတဲ့နေရာကို သွားတာ။ တွေ့လည်းမတွေ့ခဲ့ဘူး။ အဆက်သွယ်လည်းမရဘူး။ ခုချိန်ထိလဲ အဲ ၆ ဦးကိုမလွှတ်လာသေးဘူး” ဟု ဦးကျော်စိန်က ပြောသည်။
ဆက်လက်ပြီး အထက်မန်လွယ်ကျေးရွာ ဥက္ကဌ ကိုကျော်စိန်က “ မန်းတုံမြို့ပေါ်မှာ သူတို့ရဲ့ ကချင်ဘာသာ ခရစ်ယာန်ကျောင်းရှိတယ်။ အဲမှာလည်း အကူးညီတောင်းထားတယ်။ ပြီးတော့ ဌာနဆိုင်ရာတွေကိုလည်း အကူညီတောင်းထားတယ်” ဟု ၎င်းက ဆိုသည်။
အဆိုပါဖမ်းဆီးသွားသောသူများကို အမြန်ဆုံး ပြန်လည်လွတ်စေလာကြောင်း မန်လွယ်ကျေးရွာ ဥက္ကဌ က ထက်လောင်းပြောသည်။
KIA မှ ဖမ်းဆီးသွားသူများကို မည်သည့် အကြာင်းကိစ္စဖြင့် ဖမ်းဆီးခေါ်ဆောင်သွားသည်ကို မသိရှိရသေးကြောင်းလည်း ဦးကျော်စိန် က ဆိုသည်။
အဆိုပါ ကိစ္စနှင့် ပတ်သက်ပြီး သျှမ်းသံတော်ဆင့်မှ KIA ပြောရေးဆိုခွင့်ရှိသူကို ကြိုးစားဆက်သွယ်ခဲ့သော်လည်း မရရှိခဲပေ။
Leave a Comments