သျှမ်းရှေ့တာချီလိတ်တွင် ကိုဗစ်-၁၉ ကူးစက်မှုနှုန်း မြင့်တက်လာသည့်အတွက် ဒေသခံများ စိုးရိမ်မှုရှိကာ အရောင်းအဝယ်ကျဆင်းမှုရှိနေကြောင်း တာချီလိတ်ဒေသခံများ ၏ ပြောပြချက်အရသိရသည်။
လက်ရှိ နိုဝင်ဘာ ၃၀ နေ့လည်ပိုင်းအချိန်ထိ တာချီလိတ်တွင် ကိုဗစ်-၁၉ အတည်ပြုလူနာ (၃၄)ဦး ဆေးရုံတွင် ဆေးကုသခံနေကြောင်း စုံစမ်းသိရသည်။
ထို့ကြောင့် တာချီလိတ်တွင် ကိုဗစ်-၁၉ နေ့စဉ်ဆက်တိုက် ကူးစက်မှုကြောင့် တာချီလိတ်မြို့နယ် မိုင်းဖုန်းကျေးရွာ အုပ်စုကို Lockdown ပြုလုပ်ထားပြီး၊ တာချီလိတ်မြို့ပေါ်တွင် နေထိုင်သူများမဟုတ်ပါက ထောက်ခံစာဖြင့် ဝင်၊ထွက်ရမည်ဟုလည်း သက်ဆိုင်ရာ အာဏာပိုင်များက ကြေညာချက်ထုတ်ခဲ့သည်။
“အတည်ပြု လူနာက မိုင်းဖုန်းကနေစပြီးတော့ ဖြစ်လာတယ်။ အခုတော့ တာချီလိတ်က သူတွေလည်း အပြင်မထွက်ရဲကြတော့ဘူး။ အရောင်းအဝယ်လည်းတွေလည်း ကျဆင်းကုန်တယ်” တာချီလိတ်ဒေသခံ စိုင်းကျောက် က သျှမ်းသံတော်ဆင့် ကိုပြောသည်။
တာချီလိတ်မြို့သည် မြန်မာ – ထိုင်း နှစ်နိုင်ငံ အရောင်းအဝယ် နယ်စပ်ဖြစ်ပြီး အချက်အချာကျသည့် မြို့လည်း ဖြစ်သည်။
“တာချီ်လိတ်မှာ လူ တအားပါးသွားပြီး ဘယ်မှ မထွက်ရဲကြတော့ဘူး။ အရောင်းအဝယ်ရှိပေမယ့် အရင်လိုတော့ မဟုတ်တော့ဘူး”ဟု ကုန်စုံဆိုင်ဖွင့်ထားသည့် ဒေသခံ နန်းဟွမ် က ပြောသည်။
လက်ရှိအခြေအနေ တာချီလိတ်မြို့မှ တခြားမြို့သို့သွားလာခွင့်မပြုထားကြောင်း၊ တာချီလိတ်မှ တခြားသို့ သွားမည်ဆိုပါက Quarantine ၁၄ရက်ဝင်ရမည်ဖြစ်သကဲ့သို့ တာချီလိတ်မြို့ လာမည်သူများလည်း Quarantine ဝင်ရမည်ဖြစ်ကြောင်းလည်း ဒေသခံများပြောပြသည်။
“ အခု တာချီလိတ်မြို့မှာတာ့ မနေ့ညကစပြီးတိတ်ဆိတ်ကုန်ပြီ၊ ကုန်စုံဆိုင်တွေလည်း အားလုံးနီးပါး ပိတ်ကုန်ပြီ၊ သက်ဆိုင်ရာ ကျေးရွာ၊ ရပ်ကွက် အလိုက် ကိုယ့်နဲ့ ကိုက်ညီတဲ့ Lockdown လုပ်လို့ရပါတယ်” ဟု တာချီလိတ် မြို့ မှ ရှမ်းတိုင်းရင်းသားများ ဒီမိုကရေစီ အဖွဲ့ချုပ်(SNLD) ဥက္ကဌ စိုင်းနွံတွီ က သျှမ်းသံတော်ဆင့် က ပြောသည်။
နိုဝင်ဘာ (၂၉) ရက်နေ့က မိုင်းဖုန်း (က) ကျေးရွာအုပ်စုတွင် ကိုဗစ်-၁၉ အတည်ပြု လူနာ (၆) ဦး ရှိသည့်အတွက် ကျေးရွာအုပ်စုအတွင်း တစ်ရွာနှင့် တစ်ရွာ သွားလာမှု မရှိစေရန် နိုဝင်ဘာ (၂၉ ) ရက်နေ့ ညပိုင်းမှ စပြီး Lockdown သတ်မှတ်ထားလိုက်သည်။
နိုဝင်ဘာ (၂၉ ) ရက် ည (၈) နာရီချိန်ထိ မြန်မာနိုင်ငံတွင် ကိုဗစ်-၁၉ အတည်ပြု လူနာ (၈၉၄၈၆) ဦး၊ ဆေးရုံဆင်းသူ (၆၈၉ ၁၀)ဦး၊ သေဆုံးသူ (၁၉ ၁၈) ဦး ရှိကြောင်း ကျန်းမာရေး နှင့် အားကစား ဝန်ကြီး ဌာနက ထုတ်ပြန်ထားသည်။