Saturday, July 20, 2024

လားရှိုးမြို့နယ် ကျေးလက်ဒေသလူငယ်များစွမ်းရည်မြင့်တင်ရေးသင်တန်းပြုလုပ်

Must read

သျှမ်းပြည်မြောက်ပိုင်း လားရှိုးမြို့နယ် မိုင်းယော်တိုက်နယ်တွင် ဒေသတွင်းလူငယ်ထု ဖွံ့ဖြိုးတိုးတက်ရေးအတွက်ရည်ရွယ်ကာ နိုင်ငံရေးပါတီ၊ လူမှုအခြေပြုအဖွဲ့အစည်းတို့ ပူးပေါင်းပြီး ၃ ရက်သင်တန်းဖွင့်လှစ်ပေးခဲ့ကြောင်းသိရသည်။

လူငယ်များစွမ်းရည်မြင့်တင်ရေးသင်တန်းတွင် မိုင်းယော်လူငယ်များအား လားရှိုးခရိုင် အမျိုးသားလွှတ်တော်ကိုယ်စားလှယ်မှ သင်တန်းပေးနေစဉ်

သင်တန်းအား မေလ ၁၆ ရက်နေ့မှ ၁၈ ရက်နေ့အထိ ၃ ရက်တာ လူငယ်စွမ်းရည်မြင့်တင်ရေးသင်တန်းနှင့် လူ့အခွင့်အရေးဆိုင်ရာဗဟုသုတမျှဝေရေးသင်တန်းအား မိုင်းယော်တိုက်နယ်ရှိ သျှမ်းတိုင်းရင်းသားများဒီမိုကရေစီအဖွဲ့ချုပ်၊ သျှမ်းလူငယ်ကွန်ယက် Tai Youth Network နှင့် သျှမ်းပြည် လူငယ် စွမ်းရည်မြင့်တင်ရေးအဖွဲ့ SSYCBC တို့ပူးပေါင်းကာ မိုင်းယော်တိုက်နယ် အခြေခံပညာမူလတန်းကျောင်းတွင် ပြုလုပ်ခဲ့သည်။

မိုင်းယော်တိုက်နယ် သျှမ်းလူငယ်ကွန်ယက်အဖွဲ့ဝင်စိုင်းကောင်က – ကျနော်တို့ ၃ ဖွဲ့ပေါင်းပြီးသင်တန်းပေးပါတယ်။ လာတက်တဲ့လူငယ် ၈၃ ဦးရှိပါတယ်။ ဒေသတွင်းလူငယ်တွေစွမ်းရည်မြင့်လာအောင်၊ သတင်းအချက်အလက်စုဆောင်းတတ်အောင်၊ အဖွဲ့အစည်းတွေနဲ့ဆက်သွယ်လက်တွဲဆောင်ရွက်တတ်အောင်၊ လူ့အခွင့်အရေးနဲ့ပတ်သက်တာတွေသိရှိလာအောင် စတဲ့အချက်တွေအပြင်တခြားသောဗဟုသုတတွေပါ ထည့်သွင်းသင်ကြားပေးပါတယ်- ဟု သျှမ်းသံတော်ဆင့်အားပြောသည်။

ထို့အပြင် မျှတမှုရရှိရေးအတွက် သတင်းမီဒီယာများနှင့်ဆက်သွယ်ရေး၊ လူငယ်အဖွဲ့အစည်း ဖွဲ့စည်းရေး၊ လယ်သမားများအခွင့်အရေးအတွက် လှုပ်ရှားဆောင်ရွက်ရေး အစရှိအချက်များလည်း ပူးတွဲသင်ကြားပေးသည်ဟုသိရသည်။
မိုင်းယော်လူငယ် နန်းဟွမ်ငင်းက – အရင်က ကျမတို့ဒီလိုမျိုးသင်တန်းမတက်ဖူးတော့ ကျမတို့ရွာသားတွေအပေါ်လူ့အခွင့်အရေးချိုးဖောက်တာတွေဘာတွေဖြစ်လာရင် ကျမတို့ ပြန်မတုန့်ပြန်တတ်ဘူး။ အခုလို သင်တန်းတက်ရတော့ အရေးအကြောင်းပေါ်လာရင် ဘယ်လိုဖြေရှင်းရမလဲဆိုတာလေးတွေသိလာတယ်။ အခွင့်အရေးချိုးဖောက်ခံရရင်ဘယ်လိုသတင်းယူရမလဲ။ မီဒီယာတွေကိုဘယ်လိုသတင်းပေးပို့ရမလဲစတာတွေကျမတို့သိရပါတယ်- ဟု ပြောသည်။

အဆိုပါသင်တန်းတွင် တက်ရောက်လေ့လာသူ လူငယ် ၈၃ ဦးရှိပြီး မိုင်းယော်တိုက်နယ်အတွင်းရှိ မိုင်းယန်းအုပ်စု၊ မိုင်းကျက်အုပ်စု၊ မိုင်းဟက်အုပ်စု၊ ပန်ထိုလင်အုပ်စုတို့မှ လူငယ်များဖြစ်ကြသည်။

မိုင်းယော်တိုက်နယ်သည် လားရှိုးမြို့အရှေ့မြေက်ဘက် ၃၂ မိုင်အကွာတွင်တည်ရှိပါသည်။

၂၀၁၆ ခုနှစ် ဂျွန်လ ၃၀ ရက်နေ့ကလည်း မိုင်းယော်ဒေသခံရွာသား ၅ ဦးအား အစိုးရစစ်ကြောင်းက ဖမ်းဆီးသတ်ဖြတ် ခဲ့သည်။

Leave a Comments

- Advertisement -spot_img

Latest article