ကျောက်မဲမြို့နယ် ရွေး/ကော် ဥက္ကဌ နေအိမ် သေနတ်ပစ်ခံရ

0

သျှမ်းပြည်မြောက်ပိုင်း ကျောက်မဲမြို့နယ် ရွေးကောက်ပွဲကော်မရှင် ဥက္ကဌ နေအိမ်ကို ယမန်နေ့ (နိုဝင်ဘာ ၁၄)ရက် ည၁၁နာရီကျော်တွင်း သေနတ် ၂ချက်ပစ်ခံရကြောင်းစုံစမ်းသိရသည်။

ကျောက်မဲမြို့နယ် ရွးကောက်ပွဲ ကော်မရှင် ဥက္ကဌ နေအိမ်ကို အမည်မသိလက်နက်ကိုင် အဖွဲ့က ယမန် ည အိပ်ပျော်နချိန်တွင် သေနတ်ဖြင့် ၂ချက် လာပစ်ခဲ့ကြောင်း၊ ထိုသေနတ်ပစ်ခတ်မှုကြောင့် နေအိမ် ပြတင်းပေါက် အနည်းငယ်ပျက်စီးသွားကြောင်း ကျောက်မဲမြို့နယ် ရွေးကောက်ပွဲ ကော်မရှင် ဥက္ကဌ ဦးစိုးထွန်း က သျှမ်းသံတော်ဆင့်ကို ပြောသည်။

“ ည ၁၁နာရီခွဲလောက်လာပြီး ပစ်ကြတယ်။ ၂ချက်လောက်ပါပဲ။ အိမ်က မီးတွေဖွင့်ထာတးယ်။ မီးများ ဖြစ်သလားဆိုပြီးထင်နေတာ။ ကျနော် အမျိုးသမီး က သေနတ်ပစ်သံဆိုပြီးပြောတယ်။ အိမ်ပြင်သွားကြည့်တော့ ဘာမှ မမြင်ရဘူး။ ဒီမနက်မှာ လိုက်ရှာမှ ကျနော်အိမ်ဖြစ်နေတာ” ဟု ဦးစိုးထွန်း ကဆိုသည်။

အဆိုပါ နေအိမ်ကို သေနတ်ဖြင့်လာရောက်ပစ်ခတ်မှုသည် ရွေးကောက်ပွဲ နှင့် ပတ်သက် ချိတ်ဆက်နိုင်ကြောင်း၊ ရွေးကောက်ပွဲရလဒ်သည် မြို့နယ် ရွေးကောက်ပွဲ ကော်မရှင် မှ လုပ်ပိုင်ခွင့်မရှိကြောင်း မဲရုံ မှ တက်လာသည့် ရလဒ် အဖြေကိုသာ စိစစ်ရကြောင်းလည်း ဦးစိုးထွန်းက ပြောသည်။

“ ကျနော်လောဆယ် တော့ စီးပွားရေးနားနေချိန်ဖြစ်တယ်။ လောဆယ်ရွေးကောက်ပွဲကို အာရုံစိုက်ပြီးလုပ်နေတာလေ။ ဖြစ်ရင်လည်း ရွေးကောက်ပွဲနဲ့ ပတ်သက်ပြီးဖြစ်မယ်” ဟု ဦးစိုးထွန်းက သုံးသပ်ပြောသည်။

ရွေးကောက်ပွဲပြီးနောက်တွင် တစုံတဦးမှ လာရောက်ခြိမ်းခြောက်မှုမရှိကြောင်း၊ ရလဒ်ဖြင့် ပြောဆိုမှုလည်းမရှိကြောင်း၊ သို့သော် ကျောက်မဲ တချို့ ကျေးရွာ ရွေးကောက်ပွဲ မကျင်းပနိုင်သည့်ကိစ္စနှင့် ပတ်သက်ပြီး နားလည်မှု လွှဲမှားနေမှုလည်း ဖြစ်နိုင်ကြောင်း ဦးစိုးထွန်းက ထပ်လောင်းပြောသည်။

ကျောက်မဲမြို့နယ် ရွေးကောက်ပွဲ ကော်မရှင် ဥက္ကဌ နေအိမ်ကို လာရောက်ပစ်ခတ်သည့် ကျည်ဆံထိပ်ဖူးကို တွေ့ရှိကာ ကျောက်မဲမြို့မ ရဲစခန်းက လာရောက်ပစ်ခတ်သည့် အဖွဲ့ကို စုံစမ်းစစ်ဆေးနေကြောင်းသိရသည်။

ထို သေနတ်လာရောက်ပစ်ခတ်သည့် ကျည်သည် နိုဝင်ဘာ ၁၄ရက် ကျောက်မဲခရိုင် အမျိုးသားလွှတ်တော် ကိုယ်စားလှယ်လောင်း (အမျိုးသား ဒီမိုကရေစီ အဖွဲ့ချုပ် (NLD)ကိုယ်စားပြု အနိုင်ရရှိကြောင်း ကြေညာပြီးနောက် လာရောက်ပစ်ခတ်ခဲ့ကြောင်း သိရသည်။

ကျောက်မဲမြို့နယ် ရွေးကောက်ပွဲ ကော်မရှင် ဥက္ကဌ ဦးစိုးထွန်းသည် အမျိုးသားဒီမိုကရေစီအဖွဲ့ချုပ် ( NLD) နောင်ချိုတွင် ပြည်သူ့လွှတ်တော် ကိုယ်စားလှယ် အနိုင်ရရှိသူ၊ လက်ရှိ ပြည်သူ့လွှတ်တော် ဒုဥက္ကဌ ဦးထွန်းထွန်းဟိန် ၏ အကို တော်စပ်သူဖြစ်ကြောင်းသိရသည်။

Leave a Comments

SHARE