သျှမ်းပြည် အရှေ့ပိုင်း မိုင်းဆတ်မြို့နယ် “ဝ” တပ်ဖွဲ့လှုပ်ရှားနယ်မြေ နေထိုင်သူများအားလုံး ကြံ့ခိုင်ရေးပါတီ ကို မဲထည့်ပေးရန် “ဝ”တပ်ဖွဲ့ ကညွှန်ကြားထားကြောင်း စုံစမ်းသိရသည်။

မိုင်းဆတ်မြို့နယ်အတွင်းရှိ “ဝ” တပ်ဖွဲ့ လှုပ်ရှားသည့်နယ်မြေအတွင်း နိုင်ငံရေးပါတီများအား ကိုဗစ် ၁၉ ရောဂါကာကွယ်ရေး အတွက် ဟုအကြောင်းပြကာ ဝင်ထွက်သွားလာခွင့်မပေးသဖြင့် နိုင်ငံရေးပါတီများ ထိုနေရာသို မဲဆွယ်ခွင့်မရရှိခဲ့ကြကြောင်း၊ ထို့ကြောင့် ထိုနေရာတွင် လွတ်လပ်ပြီး တရားမျှတမှုမရှိနိုင်ဟုဆိုကာ ရွေးကောက်ပွဲ ပယ်ဖျက်ပေးရန် နိုင်ငံရေးပါတီ (၄)ခု က ယမန်နေ့ (နိုဝင်ဘာ ၄)ရက်က တောင်းဆိုခဲ့သည်။

သို့သော် “ ဝ” တပ်ဖွဲ့ ထိန်းချုပ်နေရာဖြစ်သည့် ဝမ်ဟုံ၊ ဆီဘုတ်၊ မိုင်းယွန်း၊ တာကူးတွင်နေထိုင်သည့် ပြည်သူများကို သက်ဆိုင်ရာ အာဏာပိုင်းများက အစိုးရတပ်မတော်နှင့် ဆက်နွယ်သည့် ပြည်ထောင်စု ကြံ့ခိုင်ရေး နှင့် ဖွံ့ဖြိုးရေး ပါတီ(USDP) ပါတီကို မဲထည့်ရန် ပြောဆိုခဲ့ပြီး၊ မဲထည့်ပုံ၊ထည့်နည်းများ ကို ခေါ်ယူသင်ကြားပေးနေကြောင်းလည်း အမည်မဖော်လိုသည့် “ဝ”တပ်ဖွဲ့ဝင် တဦးက သျှမ်းသံတော်ဆင့်ကို ပြောသည်။

“ ကျနော်တို့ကို ခေါ်ပြီးတော့အစိုးရတပ် ပါတီကိုပဲ မဲပေးဖို့ ပြောပါတယ်။ ကျန်ပါတီတွေမပေးဖို့ နောက်ပြီး တံဆိပ်တုံးထုတာတွေ သင်ပေးပါတယ်” ဟု ၎င်း အမည်မဖော်လိုသည့် “ ဝ”တပ်သား က ဆိုသည်။

ယခင် ထိုဒေသတွင်နေထိုင်သည့် ပြည်သူများသည် ဒီမိုကရေစီပြုပြင်ပြောင်းလဲရန် အတွက် အမျိုးသားဒီမိုကရေစီ အဖွဲ့ချုပ်(NLD)ကိုသာမဲပေးရန် “ ဝ”တပ်ဖွဲ့က ပြောဆိုခဲ့ပြီး၊ ၅နှစ်သာကာလအတွင်း အပြောင်းအလဲမရှိလာသည့်အတွက် ယခုနှစ် ရွေးကောက်ပွဲမှာ အစိုးရတပ် ပါတီဖြစ်သည့် USDPကို မဲပေးရန် ဖြစ်ကြောင်းသိရသည်။

“ တိုင်းရင်းသားလက်နက်ကိုင်တပ်သားတွေ က မဲပေးခွင့်မရှိပေမယ့် “ဝ”ထိန်းချုပ်နယ်မြေက ဝ တပ်သားတွေကတော့ မဲပေးလို့ရတယ်။ “ဝ”နယ်မြေက လူကြီးပေါ်မူတည်တယ်။ ဘယ်သူ့ကိုမဲထည့်ဖို့ ဆိုတာက ဒါကတော့ တရားမျှတမှု မရှိဘူး” ဟု မိုင်းဆတ်မြို့နေ အသက် ၄၀ကျော် စိုင်းတစ် က သျှမ်းသံတော်ဆင့်ကို ပြောသည်။

စက်တင်ဘာ လဆန်းပိုင်းက တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် UWSA “ဝ” တပ်ဖွဲ့ နှင့် တြိဂံဒေသ တိုင်းစစ်ဌာနချုပ်တွင် တွေ့ဆုံခဲ့ပြီး ကိုဗစ်- ၁၉ ကာကွယ်ထိန်းချုပ်ရေးဆိုင်ရာ အထောက်အကူပစ္စည်းများ ထောက်ပံ့ပေးအပ်ခဲ့ကြောင်းသိရသည်။

မိုင်းဆတ်မြို့နယ် နိုင်ငံရေးပါတီများ ဝင်ခွင့်မရသည့် ဒေသများတွင် မဲဆန္ဒရှင်များကို တိုင်းရင်းသားပါတီများအား မဲပေးရန် ဟန့်တားခြင်း၊ ခြိမ်းခြောက်ခြင်းတို့ ပြုလုပ်ကြောင်းလည်း မိုင်းဆတ်ဒေသခံများပြောပြချက်အရ သိရသည်။

ကိုဗစ်-၁၉ ကာကွယ်တားဆီးမှု ဟု ပြောဆိုကာ “ဝ”ထိန်းချုပ်နယ်မြေ ဝင်၊ထွက် မဲဆွယ်စည်းရုံးခွင့်မရရှိသည့်အတွက် နိုင်ငံရေးပါတီများကလည်း တရားလွတ်လပ်သည့် ရွေးကောက်ပွဲမဖြစ်ကြောင်း၊ မဲဆွယ်ခွင့်မရဘဲ ရွေးကောက်ပွဲကျင်းပခြင်းသည် မဖြစ်သင့်ကြောင်းလည်း ဝေဖန်ထောက်ပြမှုများရှိနေသည်။

“ လွတ်လွတ်လပ်လပ် နဲ့ စည်းရုံးခွင့်မရှိဘဲ လွတ်လပ်ပြီးတရားမျှတတဲ့ရွေးကောက်ပွဲ ဖြစ်လာနိုင်စရာအကြောင်းမရှိတော့ဘူး။ ကြားရတဲ့ သတင်းတွေလည်းမကောင်းဘူး။ ဒီနေရာက လုံးဝ ရွေးကောက်ပွဲဖျက်သိမ်းရမယ့်နေရာပါ” ဟု လားဟူ အမျိုးသားဖွံ့ဖြိုးတိုးတက်ရေး ပါတီ (LNDP) ကိုယ်စားပြုပြီး မိုင်းဆတ်မြို့နယ် ပြည်သူ့လွှတ်တော် နေရာဝင်ရောက်ယှဉ်ပြိုင်မည့် ဒေါ်အေးသီတာမြင့် က ပြောဆိုလိုက်သည်။

ထို့ပြင် သျှမ်းပြည်တောင်ပိုင်း မိုင်းကိုင်မြို့နယ်အတွင်း ပြဿနာ တစုံတရာမရှိဘဲ တဦးတယောက်တည်း ၏ တိုင်ကြားချက်ကြောင့် ရွေးကောက်ပွဲ ကျင်းပခွင့်မရခဲ့သည့် ကိစ္စရှိခဲ့ပြီး၊ လက်ရှိမှာ ထိုနေရာတွင် ဝင်ရောက်ယှဉ်ပြိုင်မည့် နိုင်ငံရေး ပါတီ(၄)ခု တိုင်ကြားထားခြင်းကို တစုံတရာ တုန့်ပြန်မှုမရှိသည့်အပေါ် စဉ်းစားစရာများဖြစ်နေကြောင်းလည်း သျှမ်းပြည် လူထုများက မှတ်ချက်ပြုလိုက်သည်။

မိုင်းဆတ်မြို့နယ် အတွင်း ဝင်ရောက်ယှဉ်ပြိုင်မည့် ပါတီများမှာ “ဝ” အမျိုးသားပါတီ၊ ပြည်ထောင်စု ကောင်းကျိုးဆောင်ပါတီ၊ အမျိုးသားဒီမိုကရေစီအဖွဲ့ချုပ်၊ လားဟူအမျိုးသားဖွံ့ဖြိုးတိုးတက်ရေးပါတီ၊ ရှမ်းတိုင်းရင်းသားများ ဒီမိုကရေစီအဖွဲ့ချုပ်၊ ရှမ်းတိုင်ရင်းသားများ ဒီမိုကရက်တစ်ပါတီ နှင့် ပြည်ထောင်စု ကြံ့ခိုင်ရေး နှင့် ဖွံ့ဖြိုးရေး ပါတီတို့ ဖြစ်ကြောင်းသိရသည်။