သျှမ်းပြည်မြောက်ပိုင်း နောင်ချိုမြို့နယ် ခြေမြစ်ပင် ကိုဗစ်-၁၉ စစ်ဆေးရေးဂိတ်နေရာအား ကုန်တင်ကား တစီးဝင် တိုက်မိသဖြင့် ယာဉ်ထိန်းရဲတဦး နှင့် အရပ်သားတဦးသေဆုံးကြောင်း စုံစမ်းသိရှိရသည်။
ဖြစ်စဉ်မှာ ယမန်နေ့ နိုဝင်ဘာ ၂ ရက် ည ၇ နာရီအချိန်တွင် နောင်ချိုမြို့ မှ ပြင်ဦးလွင်မြို့ ဘက်သို့ မောင်း လာသည့် ကုန်တွဲကားသည် အရှိန်မထိန်းနိုင်သဖြင့် ယာဉ်လမ်းရှင်းနေသည့် ယာဉ်ထိန်းရဲတဦး နှင့် အရပ်သားတဦးကို တိုက်မိခဲ့ကာ သေဆုံးခဲ့ကြောင်း သိရသည်။
“ကုန်ကားက အရှိန်မထိန်းနိုင်လို့ ကိုဗစ်-၁၉ စစ်ဆေးရေးဂိတ်ကို ဝင်တိုက်တယ်။ အဲ့နားက ယာဉ်ကြောရှင်းတဲ့ ယာဉ်ထိန်းရဲကိုထိတယ်။ သူကတော့ ပြင်ဦးလွင်ဆေးရုံမှာသွား ဆုံးတာ။ အရပ်သားကတော့ ပွဲချင်းပြီး သေဆုံးတယ်” ဟု နောင်ချိုရဲစခန်းမှ တာဝန်ကျ ရဲတပ်သားက ပြောသည်။
လက်ရှိမှာ ကုန်ကားမောင်းသည့် အသက် ၂၆နှစ် အရွယ်ရှိ မြင့်သိန်းကို နောင်ချို ရဲစခန်းတွင် ဖမ်းဆီးထားပြီး အမှုဖွင့်ထားကြောင်းသိရသည်။
