သျှမ်းပြည် အရှေ့ပိုင်း တာချီလိတ်မြို့ မဲဆန္ဒရှင် (၁၀၀)ဦးသည် သျှမ်းတောင် ဖယ်ခုံမြို့နယ် မဲစာရွက်ဖြင့် မှားယွင်းမဲပေးမှုဖြစ်ပွားခဲ့ကြောင်း စုံစမ်းသိရသည်။
ယနေ့ (နိုဝင်ဘာ ၈)ရက် ကျင်းပသည့် ရွေးကောက်ပွဲတွင် တာချီလိတ်မြို့ မယ်ခေါင်ရပ်ကွက် မဲရုံအမှတ်(၁) တွင် မဲစာရွက်မှားယွင်းမှုရှိ သဖြင့် မဲဆန္ဒရှင်များအား မဲပြန်လာပေး ခွင့်ပြုထားကြောင်း သိရသည်။
“ မယ်ခေါင်ရပ်ကွက် မဲရုံအမှတ်(၁) က မဲဆန္ဒရှင်(၁၀၀)ဦး က ဖယ်ခုံမဲစာရွက်နဲ့မှားတာ။ ကော်မရှင်ကတော့ ၁၀၀ဦးကိုပြန်ခေါ်ပြီး မဲပြန်ပေးခိုင်းမယ်လို့ပြောတယ်။ ည ၇နာရီထိ ပြန်ပေးခိုင်းမယ်လို့ ပြောပါတယ်” ဟု တာချီလိတ်မြို့နယ် ပြည်နယ်မဲဆန္ဒနယ်အမှတ်(၁) လွှတ်တော်ကိုယ်စားလှယ်လောင်း နန်းပင်းတစ် က သျှမ်းသံတော်ဆင့်ကိုပြောသည်။
လက်ရှိ မဲစာရွက်မှားပေးခဲ့သည့် (၁၀၀)ဦးကို ပြန်ခေါ်ပြီး ယနေ့(ည ၇နာရီထိပေးခိုင်းမည်ဟု ပြောဆိုထားကြောင်း၊ သို့သော် မဲဆန္ဒရှင်များ မလာပါက ပယ်မဲဖြစ်သွားမည်ဖြစ်ကြောင်း နန်းပင်းတစ် က ပြောသည်။
“ ဒီပြဿနာက ကျမတို့ ရဲ့ ပါတီရဲ့ လူသွားမပေးမိခဲ့ရင် သိမှာမဟုတ်ဘူး။ ဘယ်နယောက် ပြန်လာမလဲဆိုတာတော့မသိဘူး။ စိုးရိမ်နေရတယ်။ ဒါက ရွေးကောက်ပွဲကော်မရှင်ရဲ့ အားနည်းချက်ပါပဲ” ဟု နန်းပင်းတစ်က ပြောဆိုလိုက်သည်။
