သျှမ်းပြည်မြောက်ပိုင်း ကျောက်မဲမြို့နယ်အတွင်း တိုက်ပွဲများ ငြိမ်းသက်နေသော်လည်း ကျေးရွာတချို့ စစ်ကြောင်းများ ရှိနေသဖြင့် စစ်ဘေးရှောင် (၃၀၀)ကျော် နေရပ်သို့ ပြန်နိုင်ခြင်း မရှိသေးကြောင်း စုံစမ်း သိရှိရ သည်။

အောက်တိုဘာ ၁၈ ရက်တွင် စစ်ဘေးရှောင် ပြည်သူများ (၂၀၀၀) ကျော် နေရပ်သို့ပြန်သွားကြပေသာ်လည်း ဟိုနမ့်ကျေးရွာ နှင့် ကောင်းမှူးခံ ကျေးရွာ က ဒေသခံများ ၃၀၀ ကျော် နေရပ်သို့ မပြန်နိုင်သေးကြောင်း ကျောက်မဲမြို့နယ် မဲဆန္ဒနယ် အမှတ်(၁) ကိုယ်စားလှယ်လောင်း နန်းအိမွန်အောင် ကပြောသည်။

“အဲ့ ၂ ရွာကတော့ သူတို့ရွာထဲမှာ အစိုးရတပ်မတော် စစ်ကြောင်းတွေ ရှိနေသေးလို့ အိမ်မပြန်ကြ သေးဘူး။ စစ်ဘေးရှောင် တွေ ၃၀၀ ကျော်လောက် ကျန်နေသေးတယ်” ဟု လွှတ်တော်ကိုယ်စားလှယ်လောင်း နန်းအိမွန်အောင် ကပြောသည်။

နမ့်မဟင်ကျေးရွာ ဒေသခံများ တိုက်ပွဲကြောင့် စစ်ရှောင်နေချိန်ကာအတွင်း အစိုးရ တပ်မတော် စစ်ကြောင်းများသည် နမ့်မဟင်ကျေးရွာတွင် စခန်းချခဲ့ကာ နေထိုင်ခဲ့ကြောင်း သိရသည်။

“ဒီနေ့ ကျမတို့ ကြားတာကတော့ စစ်ကြောင်းတွေ ပုံဝိုးဘက်ကနေ ပြန်လှည့်ထွက်လာတယ်လို့ ကြားတယ်။အကုန် ပြန်ထွက်လာတာတော့ မဟုတ်ဘူး။ နည်းနည်းတော့ ကျန်နေအုံးမယ်။” နန်းအိမွန်အောင် ကပြောသည်။

တိုက်ပွဲကာလအတွင်း ကျေးရွာပြည်သူနေအိမ်များကို အစိုးရတပ်မတော်စစ်ကြောင်းများ ဝင်ရောက်မွှေနှောက်ထားပြီး အိမ်တွင်းရှိ ပစ္စည်းများကို ယူဆောင်သွားခြင်း၊ အိမ်မွေး တိရစ္ဆာန်များကို သတ်စားခြင်း နှင့် နေအိမ်ဝင်းအတွင်း လက်နက်များ၊ ကျည်ခွံများစွာ ချန်ထားခဲ့ကြောင်း သိရသည်။

သျှမ်းပြည်မြောက်ပိုင်း ကျောက်မဲမြို့နယ်အတွင်း RCSS/SSA နှင့် အစိုးရတပ်မတော်တို့ကြား တိုက်ပွဲကြောင့် စစ်ရှောင် ၃၅၀၀ ဝန်းကျင်ရှိခဲ့ပြီး၊ အောက်တိုဘာ ၁၆ရက် မှစတင်ကာ စစ်ရှောင် ၂၀၀၀ကျော် နေရပ်ပြန်သွာပြီဖြစ်ကြောင်း စစ်ရှောင်ကူညီပေးသည့်သူများထံ သိရသည်။

“ စစ်ရှောင် ၂၀၀၀ကျော်ကတော့ နေရပ်ကို ပြန်နိုင်ခဲ့ပေမယ့် ၃၀၀ကျော်ကတော့ ကျန်နေသေးတယ်။ တိုက်ပွဲကြောင့် ပျက်ဆီးတဲ့ အိမ်တွေ၊ မွှေးနောက်ခံရတဲ့ အိမ်တွေအတွက် သက်ဆိုင်ရာက လာပြီးတော့ ပြုပြင်ပေးစေချင်ပါတယ်။ နေရပ်ပြန်သူတွေကတော့ စိုးရိမ်မှုနဲ့ ပြန်နေရတယ်” ဟု စစ်ရှောင်ကို ကူညီပေးသည် နန်းအောင် က သျှမ်းသံတော်ဆင့် ကိုပြောသည်။

တိုက်ပွဲများ ဖြစ်ပွားသည့်အတွက် နိုဝင်ဘာ ၈ ရက်မှာ ကျင်းပမည့် ပါတီစုံ ဒီမိုကရေစီ အထွေထွေရွေးကောက်ပွဲမှာ ကျေးရွာ ပြည်သူများအနေဖြင့် နစ်နာမှု ရှိကြောင်း သိရသည်။

လွှတ်တော်ကိုယ်စားလှယ်လောင်းများလည် ကျေးရွာတွေမှာ စည်းရုံးရေး ဆင်းရန်အတွက် ခက်ခဲကြောင်းလည်း ကိုယ်စားလှယ်လောင်းများက ပြောဆိုကြသည်။

ကျောက်မဲမြို့နယ်အတွင်း အောက်တိုဘာ ၂ ရက်မှ အောက်တိုဘာ ၁၁ ရက်ထိ အစိုးရတပ်မတော် နှင့် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် ( RCSS/SSA) တို့သည် တိုက်ပွဲများ ဖြစ်ပွားခဲ့ပြီး ရပ်ရွာနေအိမ်အတွင်း လက်နက်ကြီးများ ကျသဖြင့် ဒေသခံလူထု ထိခိုက်ဒဏ်ရာရ ၊ ဆုံးရှုံးမှုများ ရင်ဆိုင်ခဲ့ရသည်။

လက်ရှိအချိန်သည် သီးနှံဆွတ်ခူးသည့် အချိန်ဖြစ်သဖြင့် တိုက်ပွဲများ မဖြစ်စေချင်ကြောင်း ၊ စစ်ကြောင်းများလည်း နောက်ဆုတ်ပေးမှသာလျှင် စစ်ရှောင်များ နေရပ်ပြန်နိုင်မည်ဖြစ်သဖြင့် တိုက်ပွဲများ မဖြစ်ပွားစေရန်၊ တိုက်ပွဲများ လုံးဝရပ်တန့်ပေးရန် စစ်ရှောင်များက တိုက်တွန်းတောင်းဆိုလိုက်သည်။