RCSS နှင့် TNLA စစ်ရေးတင်းမာနေသည့်ကြား နမ္မတူစစ်ရှောင်များ စိုးရိမ်စိတ်ဖြင့်နေရပ်ပြန်

0

သျှမ်းပြည်မြောက်ပိုင်း နမ္မတူမြို့နယ် အတွင်း ရှမ်းပြည်ပြန်လည်ထူထောင်ရေးကောင်စီ၊ ရှမ်းပြည်တပ်မတော် (RCSS/SSA) နှင့် တအောင်း(ပလောင်) အမျိုးသားလွတ်မြောက်ရေးတပ်မတော် (TNLA) တို့ စစ်ရေးတင်းမာနေသည့်ကြား စစ်ရှောင်များ စိုးရိမ်စိတ်ဖြင့် နေရပ်သို့ ပြန်သွားပြီဖြစ်ကြောင်း စုံစမ်းသိရှိရသည်။

Photo by US SA/Facebook

သျှမ်းပြည်မြောက်ပိုင်း နမ္မတူမြို့နယ်ရှိ မန်စံရွှေစကားဝါဘုန်းကြီးကျောင်း နှင့် နားဆိုင်းဘုန်းကြီးကျောင်းရှိ စစ်ရှောင်များသည် ယမန်နေ့( ဇန်နဝါရီ ၁၁) ရက်မှ စတင်ကာ နေရပ်သို့ ပြန်သွားပြီဖြစ်ကြောင်း စုံစမ်းသိရှိရသည်။

လက်ရှိ RCSS/SSA နှင့် TNLAတို့သည် နမ္မတူမြို့နယ် အတွင်း တိုက်ပွဲငြိမ်သက်လာသည်မှာ ၃ရက်ရှိလာပြီဖြစ်ပြီး၊ စစ်ရေးတင်းမာမှု ရှိနေသေးသည်။

သို့သော် တိုက်ပွဲမရှိသည့်အတွက် နေအိမ်တွင် ကျန်ခဲ့သည့်ကျွဲ၊နွားများ၊ နေအိမ်ပစ္စည်းများကို စိတ်မချရသဖြင့် စိုးရိမ်စိတ်ဖြင့် ပြန်သွားရကြောင်း စစ်ရှောင်များကို ကူညီပေးနေသည့် သူများက ပြောပြသည်။

“ သူတို့ အိမ်မှာကျန်ခဲ့တဲ့ ကျွဲ၊ နွားတွေကို စိတ်ပူတာတွေရှိတယ်။ နောက် တိုက်ပွဲဖြစ်တော့ ရုတ်တရက်ထပြေးကြတယ်။ အိမ်ကပစ္စည်းတွေလည်း စိတ်မချတာတွေလည်းပါမယ်။ တိုက်ပွဲငြိမ်လို့ ပြန်သွားကြတာ။ စိုးရိမ်ကြောက်တာတော့ရှိတာပေါ့” ဟု နားဆိုင်း ဘုန်းကြီးကျောင်းရှိ စစ်ရှောင်များကို ကူညီပေးနေသည့် ပရဟိတ လူငယ်တဦးက သျှမ်းသံတော်ဆင့်ကို ပြောသည်။

Photo by US SA/Facebook

သျှမ်းပြည် မြောက်ပိုင်း RCSS/SSA နှင့် TNLAတိုက်ပွဲကြောင့် နေရပ်စွန့်ခွာထွက်ပြေးရသည့် သူ (၃၀၀၀)ကျော်ရှိကြောင်းသိရသည်။

ထိုနေရပ်စွန့်ခွာနေချိန် အရပ်သားနေအိမ်တချို့ ဖောက်ထွင်းမွှေနောက်ခံရကြောင်း၊ မည်သည့် လက်နက်ကိုင် တပ်ဖွဲ့ မှ မွှေနောက်ရှာဖွေထားသည်ကို အရပ်သားများမသိရှိရသေးပေ။

တိုင်းရင်းသားလက်နက်ကိုင်တပ်ဖွဲ့ ၂ဖွဲ့သည် နမ္မတူနယ်မြေအတွင်း ထိတွေ့မှု မဖြစ်ပွားခဲ့သည်မှာ ၃ရက်ခန့်ရှိလာသော်လည်း မြေပြင် အခြေအနေအရ ကျေးရွာ ပတ်ဝန်းကျင်တွင် တိုင်းရင်းသားလက်နက်ကိုင် တပ်ဖွဲ့များရှိနေသေးကြောင်း လည်း သိရသည်။

“မြေပြင်အခြေနေတော့ မပြောနိုင်ဘူး။ ရွာအနီးပတ်ဝန်းကျင်မှာ တိုင်းရင်းသား လက်နက်ကိုင်တွေလည်း ရှိနေသေးတယ်။ အခြေနေကြည့်ပြီး ပြန်တာ။ အေးချမ်းပြီးလာဆိုတော့ မအေးချမ်းသေးဘူး။ နှစ်ဖက်စစ်ရေးက တင်းမာနေတုန်းပဲ။ သူတို့ ရှိနေတုန်းပဲ” ဟု မန်စံ စစ်ရှောင်ကော်မတီအဖွဲ့ဝင် လုံးဘဉာဏ် က သျှမ်းသံတော်ဆင့် ကိုပြောသည်။

နမ္မတူမြို့နယ်ရှိ စစ်ရှောင်များသည် နားဆိုင်းစစ်ရှောင်စခန်းမှာ (၆၀၀) ကျော်ရှိပြီး မန်စံစစ်ဘေးရှောင်စခန်းမှာ (၂၆၀) ကျော်ရှိပြီး နေရပ်သို့ ပြန်သွားပြီဖြစ် သော်လည်း ကျောက်မဲမြို့နယ်ရှိ စစ်ရှောင်များ နေရပ်သို့ မပြန်နိုင်သေးကြောင်း သိရသည်။

နမ္မတူမြို့နယ်အတွင်း ဒီဇင်ဘာ (၉) ရက်မှစတင်ကာ တိုင်းရင်းသား လက်နက်ကိုင် အချင်းအချင်း တိုက်ပွဲဖြစ်ပွားခဲ့ပြီး ကိုယ်ဝန်သည် အမျိုးသမီးတဦး အပါအဝင် အမျိုးသမီး ၃ ဦး နှင့် အမျိုးသား ၁ ဦး ကျည်ထိမှန်ခဲ့ရကြောင်းသိရသည်။

RCSS/SSAနှင့် TNLAတို့ဖြစ်ပွားသည့်တိုက်ပွဲသည် ကျေးရွာအနီးပတ်ဝန်းကျင်တွင် မဖြစ်ပွားရန်လည်း ပြည်သူများက တောင်းဆိုလိုက်သည်။

“ ကျနော်တို့ RCSS/SSAတပ်ဖွဲ့အနေနဲ့ အရပ်သားတွေထိခိုက်မှုမဖြစ်အောင် ရှောင်ပါတယ်။ ကျေးရွာနဲ့ အနီးကပ် တိုက်ပွဲမဖြစ်အောင် ရှောင်နိုင်သလောက်ရှောင်ပါတယ်” ဟု RCSS/SSA ပြောရေးဆိုခွင့်ရှိသူ ဒုဗိုလ်မှူးကြီး အုမ်ခေး က သျှမ်းသံတော်ဆင့်ကို ပြောသည်။

RCSS/SSA တိုက်ပွဲကြောင့် အရပ်သားနေအိမ်(၆၀)နီးပါး ပျက်စီးဆုံးရှုံးခဲ့ရပြီး နှင့် ကျေးရွာ ဘုန်းကြီးကျောင်းလည်း ကျည်ထိမှန် ပျက်စီးခဲ့ရကြောင်း သိရသည်။

Leave a Comments