သျှမ်းပြည်တောင်ပိုင်း လွိုင်လင်မြို့နယ်အတွင်း ယာမြေနှင့်ပတ်သက်ပြီး လယ်သမားများနှင့် နမ့်စန် အခြေစိုက် “ မကျိုင်း ” ပြည်သူ့စစ်တို့အချေအတင် အငြင်းပွါးကြရာ ပြည်သူ့စစ်မှ သေနတ်ပစ်ခြိမ်းခြောက်မှုများရှိသည် အထိဖြစ်ရ ကြောင်းသိရသည်။

သျှမ်းပြည်နယ် တောင်ပိုင်း လွိုင်လင်မြို့နယ် တောင်နောက်ကျေးရွာ အုပ်စု ဆိုင်းငွန်းကျေးရွာနှင့် နမ့်ပွန်း ကျေး ရွာ ကြားရှိ မြေနေရာဧက ၄၀၀ ကျော်တွင်စိုက်ပျိုးရေးလုပ်ရန် ခြုံနွယ်ပေါင်းမြက် ရှင်းလင်း နေသောရွာသားတချို့နှင့် နမ့်စန်မြို့နယ် မကျိုင်းပြည်သူ့စစ်တပ်ဖွဲ့မှ တာဝန်ရှိသူတချို့ကြား မေလ ၁၄ ရက်နေ့ ၁၀ နာရီခန့်က အချေအတင် စကားများ ခဲ့ကြသည်။

ထိုသို့စကားများကြရာမှ ကျေးရွာ ဒုဥက္ကဌ နှင့် အသက် ၁၈နှစ်အရွယ် အမျိုးသားကို ပြည်သူ့စစ်တပ်ဖွဲ့က သေနတ်ပစ်ခတ် ခြိမ်းခြောက်ခဲ့ကြောင်း ဆိုင်းငွန်းကျေးရွာ မှ တောင်သူ ဦးမြင့်အောင် က ပြောသည်။

“ ကျနော်တို့ ရွာက ဒုဥက္ကဌ နဲ့ရွာသားကို ခြေထောက်နဲ့ကန်၊ လက်သီးနဲ့ထိုးတယ်။ ဒုဥက္ကဌကတော့ မူးသွားတယ်။ ဒဏ်ရာတော့ သိပ်မရဘူး။ နောက် ပြီး သေနတ်နဲ့ချိန် လူကို ပစ်တယ်။ သေနတ် ဆယ်ချက်လောက်ပစ်တယ်။ နားရွက်နဲ့ကပ်လွှဲသွားတာ။ နှလုံးရောဂါ ရှိ ရင် သေနိုင်တယ်။ ” ဟု လုံးမြင့်အောင် က ဆိုသည်။

အဆိုပါ ယာမြေသည် ဧက ၄၀၀ ကျော်ရှိပြီး၊ ယင်း လယ်ယာပေါ် ဆိုင်ငွန်းကျေးရွာမှ တောင်သူများ ယခင်က လယ်ယာ စိုက်ပျိုးလုပ်ကိုင်စားသောက်ခဲ့ဖူးကြောင်း ၊ သက်ဆိုင်ရာအာဏာပိုင်များထံ ပုံစံ (၇) လျှောက်ရန် တောင်းဆိုသော်လည်း မြေလွှတ်မြေရိုင်း ဟု ပြောဆိုကာ မပြုလုပ်ပေးခဲ့ကြောင်း ရွာသားများကပြောသည်။

“ ဒီလယ်ပေါ်မှာ ကျနော်တို့တောင်ယာတွေ စပါးခြံတွေ၊ ရွာပိုင်သစ်တောတွေရှိတယ်။ ဘိုးဘွားစဉ်ဆက်ကတည်းက ထိန်းသိမ်းခဲ့တာ။ အခု ကျနော်တို့ လုပ်ပိုင်ခွင့်မရှိတော့ဘူး။ မတ်ကျန်း ပြည်သူ့စစ်ကိုတော့ ပုံစံ(၇) ထုတ်ပေးထားတယ်။ ဒါကြောင့်ကျနော်တို့စိုက်ပျိုးဖို့ ခြုံနွယ်ပေါင်းမြက်တွေလာရှင်းတာ ” ဟု ဆိုင်းငွန်းကျေးရွာ မှ ဒေသခံ တဦးက ထပ်လောင်းပြောသည်။

၄င်းနှင့်ပတ်သက်ပြီး မကျိုင်းပြည်သူ့စစ် ဒုဥက္ကဌ စိုင်းဆိုင်လျန်းက မူ ရွာသားများ လက်ခံဆွေးနွေးခြင်းမရှိသဖြင့် ၂ ဘက်ကြား အချေအတင်စကားများကြကြောင်း သျှမ်းသံတော်ဆင့်အားရှင်းပြသည်။

ဒီမြေမှာသူတို့ဘိုးဘွားခေတ်တုန်းက လုပ်စားဖူးတယ်လို့သူတို့ပြောတယ်။ မြေလွှတ်မြေရိုင်းနေရာကို မြေထိုးစက်နဲ့လာထိုးပြီးရှင်းလင်းတယ်။ ဒီမြေနေရာမှာ သစ်ပင်စိုက်ဖို့အတွက်ကျနော်တို့လည်း ပုံစံ ရ တောင်းထားတယ်လေ။ ဆိုတော့အဲဒီလို ပြသနာရှိနေတုန်းမို့ မြေမရှင်းလင်းသေးနဲ့ ခဏစောင့်ကြည့်ပါဦးလို့ ကျနော်တို့အဖွဲ့က သွားပြောတာကို သူတို့နားမထောင်ဘူး။ ဆွေးနွေးရေးကိုလက်မခံဘူး ။ အုပ်စုလိုက်ကျနော်တို့ဆီကိုပြေးဝင်လာတယ်။ တချို့က ဓါးတွေနဲ့ဆိုတော့ ရပ်တန့်စေဖို့အတွက် ကျနော်တို့သေနတ်ကိုမိုးပေါ် ထောင်ပစ်ပြီး ခြိမ်းခြောက်ရတာဖြစ်ပါတယ်။- ဟု ရှင်းပြသည်။

အဆိုပါမြေလွှတ်မြေရိုင်းနေရာတွင် သဘာဝပတ်ဝန်းကျင်ထိန်းသိမ်းရေးအတွက် အရိပ်ရပင်ပေါင်း ၁ သိန်း စိုက်ပျိုးရန် ပြည်သူ့စစ်တပ်ဖွဲ့ဘက်က စီစဉ်နေကြောင်း ပြောဆိုသည်။

“ကျနော်တို့လာနေတုန်းက ဒီမြေမှာ ဘယ်သူမှ မစိုက်ပျိုးဘူး။ ဒီမြေနဲ့ပတ်သက်ပြီး SNPLO နဲ့လည်း အခင်းဖြစ်ပွါးဖူးတယ်။ အဲ့တုန်းက တောင်သူတွေလည်း တောင်တက်ပြီး တောင်ပေါ်စိုက်ခင်းဘဲလုပ်တယ်။ အခုတောင်ပေါ်မှာအလုပ်မဖြစ်တော့မှ ဒီမြေဟာသူတို့မြေပါဆိုပြီး လာပြောကြတာ ”- ဟုလည်း ပြောသည်။

၄င်းမြေလွှတ်မြေရိုင်းနေရာနှင့်ပတ်သက်ပြီး ဒေသခံလူထုကလည်း သတင်းထောက်များအားဖိတ်ကြားကာ မေလ ၁၀ ရက်နေ့က လွိုင်လင်မြို့တွင်သတင်းစာရှင်းလင်းပွဲတရပ်ပြုလုပ်ခဲ့သည်။ ဆိုင်းငွန်းကျေးရွာ နေတောင်သူ (၁၉) ဦးပိုင်မြေနေရာဖြစ်ပြီး နှစ်စဉ်တောင်ယာစပါးနှင့် နှမ်းများစိုက် ပျိုးထုတ်လုပ် အသက်မွေးဝမ်း ကျောင်းပြုလျှက်ရှိသည့်မြေဖြစ်ကြောင်း တောင်သူဦးကြီးများကပြောသည်။

အဆိုပါမြေနေရာသည် လွိုင်လင်ခရိုင် ၊ တောင်နောက်ကျေးရွာအုပ်စု ၊ ဆိုင်ငင်းကျေးရွာ အရှေ့ ဘက်် ၊ နမ့်ပွန်းကျေးရွာ ဘုန်းကြီးကျောင်းကုန်းမြေ၏ တောင်ဘက်တွင်တည်ရှိပါသည်။