သျှမ်းပြည် အရှေ့ပိုင်းတာချီလိတ်တွင် ယနေ့ (နိုဝင်ဘာ ၂၉ )ရက် တရက်တည်း ကိုဗစ်-၁၉ လူနာသစ် (၁၀) ဦးတိုးလာကြောင်း စုံစမ်းသိရသည်။
ယနေ့ တွေ့ရှိသည့် ကိုဗစ်-၁၉ လူနာသစ် (၁၀)ဦးသည် တာချီလိတ်အတည်ပြုလူနာအမျိုးသမီးနှင့်ဆက်စပ်သည့် သူများဖြစ်ပြီး၊ထိုထဲတွင် အမျိုးသား(၇)ဦး နှင့်အမျိုးသမီး (၃)ဦးတို့ဖြစ်ကြောင်း သိရသည်။
“ ဒီနေ့ တရက်တည်း ကိုဗစ်လူနာ(၁၀)ဦးတွေ့ပါတယ်။ မိမိနေအိမ်ထဲမှာပဲ နေပေးဖို့ ၊ မလိုအပ်ဘဲ အပြင်မထွက်ဖို့၊ ကျန်းမာရေး ထုတ်ပြန်ချက်ကို သေချာ လိုက်နာဖို့လိုပါတယ်” ဟု သျှမ်းပြည် အရှေ့ပိုင်း ကျန်းမာရေး ဦးစီးဌာန လက်ထောက်ညွှန်ကြားရေးမှူး (တိုးချဲ့ ကာကွယ်ဆေး၊ ကူးစက်) ဒေါက်တာ လင်းထွဋ်ဦး က သျှမ်းသံတော်ဆင့်ကို ပြောသည်။
တာချီလိတ်တွင် လက်ရှိ အချိန်ထိ ဆေးကုသနေသည့် ကိုဗစ်-၁၉ လူနာ (၂၂)ဦးရှိကြောင်း သိရသည်။
တာချီလိတ်တွင် ကိုဗစ်-၁၉ အတည်ပြုလူနာ တိုးလာသည့်အတွက် ဆေးကုသဆောင် တိုးချဲ့ပြင်ဆင်သွားမည်ဖြစ်ပြီး၊ တာချီလိတ်မြို့တွင်းနေသူများမှ လွှဲပြီး ကျန်မြို့နယ်မှ လာသူများ ဝင်၊ထွက် အထောက်အထားလက်မှတ်များ ထုတ်ပေးသွားမည် ဖြစ်ကြောင်းသိရသည်။
Leave a Comments