သျှမ်းပြည်နယ်တောင်ပိုင်း လွိုင်လင်မြို့တွင် ကိုဗစ် ၁၉ လူနာ ၁၄ ဦးအထိရှိလာသော်လည်း မြို့အားလော့ဒေါင်းချဖို့အစီအစဉ်မရှိသေးကြောင်း စုံစမ်းသိရှိရသည်။
လူနာ ၁၄ ဉီးအနက် လက်ရှိဆေးရုံတွင် ကုသမှုခံယူနေသည်မှာ ၉ ဦးကျန်ရှိကြောင်း လွိုင်လင်မြို့ ဒုခရိုင်ပြည်သူ့ကျန်းမာရေးဦးစီးဌာနမှူး ဒေါက်တာ ဇော်လင်း ကပြောသည်။
“ အစကတော့ ၁၄ ဦးအထိရှိတာပေါ့။ လောလောဆယ် ၅ ဦးကတော့ ပြန်သွားပြီး။ ၉ ဦးကတော့ ဆေးရုံမှာ ဆေးကုသနေသေးတယ်” ဟု ဒေါက်တာဇော်လင်း ကသျှမ်းသံတော်ဆင့်အား ပြောသည်။
ပိုးတွေ့လူနာများသည် မန္တလေးသို့ဆေးသွားကုပြီးပြန်လာသူတဉီး၊ ပုသိမ်အကျဉ်းထောင်မှပြန်လွှတ်လာသူတဉီး၊ မုံရွာသို့ လုပ်ငန်းကိစ္စဖြင့်သွားရောက်လုပ်ကိုင်ပြီးပြန်လာသူတဉီးတို့ဖြစ်ကြောင်း ဒုခရိုင်ပြည်သူကျန်းမာရေးဦးစီးဌာနမှူး ဒေါက်တာ ဇော်လင်း က ရှင်းပြသည်။
၄င်းတို့အား Quarantine Center မှပင် စစ်ဆေးပိုးတွေ့ခဲ့ကြောင်းသိရသည်။
သို့သော် သျှမ်းပြည်တောင်ပိုင်း တောင်ကြီးမြို့မှ ပြန်လာသူများအတွက်မူ Quarantine Center မဝင်ရကြောင်း မြို့လော့ဒေါင်းချထားမှုလည်းမရှိကြောင်း စုံစမ်းသိရှိရသည်။
“ တောင်ကြီးကနေပြန်လာရင်တော့ မဝင်ရဘူး။ ဝင်ရင် ကားသမားတွေအတွက် အခက်အခဲဖြစ်တာပေါ့။ ” ဟု ဒေါက်တာ ဇော်လင်းကပြောသည်။
အလားတူ နမ့်စန်မြို့တွင်လည်းဟိုက်ဖတ်ရွာသို့ မင်္ဂလာဆောင်သွားပြီးပြန်လာသူတဉီးထံ ကိုဗစ်-၁၉ စစ်ဆေးတွေ့ရှိသဖြင့် ၄င်းမိသားစုအပါအ၀င်ဟိုက်ဖတ်ရွာလည်း လော့ဒေါင်းချထားရကြောင်း ဟိုက်ဖတ်ဒေသခံများပြောပြချက်အရသိရသည်။
သျှမ်းပြည်နယ်တွင် ယမန်နေ့ ဒီဇင်ဘာ ၁၅ ရက်နေ့က ကိုဗစ် ၁၉ အဖြေစစ်ဆေးချက်အရ သျှမ်းပြည်တစ်ဝှမ်းတွင် ကိုဗစ် ၁၉ ပိုးတွေ့လူနာ ၁ ဦးသာ တွေ့ရှိခဲ့ရာ ဆီဆိုင်မြို့နယ် နောင်မွန်ရွာသားဖြစ်ကြောင်း ကျန်းမာရေးနှင့် အားကစားဝန်ကြီးဌာန ထုတ်ပြန်ချက် အရသိရသည်။
မြန်မာနိုင်ငံတွင် ကိုဗစ် ၁၉ အတည်ပြုလူနာ (၁၁၀၆၆၇)ဦးနှင့်ဆေးရုံးဆင်းခွင့်ရသူ (၈၉၄၁၈) ဦးရှိပြီး သေဆုံးလူနာ (၂၃၁၉) ဦးရှိကြောင်း ကျန်းမားရေးနှင့် အားကစားဝန်းကြီးဌာန ထုတ်ပြန်ချက်အရသိရသည်။