လာမည့် ဇန်နဝါရီလ ၅ရက် တွင် ကျရောက်မည့် မိုင်းဖုန်းဆရာတော် ဘဒ္ဒန္တ ဉာဏသံဝရ ၏ သက်တော် (၅၇)နှစ်မြောက် ဝိဇာတ မွေးနေ့ပွဲကို စည်းကားစွာပြုလုပ်မည်မဟုတ်ဘဲ ကိုယ့်ဒေသ အစီစဉ်ဖြင့် ပြုလုပ်သွားမည် ဖြစ်ကြောင်း စုံစမ်းသိရှိရသည်။
သျှမ်းပြည်နယ် အရှေ့ပိုင်း တာချီလိတ်မြို့နယ် မိုင်းဖုန်းကျောင်း တွင် နှစ်စဉ်နှစ်တိုင်း မိုင်းဖုန်းဆရာတော်၏မွေးနေ့ပွဲကို စည်းကားစွာပြုလုပ်ခဲ့ပြီး ယခုနှစ်တွင် ကိုဗစ်-၁၉ ကူးစက်ရောဂါ ကြောင့် ပြုလုပ်မည်မဟုတ်ကြောင်း သျှမ်းပြည်အရှေ့ပိုင်း သံဃာလုံးဆိုင်ရာအဖွဲ့ချုပ် ဥက္ကဌ ဆရာတော်ဦးဉာဏသီရိ က မိန့်ကြားသည်။
“ ဆရာတော်ရဲ့မွေးနေ့တော့လုပ်မယ်။ ဒါပေမယ့်အကြီးကျယ်ပြုလုပ်မှာမဟုတ်ဘူး။ မိုင်းဖုန်းကျောင်းမှာ လည်းမပြုလုပ်ဘူး။ သျှမ်းပြည်နယ်တစ်ခုလုံးလည်း ကိုယ့်နေရာမှာ ကိုယ့်သာသာပြုလုပ်သွားဖို့ ပြောထားတယ်” ဟု ဆရာတော်ဦးဉာဏသီရိ ကထပ်လောင်း မိန့်ကြားသည်။
အဆိုပါ မိုင်းဖုန်းဆရာတော် တရားကျင့်နေသည့် မိုင်းကျက်ဂူးတွင်လည်း ဒေသခံများဖြင့်သာပြုလုပ်သွားမည် ဖြစ်ပြီး တခြားမြို့မှ လာရောက်ခွင့်မပေးထားကြောင်း ဆရာတော်များက မိန့်ကြားလိုက်သည်။
“ မိုင်းကျက်မှာလည်း မိုင်းကျက်မြို့ဒေသခံတွေနဲ့ပဲ ပြုလုပ်သွားခိုင်းမှာပါ။ တခြားမြို့ဒေသကနေ သွားခိုင်းမှာမဟုတ်ဘူး။ ရောဂါကြီးကူးစက်လာမှာ ကြောက်တယ်လေ” ဟု တောင်တန်းသာသနာပြု ဆရာတော် ဦးသုခမိန္ဒ(စဝ်စုခမ်း) က မိန့်ကြားသည်။
အဆိုပါ မိုင်းဖုန်းဆရာတော်၏ မွေးနေ့ကို ကိုဗစ်- ၁၉ ကြောင့် ကိုယ့်ဒေသရှိ ဘုန်းကြီးကျောင်းများတွင် မိမိအစီအစဉ်ဖြင့် ပြုလုပ်ရန် နှင့် ဆရာတော်တည်ထားသည့် စေတီများတွင်လည်း အမှတ်တရ အဖြစ်ပြုလုပ်သွားမည် ဖြစ်ကြောင်း ဦးသုခမိန္ဒ(စဝ်ဆုခမ်း) ထပ်မံ မိန့်ကြားသည်။
ကိုဗစ်- ၁၉ ကပ်ရောဂါကြောင့် ကျန်းမားရေးနှင့် အားကစားဝန်းကြီးဌာနကလည်း လူ ၃၀ ပိုမစုရဟု စာထုတ်ပြန် ကြောညာထားသည်။
သျှမ်းပြည်တွင် ကိုဗစ်-၁၉ အတည်ပြုလူစုစုပေါင်း ( ၇၄၉) ဦးရှိပြီး ဆေးရုံတက်လူနာ ၁၆၁ နှင့် သေဆုံးသူ ၃ ဦး ရှိကြောင်း ပြည်နယ်ကုသရေးနှင့် ကျန်းမားရေးဦးစီးဌာန သျှမ်းပြည်နယ်၊ တောင်ကြီး၏ လူမှုစာမျက်နှာကွန်ယက်မှ ထုတ်ပြန်ထားကြောင်းသိရသည်။
