သျှမ်းပြည် မြောက်ပိုင်း ကျောက်မဲမြို့နယ် ခန်ခဲ (ခန်ခိုင်း) ကျေးရွာအုပ်စု အတွင်းတိုက်ပွဲကြောင့် တိမ်းရှောင်နေရသည့် စစ်ဘေးရှောင် (၇၀၀) ကျော် ခက်ခဲမှုများစွာ ကြုံတွေ့နေရကြောင်း စုံစမ်းသိရသည်။
အဆိုပါ စစ်ရှောင်များသည် ကျောက်မဲမြို့နယ် ပုံဝိုးကျေးရွာရှိ ဘုန်းကြီးကျောင်းတွင် (၂၀၀)ကျော်နှင့် တောင်ထိပ်ကျေးရွာတွင် (၅၀၀)ကျော် ခိုလှုံနေရကြောင်းသိရသည်။
လက်ရှိ အချိန်ထိ တိုက်ပွဲများဆက်လက်ဖြစ်ပွားနေသေးသဖြင့် စစ်ဘေးရှောင်ပြည်သူများ၏ စာရင်းကို အတိအကျမသိရှိရသေးပေ။
ကျောက်မဲမြို့နယ် ခန်ခဲကျေးရွာ အနီးတွင် အောက်တိုဘာ (၄)ရက် ညနေပိုင်းကသျှမ်းပြည်ပြန်လည်ထူ ထောင်ရေး ကောင်စီ၊ သျှမ်းပြည်တပ်မတော် (RCSS/SSA ) နှင့် အစိုးရတပ်မတော်တို့ တိုက်ပွဲဖြစ်ပွားရာ တိမ်းရှောင်လာကြသည့်ရွာသားများဖြစ်ကြကြောင်း ကျောက်မဲမြို့နယ် ပြည်နယ်မဲဆန္ဒနယ် အမှတ်(၁) လွှတ်တော်ကိုယ်စားလှယ် စိုင်းထွန်းဝင်း က သျှမ်းသံတော်ဆင့်ကို ပြောသည်။
“ပုံဝိုးဘုန်းကြီးကျောင်းမှာက ၂၀၀ ကျော်ရှိနေပြီ။ ဒီနေ့ကတော့ ခန်ခိုင်းရွာမှာကျန်နေတဲ့ လူ ၁၀၀ ကျော်ကို ထပ်သွားခေါ်ဖို့ရှိတယ်။ ဒါပေမယ့် သွားဖြစ်မလားတော့မသေချာသေဘူး။ တောင်ထိပ်မှာလည်း လူ ၅၀၀ ကျော်လောက်တော့ရှိသေးတယ်” ဟု စိုင်းထွန်းဝင်း က ပြောသည်။
လက်ရှိ စစ်ဘေးရှောင်များစွာ ရှိနေသည့် အတွက် နေရာကြပ်တည်းခြင်း၊ စားဝတ်နေရေး ခက်ခဲခြင်းတို့ စတင်ကြုံတွေ့နေရကြောင်း လည်း စိုင်းထွန်းဝင်း က ပြောသည်။
“အားလုံးက ဘုန်ကြီးကျောင်းမှာဘဲနေရတာ။ နေရာကတော့ ကြပ်တည်းမှု ရှိတယ်။ အစားအသောက်ခါကြတော့ ဆက်သွယ်မှုလိုင်းကောင်းနေတော့ အဆင်ပြေမှု ရှိပါတယ်။ ဒါပေမယ့် တောင်ထိပ်ကျေးရွာမှာတော့ ခက်ခဲမှုကတော့ ရှိနေတယ်” ဟု စိုင်းထွန်းဝင်းက ဆိုသည်။
တိုက်ပွဲများ ဆက်တိုက်ဖြစ်ပွားနေပါက စစ်ဘေးရှောင်ပြည်သူများ စားဝတ်နေရေး အခက်အခဲများစွာ ဆက်လက်ကြုံတွေ့လာနိုင်ကြောင်း၊ တိုက်ပွဲကြောင့် နေအိမ်ကို ပစ်ထားရပြီး တရွာလုံးထွက်ပြေးလာရကြောင်းလည်း စစ်ရှောင် အမျိုးသား တဦးက သျှမ်းသံတော်ဆင့် ကို ပြောသည်။
“ဒီလိုမျိုး စစ်ပွဲတွေထပ်ဖြစ်နေမယ်ဆိုရင် ကျနော်တို့ရဲ စားဝတ်နေရေး အတွက်တော့ အခက်ခဲတွေ အများကြီးရှိလာနိုင်တယ်။ ဒီလိုစစ်ဖြစ်တာကတော့ မကောင်းဘူး။ ကျနော်တို့အတွက်လည်းမကောင်းဘူး။ အခုဆို အိမ်တွေကို ပစ်ထားရတယ်” ဟု ပုံဝိုးကျောင်းတွင် ရောက်ရှိနေသည့် အမျိုးသားတဦး ကပြောသည်။
ယခုကဲ့သို့တိုက်ပွဲများဖြစ်ပွါးနေခြင်းသည် ပြည်သူများအတွက် များစွာ ထိခိုက်ပြီး၊ အဓိက အနေဖြင့် စားဝတ်နေရေး အတွက် ထိခိုက်နေကြောင်း လည်း ၎င်းအမျိုးသားက ပြောသည်။
စက်တင်ဘာလကုန်အထိ တဖက်သတ်အပစ်ရပ် ရက်ထပ်တိုးမည်ဖြစ်ကြောင်းအစိုးရတပ်မတော်၏ ပြန်ကြားရေးဌာနက ပြီးခဲ့သည့်အပတ်ကပင် ကြေငြာခဲ့သော်လည်း ကျောက်မဲမြို့နယ်အတွင်းတိုက်ပွဲသည် ယနေ့ (အောက်တိုဘာ ၆ ရက်) နေ့လည်ပိုင်းထိ ဆက်လက်ဖြစ်ပွားနေဆဲဖြစ်သည်ဟု လည်း သိရသည်။
နိုဝင်ဘာ ၈ ရက်တွင် ၂၀၂၀ ခုနှစ် ပါတီစုံ ဒီမိုကရေစီ ရွေးကောက်ပွဲ ကျင်းပမည်ဖြစ်ရာ ရွေးကောက်ပွဲ ကို ထိခိုက်လာမည်ကိုလည်း စိုးရိမ်နေကြကြောင်း ၊ လက်ရှိ တိုက်ပွဲသည် ရွေးကောက်ပွဲ နှင့် သက်ဆိုင်နေမလားဟု မေးခွန်းထုတ်စရာဖြစ်နေကြောင်း လွှတ်တော်ကိုယ်စားလှယ်များနှင့်နိုင်ငံရေးစောင့်ကြည့်လေ့လာသူများက သုံးသပ်ပြောဆိုနေကြသည်။
အလုပ်သင် သတင်းထောက် စိုင်းဆိုင်လှိုင်းရေးသားသည်။
Leave a Comments