မူးယစ်ဆေးဝါးရောင်းဝယ်မှုနှင့်ပတ်သက်၍ သတင်းအချက်အလက်ပေး တိုင်တန်းရန် ပြည်သူများအယုံအကြည်မရှိဟု Justice Drum လူမှုအဖွဲ့အစည်းကွန်ရက်မှ ထုတ်ဖော်ရှင်းလင်းသည် ။

တောင်ကြီးမြို့နယ် ၊ ကလောမြို့နယ် ၊ ဟိုပုံးမြို့နယ် များတွင်းတစ်နှစ်သာ မူးယစ်ဆေးဝါးလျှော့ချရေး လုပ်ငန်းတွေ့ရှိချက်များကိုချပြရှင်းလင်းသည့် ဆွေးနွေးပွဲ ကို Justice Drum အဖွဲ့မှ မေလ (၁၁) ရက်နေ့က တောင်ကြီးမြို့ ၊ ကန်ရှေ့ရပ် ၊ မင်းကံကောင်း စားသောက်ဆိုင်တွင် ကျင်းပခဲ့သည် ။

မူးယစ်ဆေးဝါးနှင့် ပတ်သက်၍ ပြည်သူများ သတင်းပေးရာတွင် သတင်းပေး သူကို သတင်းယူသူမှ ကြိုသိနေခြင်း ၊ သတင်းပေး သူအားလျှို့ ၀ှက်ပေး ရန်ကိစ္စမှာ မူအရ သာရှိနေခြင်းတို့ကြောင့် ပြည်သူများ အနေဖြင့် သတင်းပေးရန်အယုံ အကြည်မရှိကြောင်းရှင်းလင်း ဆွေးနွေးခဲ့သည် ။

“ လူထုကတော့ မူးယစ်ဆေးဝါးဆန့်ကျင်ရေးတွေနဲ့ပတ်သက်လို့ အားပေး ကြိုဆို ကြပေမဲ့ ပူးပေါင်းဆောင်ရွက်မှုအားနည်း နေတာတွေ့ရတယ်။ လူငယ် တော်တော်များများက မူးယစ်ဆေးစွဲနေကြတယ် ၊ တော်တော် များများက သုံးစွဲဖူးတဲ့လူတွေများနေကြတယ် ၊ ပေါပေါများများ လည်းရ နေကြတယ် ၊ ဒါပေမဲ့ဒီကိစ္စတွေကို ရပ်ရွာနေလူထုတွေက မဆန့် ကျင် ရဲကြဘူး ၊ ရောင်း နေတာလဲသိတယ် သတင်းပေးတဲ့အခါမှာလဲ မလုံခြံု တာတွေ သွားတွေ့ တော့ ပူးပေါင်းဆောင်ရွက်မှုမလုပ်ချင်ကြဘူး ” ဟု Justice Drum အဖွဲ့မှ ဒါရိုက်တာ ဦးအောင်ဇေ ကပြောသည် ။

တောင်ကြီးမြို့ပေါ်တွင် ၈၀% နှုန်းသောအမှုမှာ လူငယ်များ နှင့် မူးယစ် ဆေးဝါးဖြစ်ပြီး၊ တောင်လေးလုံး အကျဉ်းထောင်တွင်လည်းဆေးမှုနှင့် ပတ်သက်သည့် လူငယ် များရာခိုင်နှုန်း အများဆုံးဆိုတာတွေ့ရှိရကြောင်း ၄င်းထံမှ ဆက်လက်သိရသည် ။

လူငယ်များအား မူးယစ်ဆေးဝါး ဆိုင်ရာ အသိပညာပေးရာတွင် နည်းစနစ် ဟောင်း အရအောင်မြင်မှုအလွန်နည်းပါးသဖြင့် Update ဖြစ်သည့် နည်း လမ်းများသုံးရန် အစိုးရအားအကြံပြုပြောဆိုဖူးသည်ဟု သျှမ်းပြည်နယ် ၊ တောင်ပိုင်း မြန်မာနိုင်ငံ မူးယစ်ဆေးဝါးဆန့်ကျင်ရေးအသင်း (မာနာ)၏ အတွင်းရေးမှူး နန်းမိုမိုသီတာကပြောသည် ။

“ (မာနာ) အသင်းရဲ့ အဓိကလုပ်ဆောင်ချက်က မူးယစ်ဆေးဝါး မှာ ၀ယ်လိုအားလျော့ချရေးကိုအဓိကလုပ်ဆောင်တာ ဆိုတော့ ဟော ပြောပွဲတွေလိုက်လုပ်တယ်ပေါ့၊ အဲ့ဒီဟောပြောပွဲ တွေလုပ် တဲ့ခါမှာလဲ အမှန်အတိုင်းပြောရင်တော့ အောင်မြင်မှုရာခိုင်နှုန်း နည်းပါတယ် ၊ ဒီလောက်ပြောနေဟောနေတာပဲ သုံးစွဲတဲ့သူလဲ များနေတာပဲ ။ လူငယ်တွေကို မူးယစ်ဆေးဝါး အသိပညာပေးတဲ့ခါမှာ Update ဖြစ်တဲ့ နည်းလမ်းနဲ့ပေးဖို့တော့လိုလိမ့်မယ်” ဟု ၄င်းကဆက်လက်ပြောသည် ။

ပြီးခဲ့သည့် ၁၁ ရက်နေ့ကလည်း သျှမ်းပြည်မြောက်ပိုင်း လားရှိုးမြို့တွင် မူးယစ်ဆေးဝါးနှင့်လူငယ် ခေါင်းစဉ်ဖြင့် စကားဝိုင်းပြုလုပ်ရာတွင် – မူးယစ်ဆေးဝါးတားဆီးနှိမ်နင်းရေးတွင် လူပုဂ္ဂိုလ်တစ်ဦးတစ်ယောက်၊ အဖွဲ့အစည်းတစ်ခုတည်း လုပ်ဆောင်၍မရကြောင်းနှင့် ပြည်သူများ ပူးပေါင်းပါဝင်ဆောင်ရွက်ရန်လိုအပ်ကြောင်း ထည့်သွင်းဆွေးနွေးသွားခဲ့ပါသည်။

“ အဓိက ကတော့မူးယစ်ဆေးဝါးတွေဒီလောက်ပျံ့နှံ့တာ လက်နက်ကိုင် ပဋိပက္ခနဲ့ တဝက်တပျက်ငြိမ်းချမ်းရေးကြောင့်ပဲ တကယ့် ငြိမ်းချမ်းရေး ရ အောင်ဖော်ဆောင်နိုင်တယ်ဆိုရင် ဒီမူးယစ်ဆေးဝါးနဲ့ ဆက်စပ်တဲ့ပစ္စည်း တွေက နိုင်ငံခြားကလာတာ ၊ နိုင်ငံခြားမှာ တရားဝင် အပေါက်ရှိသလို တရား မဝင်အပေါက်လည်းရှိတယ် စစ်မှန်သောငြိမ်းချမ်းရေး ရရှိပြီးရင် နယ်စပ်ဂိတ် တွေကို သေချာကိုင်တွယ်မယ်ဆိုရင် လျော့ချနိုင်မယ်လို့ ထင်တယ် ” ဟု ဦးအောင်ဇေက ဆက်လက်ပြောကြားသွားသည် ။

သျှမ်းပြည်တွင် ဘိန်းစိုက်ခင်းများလျော့သွားသည်ဟု ကုလသမဂ္ဂ မူးယစ်ဆေးဝါး ထိန်းချုပ်ရေး ရုံး (UNODC) ၏ ကမ္ဘာ့ မူးယစ်ဆေးဝါး အစီရင်ခံစာ တွင်ဖော်ပြထားသော်လည်း မြန်မာ နိုင်ငံ တွင် အသက် ၁၂ နှစ်အရွယ်ကလေးမှအစ မူးယစ်ဆေးဝါး သုံးစွဲနေကြောင်း၊ ကမ္ဘာတွင် အာဖဂန် နစ္စတန် ပြီးရင် မြန်မာနိုင်ငံတွင် တရားမဝင် ဘိန်းစိုက်ပျိုးထုတ်လုပ်မှု ဒုတိယ အများဆုံး နိုင်ငံတခု ဖြစ်ကြောင်း ပါရှိပါသည်။