သျှမ်းပြည် အရှေ့ပိုင်း မိုင်းယောင်းမြို့နယ် ဟောင်ကြန့် ကျေးရွာ မဲရုံတွင် တံဆိပ်တုံးအတု ယူဆောင်လာသူ ရှိကြောင်း စုံစမ်းသိရသည်။
တာချီလိတ်ခရိုင် မိုင်းယောင်းမြို့နယ် ဟောင်ကြန့်ကျေးရွာ အတွင်းရှိ အခြေခံပညာအထက်တန်းကျောင်း မဲရုံ (၃)တွင် မဲဆန်ဒရှင် အမျိုးသားတဦးသည် UEC တံဆိပ်မပါသည့် တံဆိပ်တုံးတခုယူဆောင်လာသည်ကို တွေ့ရှိသဖြင့် ၎င်းအမျိုးသားကို ထိန်းသိမ်းစစ်ဆေးနေကြောင်း မိုင်းယောင်းမြို့နယ် ရွေးကောက်ပွဲ ကော်မရှင်ခွဲ ဥက္ကဌ ဦးစံသိန်း က သျှမ်းသံတော်ဆင့်ကိုပြောသည်။
“ ဟုတ်ပါတယ်။ UEC တံဆိပ်မပါတဲ့ တံဆိပ်တုံးအတုယူလာတယ်။ လက်ရှိမှာ မဲရုံမှူးက စစ်ဆေးနေပါတယ်။ ကျန်တာတော့ ဘာမှ ပြောလို့မရသေးဘူး” ဟု ဦးစံသိန်းကပြောသည်။
အဆိုပါ UEC တံဆိပ်တုံးအတု ယူဆောင်လာသည့်သူကို လက်ရှိမှာ မိုင်းယောင်းရဲစခန်းတွင် ထိန်းသိမ်းထားပြီး ရွေးကောက်ပွဲ ပြီးပါက မဲရုံမှူးမှ တရားလို ပြုလုပ်က တရားစွဲဆိုသွားမည် ဖြစ်ကြောင်းသိရသည်။
ပြည်ထောင်စု ရွေးကောက်ပွဲကော်မရှင် ထုတ်ပေးထားသည့် မဲဆန္ဒပြုသည့်တံဆိပ်တုံး နှင့်UEC တံဆိပ်မပါသည့် တံဆိပ်တုံးအတုဖြင့် လဲလှယ်သည့်ဖြစ်စဉ်သည် ကြိုတင်မဲပေးသည့် အချိန်ကာလတွင်ကြုံခဲ့ရသည် ဖြစ်စဉ်ရှိခဲ့ဖူးကြောင်းသိရသည်။
မဲတံဆိပ်တုံးထုရာတွင် UEC စာတမ်းမပါသည့် တံဆိပ်တုံးဖြစ်ပါက ပယ်မဲဖြစ်သွားနိုင်ကြောင်းသိရသည်။