မနက်ဖန် (နိုဝင်ဘာ ၈)ရက် ၂၀၂၀ ခုနှစ် ပါတီစုံ ဒီမိုကရေစီ အထွေထွေ ရွေးကောက်ပွဲတွင် သျှမ်းပြည်တဝှမ်း မဲပေးပိုင်ခွင့်ရှိသူ ( ၃၆) သိန်းကျော် ရှိကြောင်း ပြည်နယ် ရွေးကောက်ပွဲ ကော်မရှင်ထံ စုံစမ်းသိရှိရသည်။
၂၀၂၀ ခုနှစ် နိုဝင်ဘာ (၈) ရက်တွင် ကျင်းပမည့် ပါတီစုံ ရွေးကောက်ပွဲ၌ သျှမ်းပြည်တွင်းရှိ မဲပေးပိုင်ခွင့်ရှိသူ (၃၆,၃၄၀၀၀) ရှိပြီး ၂၀၁၅ ခုနှစ် ပါတီစုံ ရွေးကောက်ပွဲတွင် မဲပေးပိုင်ခွင့်ရှိသူ (၃၁) သိန်းကျော်သာ ရှိကြောင်း သျှမ်းပြည်နယ် ရွေးကောက်ပွဲ ကော်မရှင်အဖွဲ့ခွဲဥက္ကဌ ဦးထင်ကျော်က ပြောသည်။
“မဲ ဆန္ဒရှင်က ၂၀၁၅ ခုနှစ်ထက် ပိုတိုးလာပါတယ်” ပြည်နယ် ရွေးကောက်ပွဲ ကော်မရှင်အဖွဲ့ခွဲ ဥက္ကဋ္ဌ ဦးထင်ကျော် က ပြောသည်။
သျှမ်းပြည်နယ်တွင် ရွေးကောက်ပွဲ ကျင်းပသည့် မြို့နယ်ပေါင်း (၄၉ ) မြို့ရှိပြီး နိုဝင်ဘာ ၅ ရက်နေ့ နောက်ဆုံးမဲစာရင်း အရ မဲဆန္ဒရှင် (၃၆၃၄၀၀၀) ရှိကြောင်း၊ သျှမ်းပြည်တောင်ပိုင်းတွင် မဲဆန္ဒရှင် (၁၆၉၉၀၀၀) ဦး ၊ သျှမ်းပြည်မြောက်ပိုင်းတွင် မဲဆန္ဒရှင်(၁၄၄၀၀၀၀) ကျော်ရှိပြီး သျှမ်းပြည်အရှေ့ပိုင်းတွင် (၄၈၀၀၀၀) ကျော်ရှိကြောင်း ရွေးကောက်ပွဲ ကော်မရှင်အဖွဲ့ခွဲ ဥက္ကဋ္ဌ ဦးထင်ကျော် ကပြောသည်။
နိုဝင်ဘာ ၂ ရက်နေ့ထိ အသက် (၆၀) ကျော်အထက်ရှိသူ သျှမ်းပြည်တွင်း ကြိုတင်မဲပေးသူ ဦးရေ (၇၄၀၀၀) ကျော်ရှိကြောင်း ဥက္ကဋ္ဌ ဦးထင်ကျော် ကဆက်လက်ပြောသည်။
“သျှမ်းပြည်တွင်း မြို့ပေါင်း ၄၉ မြို့နယ် မဲဆန္ဒနယ် ၄၉ နေရာမှာ ကြိုတင်မဲ ပေးတဲ့ စာရင်းက အသက် ၆၀ ကျော်အထက် က သုံးသိန်း ကိုးသောင်း ခြောက်ထောင် ရှိတယ်”ဟု ဦးထင်ကျော် ကပြောသည်။
၂၀၁၅ ခုနှစ်ပါတီစုံ အထွေထွေ ဒီမိုကရေစီရွေးကောက်ပွဲ ကာလသည် မဲရုံပေါင်း (၃၃၃၁) ခု ထားရှိပြီး ၂၀၂၀ ရွေးကောက်ပွဲသည် မဲရုံပေါင်း (၃၅၉၁) ခု ထားရှိခဲ့သည်။
၂၀၂၀ ရွေးကောက်ပွဲတွင် မဲရုံ ဝန်ထမ်းပေါင်း (၅၅၀၀၀) ဦး ရှိပြီး မသန်စွမ်း မဲပေးမယ့်သူ (၅၀၀၀) ကျော် ရှိကြောင်း သိရသည်။
သျှမ်းပြည်တွင် ၂၀၂၀ပါတီစုံ အထွေထွေရွေးကောက်ပွဲ မကျင်းပသည့် မိုင်းကိုင်မြိုနယ် အပါအဝင် (၈)မြို့နယ် ရှိကာ မဲဆန္ဒရှင် (၇)သောင်းခွဲကျော် မဲပေးပိုင်ခွင့်ဆုံးရှုံးကြောင်းလည်း ပြည်နယ် ရွေးကောက်ပွဲ ကော်မရှင်ရုံးမှသိရသည်။