သျှမ်းပြည်မြောက်ပိုင်း ကျောက်မဲမြို့နယ် အတွင်း တိုင်းရင်းသားလက်နက်ကိုင် တပ်ဖွဲ့(၂)ဖွ့ဲစစ်ရေး ဆက်လက် တင်းမာနေဆဲ ဟု စုံစမ်းသိရသည်။

ဒီဇင်ဘာ ၂၅ရက်မှ စတင်ကာ သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) နှင့် တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) တို့ တိုက်ပွဲ ဖြစ်ပွားကာ ယနေ့ချိန်ထိ စစ်ရေး တင်းမာနေဆဲ ဟု RCSS/SSAမှ ပြောရေးဆိုခွင့်ရှိသူ ဗိုလ်မှူးခမ်းစံ က သျှမ်းသံတော်ဆင့်ကို ပြောသည်။

“ ကျောက်မဲဘက်ကတော့ စစ်ရေး တင်းမာမှုနေတယ်။ သီပေါဘက်ကတော့ စစ်ရေး လှုပ်ရှားမှုရှိတဲ့သဘောပါ။ စိုးရိမ်ရတဲ့ တင်းမာမှုကတော့ မရှိသေးဘူး” ဟု ဗိုလ်မှူးခမ်းစံ က ဆိုသည်။

RCSS/SSA နှင့် TNLA တို့သည် ယမန်နေ့ (ဇန်နဝါရီ ၁)ရက်တွင် နမ္မတူမြို့နယ်၊ သီပေါမြို့နယ် နှင့် ကျောက်မဲမြို့နယ်အတွင်း နေရာ ၃နေရာ ထိုးစစ်ဆင်မှုရှိခဲ့ကြောင်းလည်း TNLA ၏ သတင်းထုတ်ပြန်ချက် အရသိရသည်။

“ မနေ့က ကျနော်တို့ ၃နေရာ ထိတွေ့မှုဖြစ်တာ ဟုတ်ပါတယ်။ ဒီနေ့ တိုက်ပွဲ အခြေအနေကတော့ ကျနော်ဆီကို မြေပြင်သတင်းမတက်လာသေးဘူး” ဟု ဗိုလ်မှူးခမ်းစံ က ထပ်လောင်ပြောသည်။

ယနေ့ ဇန်နဝါရီ ၂ရက် တွင် သျှမ်းပြည်မြောက်ပိုင်း သီပေါမြို့နယ် ကွန်ဟောက်ကျေးရွာ အုပ်စုနှင့် နမ္မတူမြို့နယ် အတွင်း RCSS/SSAနှင့် TNLA တို့ တိုက်ပွဲဖြစ်ပွားမှု ရှိကြောင်းကို မြေပြင် ဒေသခံ ပြောပြချက်အရ သိရသည်။

အဆိုပါ တိုက်ပွဲဖြစ်ပွားမှုနှင့် ပတ်သက်ပြီး TNLA မှ ပြောရေးဆိုခွင့် ကို သျှမ်းသံတော်ဆင့်မှ ဆက်သွယ်မေးမြန်းရာ ဖြေဆိုခြင်းမရှိခဲ့ပေ။

RCSS/SSAနှင့် TNLAတို့သည် ဒီဇင်ဘာ လအတွင်း တိုက်ပွဲ ၁၁ကြိမ်ရှိခဲ့ပြီး ယခု ၂၀၂၁ ခုနစ် ဇန်နဝါရီလအတွင်း တိုက်ပွဲ အကြိမ်ရေ ၃ကြိမ်ရှိခဲ့ေကြောင်းသိရသည်။

ထိုတိုင်းရင်းသားလက်နက်ကိုင် ၂ဖွဲ့တိုက်ပွဲဖြစ်ပွားမှုကြောင်း ကျောက်မဲမြို့ပေါ်တွင် စစ်ဘေးရှောင် ၈၀၀နီးပါး ထွက်ပြေးတိမ်းရှောင်နေရပြီး၊ စစ်ရေး ဆက်လက်တင်းမာနေပါက စစ်ရှောင်များ ထပ်မံရောက်ရှိလာနိုင်ကြောင်းလည်း စစ်ရှောင်ကူညီပေးနေသူများက ပြောဆိုလိုက်သည်။

ထို့ပြင် ဒီဇင်ဘာ ၁၀ရက်နေ့တွင် RCSS/SSAနှင် TNLA တိုက်ပွဲကြောင့် ကိုယ်ဝန်သည် အမျိုးသမီး ၁ဦး အပါအဝင် အမျိုးသမီး ၃ဦး ကျည်ထိမှန်ခဲ့ပြီး ဆယ်ကျော်သက် အမျိုးသားတဦး ကျည်ထိမှန်ခဲ့ကြောင်းသိရသည်။