သျှမ်းပြည် အရှေ့ပိုင်း တာချီလိတ်မြို့တွင် ယနေ့ ဒီဇင်ဘာ ၁၀ ရက်နေ့လည်ပိုင်းအချိန်ထိ ကိုဗစ် ၁၉ အတည်ပြုလူနာ ၆ ဦးထပ်မံတွေ့ရှိကြောင်းစုံစမ်းသိရှိသည်။
ထိုပိုးတွေ့၆ ဦးတွင် ထိုင်းနိုင်ငံမှ တရားမဝင်ရောက်ရှိလာသော သူများထဲမှ ၂ ဉီးဖြစ်ကြောင်း သိရသည်။
“ ဒီနေ့တော့ ၆ ယောက်ရှိပြီ။ မန်းရံကျေးရွာကပါ။ သူတို့က တာချီလိတ်မြို့ထဲလာတာရှိတယ်။ ပြီးတော့ ဈေးထဲသွားတာရှိသေးတယ်” ဟု သျှမ်းပြည်အရှေ့ပိုင်း လက်ထောက်ညွှန်ကြားရေးမှူး ဒေါက်တာ ဘစိုးသက် ကပြောသည်။
ထိုပိုးတွေ့လူနာထဲတွင် ကလေးငယ် ၅ ဦးတစ်ဦးပါဝင်ပြီး အသက် ၆၀ လူနာတစ်ဦးပါဝင်ကြောင်း သိရသည်။ ပိုးတွေ့သူများသည် ကျန်းမာရေးကောင်းမွန်ကြောင်း ဒေါက်တာဘစိုးသက် ကပြောသည်။
ထိုင်းနိုင်ငံမှ တရားမဝင်ရောက်ရှိလာသူ ၄၀ ကျော်ရှိပြီး ၄င်းတို့အား အမှတ် ၁ အချုပ်ခန်းတွင် ထားရှိကြောင်းသိရသည်။
“ ထိုင်းနိုင်ငံကနေ ဝင်ရောက်လာသူက တော့ ဒီနေ့က ၂ယောက်ထပ်တွေ့တယ်။ မနေ့ကလည်း ၂ယောက်တွေ့တယ်။ အမျိုးသမီးတွေဘဲ” ဟု ဒေါက်တာဘစိုးသက် ကပြောသည်။
သျှမ်းပြည်အရှေ့ပိုင်းတာချီလိတ်မြို့သည် ယနေ့ ဒီဇင်ဘာ ၁၀ ရက်နေ့လည်ပိုင်းအချိန်ထိတွင် ကိုဗစ် ၁၉ ပိုးတွေ့လူနာ ၉၃ ဦးရှိပြီး ဆေးရုံဆင်းလူနာ ၂၂ ဦးရှိကြောင်းသိရသည်။
