သျှမ်းလက်နက်ကိုင် တပ်ဖွဲ့ နှစ်ဖွဲ့ကြား ဖြစ်ပွားနေသည့် ပဋိပက္ခများ ဖြေလျော့ရန်အတွက် နှစ်ဖက်တပ် တာဝန်ရှိသူများ တယ်လီဖုန်းဖြင့် ဆက်သွယ် ဆွေးနွေးခဲ့ကြောင်း သတင်းရရှိသည်။

ဒီဇင်ဘာ (၁၀) ရက်နေ့က နှစ်ဖက်တပ် ကိုယ်စားလှယ်များ တယ်လီဖုန်းဖြင့် ဆက်သွယ် ဆွေးနွေးခဲ့ကြောင်း RCSS ပြောရေးဆိုခွင့်ရှိသူ ဒုဗိုလ်မှူးကြီး အုမ်ခေး က သျှမ်းသံတော်ဆင့် ကိုပြောသည်။

“ဆွေးနွေးပွဲတွေ ရှိတာမဟုတ်ဘူး။ တယ်လီဖုန်းနဲ့ ဆက်သွယ်ပြီး နားလည်မှုယူတယ်။ ဆွေးနွေးပွဲ လုပ်ပြီး ဆုံးဖြတ်ချက်ယူတဲ့ ပုံစံမျိုး အဲ့လိုမျိုးမဟုတ်ဘူး။ ဖုန်းနဲ့ ဆက်သွယ်ပြီး နားလည်မှုယူတယ်။ အထင်လွဲမှားတာတွေ မဖြစ်ဖို့ စသဖြင့် အဲ့လိုတွေ နားလည်မှု ယူတယ်။ ဆုံးဖြတ်ချက်ချ ပြီး ယူတာ တွေတော့ မရှိသေးဘူး။” ဟု ဒုဗိုလ်မှူးကြီး အုမ်ခေး က ပြောသည်။

သျှမ်းလက်နက်ကိုင်တပ်ဖွဲ့ နှစ်ဖွဲ့ကြား ပစ်ခတ်တိုက်ခိုက်မှုမဖြစ်ရန်အတွက် ဆွေးနွေးဆဲ ကာလဖြစ် သောကြောင့် အမျိုးသားညီညွှတ်ရေးကို ထိခိုက်စေမည့် ဝေဖန်ပြစ်တင်မှုများ မလုပ်ကြရန်အတွက် သျှမ်းပြည်သူလူထုကို သျှမ်းပြည်တိုးတက်ရေးပါတီ/သျှမ်းပြည်တပ်မတော် (SSPP/SSA) က မေတ္တာရပ်ခံ လိုက်ကြောင်း ဒီဇင်ဘာ (၁၅) ရက်က (SSPP) Info ဖေ့ဘုတ်ပေ့မှာ ထုတ်ပြန်ထားသည်။

SSPP/SSA မှ ပြောခွင့်ရ ဗိုလ်မှူးစိုင်းသန်းအောင်က – “အခု ကျွန်တော်တို့ အချင်းချင်း ပစ်ခတ်တိုက်ခိုက်နေရတာဟာ ကျနော်တို့ကြား အမြင်သဘောထားနဲ့ လုပ်ဆောင်ချက်တွေက မတူညီနေတာကြောင့်ဖြစ်တယ်။ တဖက်ကလည်း ကျွန်တော်တို့ကြား ယုံကြည်မှုလုံးဝ မတည်ဆောက်နိုင်လို့ အခုလို ပေါင်းစည်းနိုင်ဖို့လမ်းက ဝေးကွာနေရတာပဲဖြစ်တယ်။ ယုံကြည်မှု တည်ဆောက်ဖို့အတွက်ဆိုရင် စစ်မြေပြင်မှာသာမက အွန်လိုင်းမှာပါ တဖက်နဲ့တဖက် ပုတ်ခတ်ရေးသားဝါဒဖြန့်တာတွေကအစ သတိပြုရှောင်ရှားကြရမှာဖြစ်ပါတယ်ခင်ဗျ။ ”- ဟု သျှမ်းသံတော်ဆင့်အားပြောသည်။

ရှမ်းပြည်တိုးတက်ရေးပါတီ (SSPP) ၊ ရှမ်းပြည်ပြန်လည်ထူထောင်ရေးကောင်စီ(RCSS) နှင့် နိုင်ငံရေးပါတီများ၏ ထိပ်ပိုင်းခေါင်းဆောင်များသည် နှစ်ဖက်ဖြစ်ပွားနေသည့် ပဋိပက္ခများကို ဖြေလျော့ရန်အတွက် SSPP နဲ့ RCSS တပ်ဖွဲ့ကြား ဖြစ်ပွားသည့် ပဋိပက္ခများကို လျှော့ချရန်အတွက် တွေ့ဆုံညှိနှိုင်းနေချိန်မှာ လုပ်ကြံဖန်တီးသည့် သတင်းအတု၊ သတင်းအမှားတွေအပြင် ဖြစ်စဉ်ကို ဦးဆောင်လုပ်ပေးသည့် နှစ်ဖက်ခေါင်းဆောင်များကို အထင်အမြင် လွှဲမှားအောင် မလုပ်ဖို့လည်း စည်းလုံးညီညွတ်ရေးနှင့်ပတ်သက်သည့်ထုတ်ပြန်ချက်တစောင်ကို ဒီဇင်ဘာလ ၅ ရက်နေ့ရက်စွဲဖြင့် SSPP အတွင်းရေးမှူး ၂ ဒုဗိုလ်မှူးကြီးစိုင်းဆုက လက်မှတ်ရေးထိုးကာ ထုတ်ပြန်ချက်တွင် တိုက်တွန်းထားသည်။

ဒီဇင်ဘာ (၅) ရက်က သျှမ်းပြည်မြောက်ပိုင်း သီပေါမြို့နယ်တွင်း သျှမ်းတပ် (၂) တပ် ထိတွေ့မှု ရှိခဲ့ပြီး တိုက်ပွဲဖြစ်ပွားခဲ့သည်။ ဒီဇင်ဘာလ ရ မှ ၁၀ ရက်အထိ် နမ္မတူမြို့နယ်အတွင်းဖြစ်ပွါးသော RCSS နှင့် မဟာမိတ်တပ်ပေါင်းစုကြားတိုက်ပွဲအတွင်း RCSS နှင့် SSPP ကြား တိုက်ပွဲတကြိမ်ဖြစ်ပွါးခဲ့သေးသည်ဟုသိရသည်။