သျှမ်းပြည်တောင်ပိုင်း ကလောမြို့နယ်၊ နန့်ပန်တက်ကျေးရွာ စစ်ဆေးရေးဂိတ်တွင် ယနေ့ ( အောက်တိုဘာ ၃၀ )မနက်ပိုင်း၌ ကိုဗစ် -၁၉ စစ်ဆေးရာတွင် ၂ ဦးတွေ့ရှိကြောင်းစုံစမ်းသိရှိရသည်။
ထို ၂ ဦးမှာ တဦးသည် တီကျစ်ကျောက်မီးသွေး စက်ရုံသို့ အလုပ်လုပ်ရန် ရောက်လာသည့်သူ နှင့် နောက်တဦးမှာ မန္တလေး မှ တောင်ကြီးသို့ လာရောက်သည့် သူဖြစ်ကြောင်းသိရသည်။
“ ရန်ကုန်လာတဲ့ တယောက်ကတော့ အလုပ်လုပ်ဖို့လာတယ်။ သူတို့ ၁၁ လာတယ်။ ၁ယောက်ကို စစ်လိုက်တော့ ပိုးတွေ့တယ်။ ကျန်တယောက် ကတော့ တောင်ကြီး မန္တလေး အမြဲသွားလာတာတော့ရှိတယ်။ ဒီနေ့စစ်လိုက်တာတွေ့တယ် ” ဟု သျှမ်းပြည် ပြည်သူ့ကျန်းမာရေး ဦးစီးဌာန လက်ထောက်ညွှန်ကြားရေးမှူး ဒေါက်တာ ဇဝနကို ကပြောသည်။
ပိုးတွေ့လူနာသည် အသက် ၄၁နှစ်အရွယ်တဦးနှင့် အသက် ၃၄နှစ်အရွယ် အမျိုးသားများဖြစ်ကြောင်းသိရသည်။
ထိုပိုးတွေ့လူနာကို ကလောဆေးရုံ တွင်ထားရှိကြောင်း ဒေါက်တာဇဝနကို ကပြောသည်။
“ထိတွေသူတွေကို အစကတော့ ကလော နဲ့ တီကျစ်မှာ Quarantine ထားမလို့။ ဒါပေမဲ့ ကလောထွေအုပ်က ထားစရာနေရာမရှိတော့လို့ ရန်ကုန်ပြန်ပို့ လိုက်ပြီ။ ရန်ကုန်မှာ Quarantine ထားမယ်” ဟု ဒေါက်တာ ဇဝနကိုက ပြောသည်။
သျှမ်းပြည်နယ်တောင်ပိုင်းတွင် ပိုးတွေ့လူနာ ၉၄ ဦးရှိပြီး ဆေးကုသလူနာ ၃၅ ဦးနှင့် သေဆုံးသူ တစ်ဦး ရှိကြောင်းသိရသည်။
