သျှမ်းပြည်အရှေ့ပိုင်း ကျိုင်းတုံမြို့နယ် မိုင်းပျဉ်းမြို့တွင် အသက် ၂ နှစ်အရွယ် ကလေးငယ် တစ်ဦး ကိုဗစ်-၁၉ ပိုးတွေ့ရကြောင်း ကျန်းမာရေး ဝန်ကြီးဌာနက ထုတ်ပြန်သည်။
အောက်တိုဘာ ၂၀ ရက် ည ၈ နာရီ ထုတ်ပြန်ချက်အရ ကိုဗစ်-၁၉ အတည်ပြု လူနာ ၁၃၀၆ ဦး အနက် သျှမ်းပြည်အရှေ့ပိုင်းတွင် အသက်အငယ်ဆုံး အတည်ပြု လူနာ တစ်ဦးတွေ့ရခြင်း ဖြစ်ကြောင်းသိရသည်။
“ကျန်းမာရေး အခြေနေကောင်းပါတယ်။ ကလေးက မိုင်းပျဉ်းဆေးရုံမှာ တက်နေပါတယ်။ ရန်ကုန်ကနေ ပြန်လာတာပါ။ ကလေးမိဘတွေကိုတော့ ၂ ကြိမ် တိုင်တိုင် စစ်ပေမယ့် ပိုးမတွေ့ရပါ” သျှမ်းပြည်အရှေ့ပိုင်း ပြည်သူ့ ကျန်းမာရေး ဦးစီးဌာန လက်ထောက်ညွှန်ကြားရေးမှူး ဒေါက်တာ ဘစိုးသက် က သျှမ်းသံတော်ဆင့် ကိုပြောသည်။
အဆိုပါ ကလေးငယ်သည် ရန်ကုန်မှ ပြန်ရောက်ကတည်းက Quarantine ထဲ နေထိုင်ပြီး ၁၀ ရက်ပြည့်ပြီး ဓါတ်ခွဲ နမူနာ စစ်ဆေးရာ ပိုးတွေ့ရခြင်း ဖြစ်ကြောင်း ဒေါက်တာ ဘစိုးသက်က ပြောသည်။
“ရောက်ကတည်း မြို့ထဲကို အဝင်မခံတာ။ Quarantine ထည့်ထားတာ။ ၁၀ ရက်ပြည့်လို့ စစ်တာ ပိုးတွေ့တယ်။ အပြင်လည်း မထွက်ပါဘူး” ဟု ဒေါက်တာ ဘစိုးသက် ကပြောသည်။
သျှမ်းပြည်အရှေ့ပိုင်းမှာ ကိုဗစ်-၁၉ ပိုးတွေ့လူနာ စုစုပေါင်း ၁၀ ဦးရှိသည့်အနက် ၆ ဦးမှာ ဆေးရုံမှ ဆင်းခွင့်ရပြီး ယခု လက်ရှိမှာ အတည်ပြု လူနာ ၄ ဦးသာ ကျန်ရှိကြောင်း သိရသည်။
အောက်တိုဘာ ၂၀ ရက်နေ့ထိ သျှမ်းပြည်အတွင်း ကိုဗစ်-၁၉ ကူးစက်ခံရလူနာ စုစုပေါင်း (၈၀) ဦး ရှိပြီး ၁ ဦး သေဆုံးကာ၊ ဆေးရုံမှ ဆင်းခွင့်ရသူ ၅၂ဦး ရှိကြောင်း သျှမ်းပြည်အစိုးရထံ စုံစမ်းသိရှိရသည်။
မြန်မာနိုင်ငံတွင် ကိုဗစ်-၁၉ ပိုးတွေ့လူနာ စုစုပေါင်း (၃၈၅၀၂) ဦး ရှိပြီး ပြန်လည် သက်သာလာသူ (၁၈၁၄၇) ဦး နှင့် သေဆုံးသူ (၉ ၄၅) ဦးရှိကြောင်း အောက်တိုဘာ ၂၀ ရက် ည ၈ နာရီအချိန်တွင် ကျန်းမာရေး နှင့် အားကစား ဝန်ကြီးဌာန ထုတ်ပြန်ချက် အရ သိရသည်။
Leave a Comments