သျှမ်းပြည် တောင်ကြီးမြို့နယ်တွင် အသက် (၉)နှစ် မှ (၁၀)နှစ် အရွယ် မိန်းကလေးငယ်များကို သားအိမ်ခေါင်းကင်ဆာရောဂါမှ ကာကွယ်စေရန်အတွက် (HPV) ကာကွယ်ဆေးထိုး ပေးရန် မြို့နယ်ပြည် သူ့ကျန်းမာရေး ဦးစီးဌာနမှ အောက်တိုဘာလ (၂၀) ရက်နေ့ က ဆောင်ရွက်ခဲ့ကြောင်းသိရသည် ။
“ ဒီသားအိမ်ခေါင်းရောဂါဖြစ်ပြီးရင် ကင်ဆာ အဆင့်ကိုပြောင်းသွားရင် ကုသဖို့ရန်အတွက် ခဲယဉ်းသွားပြီ သေဆုံးမှုတွေလဲမြင့်တယ် သားအိမ်ခေါင်းရောဂါမဖြစ်အောင် ခုလို ကာကွယ်ဆေးထိုးခြင်းအားဖြင့် ကာကွယ်နိုင်ပါတယ် ဒီကာကွယ်ဆေးက အင်မတန် မှဈေးကြီးပါတယ် ဒါကြောင့် ဒီအသက် (၉)နှစ်နဲ့(၁၀) အရွယ် မိန်းကလေးတွေ ထိုး သင့်ပါတယ်လို့ပြောချင်ပါတယ် ” တောင်ကြီးမြို့နယ် ပြည်သူ့ကျန်းမာရေးဦး စီးဌာနမှူး ဒေါက်တာမိုးထွန်း ကပြောသည် ။
(HPV) ကာကွယ်ဆေးကို အသက် (၉)နှစ်နှင့် (၁၀)နှစ်အရွယ်မိန်းကလေးငယ်များ အား ထိုးပေးရခြင်းမှာ ၎င်းအရွယ် တွင်ခုခံအား အမြင့် မားဆုံး ရောက်ရှိသည့် အရွယ်ဖြစ် သောကြောင့် ကာကွယ်မှုကို အစောဆုံးရရှိနိုင်သည့် အတွက် အသက်ပိုင်းခြားပြီး ထိုးပေး ရခြင်းဖြစ် သည် ဟု ဒေါက်တာမိုးထွန်း ကရှင်းပြသည် ။
(HPV) ကာကွယ်ဆေးကို တောင်ကြီးမြို့နယ် အနေနှင့် မြို့နယ်ကျန်းမာရေးဦးစီးဌာနမှ မိန်းကလေးငယ်ပေါင်း ၃၅၀၅ ဦး အား ထိုးပေးမည် ဖြစ်သည်။
တောင်ကြီးမြို့နယ်တွင် ကျန်းမာရေးဌာနအနေနှင့် ၁၀ ခု ၊ ဌာနခွဲအနေနှင့် ၂၃ ခုရှိပြီး ကာကွယ်ဆေးထိုးစုရပ်အ နေနှင့် နေ့အလိုက်အလိုက် ထိုးပေးသွားမည်ဖြစ်ကြောင်း သိရသည် ။
သားအိမ်ခေါင်းကင်ဆာသည် ကမ္ဘာတစ်ဝှမ်းတွင်း အမျိုးသမီးများ၌ စတုတ္ထမြောက်အဖြစ် များဆုံး ကင်ဆာဖြစ်ပြီး အထူးသဖြင့် ဖွံ့ဖြိုးဆဲနိုင်ငံ များတွင်နေထိုင်သော အမျိုးသမီးများ တွင် ဒုတိယမြောက် အဖြစ်အများဆုံး ကင်ဆာရောဂါ အားလုံးအနက်(၇၀)ရာခိုင်နှုန်း သည် (HPV) ပိုးအမျိုးအစား နှစ်မျိုးဖြစ်သော အမျိုးအစား (၁၆) နှင့် (၁၈) ကူးစက်ခံ ရခြင်းကြောင့်ဖြစ်ကြောင်းသိရသည် ။
၂၀၁၈ ခုနှစ် စာရင်းများအရ သားအိမ်ခေါင်းကင်ဆာသည် ကမ္ဘာတစ်ဝှမ်းလုံးတွင် နှစ်စဉ် အမျိုးသမီး (၅၆၉,၈၄၇) ဦးဖြစ်ပွားပြီး သေဆုံးသူ (၃၁၁,၃၆၅)ဦး ရှိသည် ။ အဆိုပါသေဆုံး သူများ၏ ၈၅ ရာခိုင်နှုန်းမှာ ဖွံ့ဖြိုးမှုနည်းသောနိုင်ငံများမှ ဖြစ်သည် ။
၂၀၁၈ ခုနှစ် အတွက် ကမ္ဘာတစ်ဝှမ်းလုံး အသက်အလိုက်တွက်ချက်ထားသော နှစ်စဉ် သားအိမ်ခေါင်း ကင်ဆာ ဖြစ်ပွားနှုန်းမှာ အမျိုးသမီးဦးရေ တစ်သိန်းတွင် (၁၃.၁) ရှိပြီး သေဆုံးနှုန်းမှာ (၆.၉) ဖြစ်ပြီး ဖွံ့ဖြိုးမှုနည်းသော ဒေသများတွင် သားအိမ်ခေါင်း ကင်ဆာ ဖြစ်ပွားမှုနှုန်းနှင့် သေဆုံးမှုနှုန်းအမြင့်မားဆုံးဖြစ်သည် ဟု သိရသည် ။
Leave a Comments