သျှမ်းပြည်မြောက်ပိုင်း ကျောက်မဲမြို့နယ်အတွင်းရှိ တိုက်ပွဲဖြစ်ပွါးရာ ကျေးရွာများအတွင်း လူထုနေအိမ်ခြံဝင်းများအတွင်း ဗုံး၊ မိုင်းနှင့်လက်နက်ကြီးများ တွေ့ရကြောင်း ဒေသခံများပြောပြချက်အရသိရသည်။
အောက်တိုဘာလ ၁၄ နှင့် ၁၅ ရက် ၂ ရက်အတွင်း တိုက်ပွဲများငြိမ်နေသဖြင့် စစ်ရှောင်များ နေအိမ်သွားကြည့်ရာတွင် ပုံဝိုးရွာနှင့်နမ့်မဟင်ရွာအတွင်း ထိုသို့လူကိုထိခိုက်သေကြေစေသော လက်နက်ကြီးများတွေ့ရှိရခြင်းဖြစ်ကြောင်း စစ်ရှောင်များပြောပြချက်အရသိရသည်။
“ ဒီနေ့ မနက် လက်နက်ကြီး ၂ လုံးတွေ့တာပါ။ ရွာလယ်ထဲမှာရှိတဲ့အိမ်ပါ။ အိမ်ရှေ့က အမှိုက်တွေ ပုံထားတဲ့နေရာမှာ တွေ့တာ။ အခုချိန်ထိတော့ ဘယ်သူမှ လာမကြည့်သေးဘူး။ စစ်သားတွေကတော့ အဲ့အိမ်ကို လာနေသွားတယ်” ဟု ပုံဝိုးကျေးရွာတွင်နေထိုင်သည့် အမျိုးသမီး နန်းအောင် က သျှမ်းသံတော်ဆင့်ကို ပြောသည်။
ထိုသို့ နေအိမ်ခြံဝင်းအတွင်းလက်နက်ကြီးတွေ့ရှိသည့်အပေါ် စစ်ရှောင်လူထု စိုးရိမ်ထိတ်လှန့်မှုဖြစ်ပွါးခဲ့ကြောင်း၊ လက်ရှိအချိန်အထိ မည်သူမှ လာရောက်ကြည့်ရှုရှင်းလင်းပေးခြင်းမရှိသေးကြောင်းလည်း နန်းအောင် ကပြောသည်။
“ဒီလက်နက်ကြီးကတော့ စစ်တပ်က ဟာပဲဖြစ်မှာ။ စစ်တပ်က အဲ့အိမ်ကို လာအိပ်သွားတယ်။ သူတို့ ဟိုနေ့မှ ထွက်သွားတာ” ဟု နန်းအောင်က ဆိုသည်။
ထိုနည်းတူ ကျောက်မဲမြို့နယ် နမ့်မဟင်ကျေးရွာတွင်လည်း မပေါက်ကွဲသေးသည့် လက်နက်ကြီးတလုံး မြေကြီးတွင် စိုက်ထားသည် ကို တွေ့ရှိရကြောင်း ဒေသခံ လုံးသန်းမောင် က သျှမ်းသံတော်ဆင့်ကိုပြောသည်။
“ ဘယ်တုန်းက လာစိုက်တာလဲဆိုတာ မသိဘူး။ ရွာလမ်းမပေါ်မှာရှိတယ်။ ဟိုနေ့က လက်နက်ကြီးပစ်လာပြီး မပေါက်ဘဲ မြေကြီးပေါ်စိုက်နေတာလားမသိဘူး။ ရွာသားတွေကတော့ ကြောက်နေကြတယ်။ ” ဟု လုံးသန်းမောင်က ပြောသည်။
အောက်တိုဘာလ ၂ ရက်နေ့ကစတင်သော ကျောက်မဲမြို့နယ် အတွင်း အစိုးရ တပ်မတော် နှင့် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော်(RCSS/SSA)တို့တိုက်ပွဲများသည် အောက်တိုဘာလ ၁၁ ရက်နေ့နောက်ပိုင်း ငြိမ်နေသော်လည်း ကျေးရွာအတွင်း အစိုးရစစ်တပ်များ လှုပ်ရှားသွားလာစခန်းချ နေထိုင်သဖြင့် စစ်ဘေးရှောင် ၃၅၀၀ ကျော် နေရပ်ပြန်ရန် ခက်ခဲနေဆဲ ဟု သိရသည်။
“ တပ်သားတွေကရွာသားတွေနေအိမ်ပေါ်တက်နေနေတော့ ရွာသားတွေလည်းရွာမပြန်ရဲသေးတာ။ တိုက်ပွဲက မဖြစ်တော့ဘူး။ တပ်သားတွေ တပ်ဆုတ်ရင်တော့ ပြန်လို့ရပါတယ်။ ပြန်ရင် စိတ်ပူရတာကတော့ မိုင်းကိစ္စပါပဲ” ဟု လုံးသန်းမောင် ကပြောသည်။
အစိုးရတပ်မတော်သည် အရပ်သားများနေထိုင်သည့်နေအိမ်အတွင်း တပ်များစွဲထားခြင်း၊ နေထိုင်ခြင်းတို့ ပြုလုပ်နေသည့်အပြင် ပြည်သူများ၏ အိုးအိမ်ပစ္စည်းများကိုလည်း ရှာဖွေ မွှေနှောက်ထားပြီး၊ အိမ်မွေးတိရိစ္ဆာန်များကို သတ်ဖြတ်စားသုံးထားကြောင်းလည်း စစ်ဘေးရှောင်များက ပြောဆိုသည်။
မကြာမီတွင်လည်း မြန်မာတဝှမ်းလုံး ၂၀၂၀ ပါတီစုံရွေးကောက်ပွဲကို ကျင်းပတော့မည်ဖြစ်နေချိန် သျှမ်းပြည်မြောက်ပိုင်း ကျောက်မဲမြို့နယ် အတွင်း စစ်ရေးဆက်လက်ပြင်းထန်လာမည်ကိုလည်း စိုးရိမ်ထိတ်လန့်နေကြသည်။
Leave a Comments