သျှမ်းပြည်မြောက်ပိုင်း နမ့်လန်မြို့ ကောင်းလန်းရပ်ကွက်တွင် နေထိုင်သည့် လင်းမယား နှစ်ယောက်ကို အမည်မသိ လက်နက်ကိုင် တပ်ဖွဲ့က ၎င်းအိမ်တွင် သေနတ်ဖြင့် လာရောက်ပစ်ခဲ့ကြောင်း စုံစမ်းသိရှိရသည်။
အဆိုပါ လင်းမယား၂ဦးကို ယမန်နေ့ ( ဇန်နဝါရီ ၁၁ ရက်) ည ၅ နာရီခွဲတွင် အမည်မသိ လက်နက်ကိုင် အဖွဲ့ ပစ်ခတ်မှုကြောင့် အမျိုးသမီး ကျည်(၇)ချက် ထိမှန်ကာ သေဆုံးသွားပြီး၊ အမျိုးသား ကျည်တချက်ထိမှန်ကာ လာရှိုးဆေးရုံတွင် ပို့ဆောင်ထားကြောင်း သွားရောက်ကူညီပေးသည့် အမျိုးသားတတဦးက သျှမ်းသံတော်ဆင့် ကို ပြောသည်။
“ ဟုတ်ပါတယ်။ သူတို့ လင်းမယား ၂ ယောက် အိမ်ထဲအဝင်းမှာ လာရောက်ပြီးတော့ ပစ်ခတ်သွားတယ်။ အမျိုးသမီးက ဆေးရုံပို့ချိန်မှာ ကားပေါ်မှာပဲ သေသွားတယ်။ သူအမျိုးသားကိုတော့ လာရှိုးဆေးရုံကို သွားပြီးပို့ထားပေးတယ်” ဟု ၎င်းအမျိုးသား တဦး ကပြောသည်။
ကျည်ထိမှန်သည့် အမျိုးသမီးသည် နောက်ကျော(၄)ချက်၊ ရင်ဘတ် (၃)ချက် ထိမှန်သေဆုံးသွားသည်။
ထိုသို့ပစ်ခတ်မှုသည် ငွေကြေးကိစ္စကြောင့် အများဆုံးဖြစ်နိုင်ကြောင်း နမ့်လန့်မြို့နေ စိုင်းဆုက သျှမ်းသံတော်ဆင့် ပြောသည်။
“သူတို့အိမ်က ဘာစီးပွားရေးမှတော့လုပ်တာမရှိဘူး။ အများအားဖြင့်ကတော့ ငွေကြေးကိစ္စပဲ ဖြစ်မယ်ထင်တယ်။ သူတို့ရဲ့ စုကြေးငွေတွေကြောင့်ပေါ့။ သူများကို ပိုက်ဆံပြန်မပေးနိုင်လို့ထင်တယ်” ဟု စိုင်းဆု ကဆိုသည်။
၂၀၁၉ ခုနစ်တွင် ထိုနေအိမ်တွင် သေနတ်တကြိမ်ပစ်ခံရပြီး အမျိုးသားတဦးသေဆုံးခဲ့ကြောင်း၊ လက်ရှိအချိန်ထိ တရားခံမဖော်ထုတ်နိုင်သေးခဲ့ကြောင်း လည်း ဒေသခံ ပြောပြချက်အရသိရသည်။
အဆိုပါကိစ္စနှင့် ပတ်သက်ပြီး နမ့်လန်ရဲစခန်းကို သျှမ်းသံတော်ဆင့်က ဆက်သွယ်မေးမြန်းသော်လည်း မရခဲ့ပေ။
Leave a Comments