လွိုင်လင်ခရိုင် နမ့်စန်မြို့နယ် ပန်လျန်းဆိုင်ဒေသရှိ မကျိုင်းပြည်သူ့စစ်တပ်ဖွဲ့နှင့်ရဲတပ်ဖွဲ့ပူးပေါင်းနယ်လှည့် အဖွဲ့ သည် ဘိန်းစိမ်းပိဿာချိန် ၉၂၀ ကျော်ဖမ်းဆီးရမိခဲ့ကြောင်း သိရသည်။
မေလ ၂၄ ရက်နေ့က မေတ္တာခမ်းတန် ဟုရေးထားသည့် ကား ၂ စီးအား တားဆီးစစ်ဆေးရာ အဆိုပါ ဘိန်းစိမ်း များဖမ်းဆီးရမိခြင်းဖြစ်ကြောင်း ပန်လျန်းဆိုင်ဒေသ မကျိုင်းပြည်သူ့စစ်တပ်ဖွဲ့မှ အကြီးအကဲတဦးက ပြောသည်။
မြို့နယ်ရဲတွေက သတင်းရထားလို့ ရဲတပ်ဖွဲ့နဲ့ ခလရ ၂၄၇၊ ခမရ ၅၁၆ တို့ပူးပေါင်းထားတဲ့တပ်ဖွဲ့ဟာ ကွင်းဆင်း ဖို့အတွက် ကျနော်တို့ပြည်သူ့စစ်တပ်ဖွဲ့ကို အင်အားဖြည့်တင်းပေးဖို့တောင်းလာတာကြောင့် လိုက်သွားရတာပါ။ မနက်ပိုင်း ရ နာရီထိုးဖို့ ၁၀ မိနစ်အလိုမှာ မေတ္တာခမ်းတန်လို့ ရေးထားတဲ့ ဗီဂိုကားတစီးနဲ့ မိုက်တီး ကားတစီးကို တားဆီးစစ်ဆေးရာမှာ ဘိန်းစိမ်းထည့်ထားတဲ့ဆာလာအိတ် ၂၆ လုံးကိုဖမ်းဆီးရမိတယ်။ အလေးချိန်အရ ပိဿာချိန် ၉၂၀ ရှိတယ်လို့ သိရတယ်။ အခုတော့ အဲဒီလူတွေကိုဖမ်းဆီးထားပြီး ဥပဒေအရ အရေးယူသွားမှာပါ- ဟု သျှမ်းသံတေ်ာဆင့်အားပြောပြသည်။
ထိုနေ့က နံနက် ၉ နာရီတွင်မူ ဆိုင်ကယ်သမား ၂ ဦးထံမှလည်း ဘိန်းစိမ်း ၁၇ ပိဿာ ထပ်မံဖမ်းဆီးရမိကြောင်း ၄င်းကပြောသည်။
အဆိုပါ ဘိန်းစိမ်းများအား နမ့်စန်မြို့အနောက်တောင်ဘက်ရှိ မိုင်းစစ်အုပ်စု ၀မ့်နောင်စမ့်ရွာတွင် ဖမ်းဆီးရမိ ခြင်းဖြစ်ပြီး လွယ်လင်မြို့နယ် မိုက်ခါးရွာဘက်မှ သယ်ဆောင်လာကြခြင်းဖြစ်သည်ဟု အဖမ်းခံရသူများ ၀န်ခံ ချက် ပေးကြောင်း ဆိုပါသည်။
ဘိန်းမည်းများဖမ်းမိသည့်အဆိုပါကားတွင်ရေးသားထားသော မေတ္တာခမ်းတန် ဆိုသည့်စာသားသည် ပအိုဝ်း တိုင်းရင်းသားဘာသာစကားဖြစ်ကြောင်း၊ ခမ်းတန် က တိုင်းပြည်ဟုအဓိပ္ပါယ်ရှိကြောင်း၊ မေတ္တာခမ်းတန် ဆိုသည့် စာသားကလည်း မေတ္တာတိုင်းပြည် ဟု အဓိပ္ပါယ်ရှိကြောင်း၊ မင်္ဂလာ ရှိသည့် စာသားမို့ နားလည်သူ တိုင်း မိမိပိုင်ကားတွင်ရေးလေ့ရှိကြောင်း ပအိုဝ်းလက်နက်ကိုင်အဖွဲ့ သို့မဟုတ် ပအိုဝ်းအဖွဲ့အစည်း နှင့် သက်ဆိုင်သည်မသက်ဆိုင်သည်ကို အဖမ်းခံရအမှုထွက်ဆိုသူများနှင့်သာ သက်ဆိုင်ကြောင်း အဆိုပါ မကျိုင်းပြည်သူ့စစ်တပ်ဖွဲ့ ဒုဥက္ကဌ ကပြောသည်။
နမ့်စန်မြို့နယ် ပန်လျန်းဒေသတွင် ဦးလျန်းဆိုင်ဦးဆောင်သော ပန်လျန်းဆိုင် ခေါ် မကျိုင်းပြည်သူ့စစ်တပ်ဖွဲ့ အခြေချနေထိုင်ပြီး အနီးတဝိုက်ရှိ မူးယစ်ဆေးဝါးရှင်းလင်းတိုက်ဖျက်ရေးလုပ်ငန်းများလုပ်ဆောင်နေကြောင်း သိရသည်။
ယခင်က ဘိန်းစိမ်းတပိဿာလျင် ကျပ် ရ သိန်း မှ ၁၂ သိန်း ခန့်ရှိသော်လည်း လက်ရှိ ကာလပေါက်စျေး ဘိန်းစိမ်း တပိသာလျင် ကျပ် ၃ သိန်း မှ ၆ သိန်း ခန့်သာရှိကြောင်း၊ ဘိန်းအရည်အသွေးပေါ် ကြည့်ပြီး စျေးသတ်မှတ်ကြောင်း ကြားသိရသည်။
