သျှမ်းပြည်တောင်ပိုင်း ရွေးကောက်ပွဲ ကျင်းပရေး ပယ်ဖျက်ခံထားရသည့် မိုင်းကိုင်မြို့နယ်တွင် ရွေးကောက်ပွဲ ပြန်လည်ကျင်းပခွင့် ရရှိရေး အလားအလာကောင်းကြောင်း သျှမ်းပြည်နယ် ရွေးကောက်ပွဲ ကော်မရှင် အဖွဲ့ခွဲထံ စုံစမ်းသိရှိရသည်။
သျှမ်းပြည်နယ်အတွင်း ရွေးကောက်ပွဲ ကျင်းပခွင့် ဖျက်သိမ်းခံထားရသည့် မြို့နယ်များအနက် ပြန်လည်ကျင်းပနိုင်ရေး အလားအလာကောင်းသည့် မြို့နယ်များမှာ မိုင်းကိုင်မြို့နယ် ၊ လားရှိုးမြို့နယ် မယ်ဟန်ကျေးရွာအုပ်စု နှင့် မူဆယ်မြို့နယ် တော်ရွက်ရပ်ကွက် တို့ဖြစ်ကြောင်း သိရသည်။
ထိုနေရာများ ရွေးကောက်ပွဲ ပြန်လည် ကျင်းပနိုင်ရေးအတွက် ပြန်လည်စိစစ်ပြီး ပြည်ထောင်စု ရွေးကောက်ပွဲ ကော်မရှင်ထံ အမြန်ဆုံး တင်ပြသွားရန်ရှိကြောင်း သျှမ်းပြည် ရွေးကောက်ပွဲ ကော်မရှင် အဖွဲ့ခွဲ ဥက္ကဋ္ဌ ဦးထင်ကျော် က သျှမ်းသံတော်ဆင့် ကိုပြောသည်။
“အဲ့နေရာတွေကို လုပ်နိုင်ခြင်း ရှိ၊ မရှိ စိစစ်ပြီးတော့ ပြည်ထောင်စု ရွေးကောက်ပွဲ ကော်မရှင်ထံ ချက်ချင်းတင်နိုင်ဖို့အတွက် လုပ်နေပါတယ်။ ပြန်ရနိုင်ဖို့ အလားအလာကောင်းပါတယ်” ဦးထင်ကျော် က သျှမ်းသံတော်ဆင့် ကိုပြောသည်။
သျှမ်းပြည်တောင်ပိုင်း မိုင်းကိုင်မြို့နယ် တစ်ခုလုံးသည် နယ်မြေတည်ငြိမ်အေးချမ်းပြီး တိုက်ပွဲမဖြစ်ပွားသည့် ဒေသဖြစ်သည့်အတွက် ရွေးကောက်ပွဲ ကျင်းပခွင့်မပြုလျှင် မဲဆန္ဒရှင် ပြည်သူ စုစုပေါင်း (၅၆,၀၀၀) ကျော် မဲပေးနိုင်သည့် အခွင့်အရေး ဆုံးရှုံးနိုင်ကြောင်း သိရသည်။
ထို့အတွက် ရွေးကောက်ပွဲပြန်လည်ကျင်းပနိုင်ရန် မိုင်းကိုင်မြို့နယ်အတွင်းရှိ နိုင်ငံရေးပါတီများက စုပေါင်းပြီး ရွေးကောက်ပွဲကော်မရှင်ထံ တင်ပြထားသကဲ့သို့ ဒေသခံများထံ ဆန္ဒသဘောထား လက်မှတ်များ ကောက်ယူကာ ထပ်မံ တင်ပြတောင်းဆိုသွားမည်ဟုလည်း SNLD သျှမ်းတိုင်းရင်းသား များဒီမိုကရေစီအဖွဲ့ချုပ် ကစိုင်းထွန်းအေးကလည်း သတင်းမီဒီယာများတွင်ဖြေကြားထားသည်ကို တွေ့ရသည်။
“ပြည်ထောင်စု ရွေးကောက်ပွဲကော်မရှင်ကနေ ကျနော်တို့ကို ဖုန်းမက်စေ့နဲ့ တချို့နေရာတွေမှာ ပြန်ပြီးတော့မှ လုပ်လို့ရတယ်ဆိုပြီးပြောလာတယ်။ ကျနော်တို့ တာဝန်ယူတဲ့နေရာမှာ ပြန်ပြင်ပေးဖို့ စိစစ်ပြီးတော့ ပြန်တင်ပေးဖို့ လုပ်နေပါတယ်။ အမြန်လုပ်ရမယ်။ ကြာလို့တော့ မရဘူး။ ရွေးကောက်ပွဲ ရပ်မသွားအောင်လို့”ဟု ဦးထင်ကျော် ကပြောသည်။
အောက်တိုဘာ (၁၆) ရက်နေ့က ပြည်ထောင်စု ရွေးကောက်ပွဲကော်မရှင်မှ ထုတ်ပြန်သည့် သျှမ်းပြည်တွင်း ရွေးကောက်ပွဲ ကျင်းပခွင့် မပြုသည့် နယ်မြေများမှာ နယ်မြေတည်ငြိမ်အေးချမ်းပြီး တိုက်ပွဲမဖြစ်ပွားသည့် ဒေသလည်း ပါဝင်နေပါသည်။
“ဘယ်လိုဖြစ်ဖြစ် ဒါက မဖြစ်သင့်တဲ့ ကိစ္စ ကိစ္စဖြစ်တဲ့အတွက် ကျနော်တို့အနေနဲ့ တောင်းဆိုတယ်။ နိုင်ငံသား အခွင့်အရေးဖြစ်တဲ့ မဲပေးပိုင်ခွင့်ကို ပြန်လည်ဖော်ဆောင်ပေးဖို့ တောင်းဆိုတယ်။ ပြီးတော့ UEC ရဲ့ ဆုံးဖြတ်ချက်ကတော့ ပြန်လည်ပြင်ဆင်ပေးဖို့ ပြန်လည်စဉ်းစားပေးဖို့ တောင်းဆိုတယ်” ဟု မိုင်းကိုင်ပြည်သူ့ လွှတ်တော်ကိုယ်စားလှယ် စိုင်းဆိုင်မိုင်း က သျှမ်းသံတော်ဆင့် ကိုပြောသည်။
မိုင်းကိုင်မြို့နယ် ရွေးကောက်ပွဲ မဆောင်ရွက်နိုင်သည့် စာရင်းတွင် ပါနေခြင်းသည် မဖြစ်သင့် ကိစ္စဖြစ်ပြီး ဒေသခံတိုင်းရင်းသားများ၏ အခွင့်အရေးကို ဆုံးရှုံးကြောင်း စိုင်းဆိုင်မိုင်း က ပြောသည်။
“ မူဆယ်တော်ရွက် ရပ်ကွက်က ဘာမှ မဖြစ်တဲ့နေရာ။ ပြဿနာမဖြစ်တဲ့နေရာ။ ဒါကို ရွေးကောက်ပွဲ မကျင်းပတဲ့နေရာထဲပါလာတာ မဖြစ်သင့်ဘူး။ ရွေးကောက်ပွဲကော်မရှင် သေချာ အလုပ်မလုပ်ဘူး ဆိုတာ ပြတာပဲ” ဟု မူဆယ် တော်ရွက် ရပ်ကွက်တွင်နေထိုင်သည် စိုင်းယီက သျှမ်းသံတော်ဆင့် ကိုပြောသည်။
သျှမ်းပြည်အတွင်း ရွေးကောက်ပွဲ ကျင်းပခွင့်မပြုသည့် မြို့နယ်များမှာ မိုင်းလားမြို့နယ်၊ ပန်ဆန်းမြို့နယ်၊ နားဖန်းမြို့နယ်၊ မိုင်းမောမြို့နယ်၊ ပန်ဝိုင်မြို့နယ်၊ မိုင်းကိုင်မြို့နယ် တို့မှ မြို့နယ် တစ်ခုလုံး ဖြစ်ကြောင်း အောက်တိုဘာ (၁၆) ရက်တွင် ပြည်ထောင်စု ရွေးကောက်ပွဲ ကော်မရှင်က တရားဝင် ထုတ်ပြန်ခဲ့သည်။
ထို့ပြင် ကျောက်မဲမြို့နယ် ၊ နောင်ချိုမြို့နယ်၊ နမ့်ဆန်မြို့နယ်၊ မန်တုံမြို့နယ်၊ မိုင်းခတ်မြို့နယ်၊ မိုင်းယန်းမြို့နယ်၊ မိုင်းဖြတ်မြို့နယ်၊ မိုင်းယောင်းမြို့နယ်၊ကွတ်ခိုင်မြို့နယ်၊ မူဆယ်မြို့နယ်၊ မက်မန်းမြို့နယ်၊ မိုင်းတုံမြို့နယ်၊ တန့်ယန်းမြို့နယ်၊ လားရှိုးမြို့နယ်၊ ကွမ်းလုံမြို့နယ်၊ ကုန်ကြမ်းမြို့နယ် နှင့် ဟိုပန်မြို့နယ် တို့မှ ကျေးရွာအုပ်စု များစွာ ကျင်းပခွင့် မပြုကြောင်းလည်း ပြည်ထောင်စု ရွေးကောက်ပွဲ ကော်မရှင်က တရားဝင် ထုတ်ပြန်ခဲ့သည်။
လွန်ခဲ့သည့် ၂၀၁၅ ခုနှစ်က ကျင်းပသည့် ပါတီစုံ ဒီမိုကရေစီ အထွေထွေ ရွေးကောက်ပွဲတွင် ပြည်ထောင်စု ရွေးကောက်ပွဲ ကော်မရှင်မှ ကျင်းပဖို့ရုပ်သိမ်းပယ်ဖျက်ကြောင်းကြေညာသော နယ်မြေများမှာ သျှမ်းပြည်နယ်တွင် (၂၀၀၈ ဖွဲ့စည်းပုံအရပေးထားသော) “ဝ” ကိုယ်ပိုင်အုပ်ချုပ်ခွင့်ရဒေသ အပါအဝင် မိုင်းရှုးမြို့နယ်၊ မိုင်းနောင်မြို့နယ် နှင့် ကျေးသီးမြို့နယ် ၃ မြို့နယ်နှင့် တန့်ယန်းမြို့တွင် ၁ နေရာ ပါဝင်ခဲ့သည်။
.
Leave a Comments