သျှမ်းပြည် မြောက်ပိုင်း ကျောက်မဲမြို့နယ် အတွင်း မဲဆန္ဒရှင် တဦး ကိုဗစ်-၁၉ တွေ့ရှိသဖြင့် မဲရုံမှူးနှင့် အကူ ၄၀ ဦး Quarantine ဝင်နေရကြောင်း သတင်းရရှိသည်။
နိုဝင်ဘာ ၈ရက် ရွေးကောက်ပွဲနေ့တွင် ကျောက်မဲမြို့နယ် နောင်ပိန်ကျေးရွာသို့ မဲသွားရောက်ပေးသည့် ကားသမားတဦးထံ ကိုဗစ်-၁၉ တွေ့ရှိသဖြင့် မဲရုံမှူး နှင့်အကူ တာဝန်ယူသူ စုစုပေါင်း (၄၀) Quarantine ဝင်နေရကြောင်း လက်ရှိ ကျောက်မဲမြို့နယ် ပြည်သူ့လွှတ်တော် ကိုယ်စားလှယ်နေရာတွင် မဲအများဆုံးရနေသည့် စိုင်းအောင်မြင့် က သျှမ်းသံတော်ဆင့်ကို ပြောသည်။
“ မဲကို နေ့လည်ပိုင်း လူသိပ်မရှိတဲ့အချိန်မှာလာထည့်တယ်။ အပြန်မှာ နောင်ချိုဘက်မှာရှိတဲ့ ကိုဗစ်-၁၉ စစ်ဆေးရေးဂိတ်မှာ ကားသမားဆိုတော့ စစ်လိုက်တာ။ ကိုဗစ်-၁၉ ရှိနေတယ်။ အခု နောင်ချိုဆေးရုံမှာ။ မဲရုံမှူးနဲ့ အကူတွေ ၄၀ကိုတော့ Quarantine ဝင်နေရတယ်” ဟု စိုင်းအောင်မြင့် က ဆိုသည်။
အဆိုပါ ကားသမားလာပေးသည့် နောင်ပိန် မဲရုံ (၁)တွင် မဲဆန္ဒရှင် (၁၀၀၀)ကျော်လာရောက်ပေးရပြီး၊ ကားသမားလာချိန်တွင် လူအနည်းငယ်သာရှိကြောင်းလည်း စိုင်းအောင်မြင့် က ပြောပြသည်။
လက်ရှိမဲရုံမှူး နှင့် အကူ (၄၀)ကို ကျောက်မဲ Quarantine တွင်ထားပြီး၊ ၃ရက်ပြည့်ပါက ကိုဗစ်-၁၉ ရှိ၊မရှိ စစ်ဆေးကာ၊ ကိုဗစ်-၁၉ မရှိပါက Home Quarantin ပြန်ဝင်ရမည်ဟု သိရသည်။
Leave a Comments