သျှမ်းပြည်တွင်းရှိ ကုန်စည်စီးဆင်းမှု ရပ်တန့်မသွားစေရန်အတွက် ကုန်တင်ယာဉ်မောင်း နှင့် နောက်လိုက်များကို ကျန်းမာရေး စစ်ဆေးမှုများ ပြုလုပ်ပေးမည်ဖြစ်ကြောင်း သျှမ်းပြည်အစိုးရထံမှ စုံစမ်းသိရှိရသည်။

သျှမ်းပြည်အတွင်းမှ ကုန်တင်ယာဉ်များ အခြားတိုင်းဒေသကြီး/ပြည်နယ် များသို့ ထွက်ခွာခွင့်ကို ၂၀၂၀ ပြည့်နှစ် အောက်တိုဘာ ၁ ရက်နေ့မှ ၁၄ ရက်ထိ ခေတ္တရပ်နားထားမည်ဖြစ်ကြောင်း သျှမ်းပြည်အစိုးရက ထုတ်ပြန်ခဲ့သည်။

ယင်းကိစ္စ နှင့် ပတ်သက်ပြီး ယနေ့ စက်တင်ဘာ (၂) ရက်နေ့တွင် သျှမ်းပြည်တွင်းရှိ မိတ္တီလာ-တောင်ကြီး ပြည်ထောင်စု လမ်းမပေါ်တွင် ဝင်လာမည့် ကုန်တင်ကား ၁၀၀ ကျော် ပိတ်မိနေကြောင်း စုံစမ်းသိရှိရသည်။

ထိုပြဿနာနှင့်ပတ်သက်ပြီး ပြည်ထောင်စု ဝန်ကြီး ကို တင်ပြခဲ့ပြီး ဝန်ကြီး၏ ညွှန်ကြားချက် အရ ကုန်တင်ကား ယာဉ်မောင်းနှင့် ယာဉ်နောက်လိုက်များ၏ ကျန်းမာရေး စစ်ဆေးမှုကို ကိုးရီးယား နိုင်ငံထုတ် MoHS အသိအမှတ်ပြု rapid test kits များနှင့် စ်စဆေးပြီး ကုန်စည် စီဆင်းမှု ရပ်တန့်မသွားအောင် ဆောင်ရွက်သွားမည် ဟု သျှမ်းပြည် အစိုးရ ပြောရေးဆိုခွင့်ရှိသူ ပြည်နယ် စီမံကိန်း နှင့် ဘဏ္ဍရေး ဝန်ကြီး ဦးစိုးညွှန့်လွင် က ၎င်း၏ လူမှုကွန်ရက်မှာ ရေးသားခဲ့သည်။

“ Test kit ကို အောက်တိုဘာ (၁) ရက်မှာ ပေးပို့လာပြီ” ဟု ဦးစိုးညွှန့်လွင် က ရေးသားထားသည်။

Rapid test kit သည် ကိုဗစ် -၁၉ ပိုး ရှိ/မရှိ စစ်ဆေးမှုကို လက်ရှိတွင် ရန်ကုန်တိုင်းဒေသကြီး အတွင်းမှာ စတင်အသုံးပြု ဆောင်ရွက်နေပြီဖြစ်ပြီး နာရီဝက်အတွင်း အဖြေရရှိနိုင်သည်ဟု သိရသည်။

စက်တင်ဘာ ၂၉ ရက်နေ့က မူဆယ် (၁၀၅) မိုင် ကုန်သွယ်ရေးဇုန်တွင် ကုန်တင်ကား သမားတစ်ဦးထံ ကိုဗစ်-၁၉ တွေ့ရှိပြီးနောက် ယခုကဲ့သို့ တင်းကြပ်လိုက်ခြင်း ဖြစ်ကြောင်း သိရသည်။

သျှမ်းပြည်အတွင်းသို့ အခြားတိုင်းဒေသကြီး/ပြည်နယ်များမှ ကုန်တင်ယာဉ်များ ဖြတ်သန်းဝင်ရောက်ပါက ကုန်တင်ယာဉ်မောင်း နှင့် ယာဉ်နောက်လိုက်များတွင် ကျန်းမာရေး နှင့် အားကစား ဝန်ကြီးဌာန က (၂) ပတ်အတွင်း ထုန်ပေးထားသည့် ကိုဗစ်-၁၉ ရောဂါ ကင်းရှင်းကြောင်း (Negative) ထောက်ခံချက် ပါရှိမှသာ ဝင်ရောက်ဖြတ်သန်းခွင့်ပြု မည်ဖြစ်ကြောင်း သျှမ်းပြည်နယ် အစိုးရက ထုတ်ပြန်ထားသည်။

သျှမ်းပြည်နယ် တစ်ဝှမ်းလုံးတွင် ကိုဗစ်-၁၉ ကူးစက်သူ စုစုပေါင်း ၂၉ ဦးရှိပြီး သျှမ်းပြည်တောင်းပိုင်းမှာ အတည်ပြု လူနာ ၁၈ ဦးရှိကာ လက်ရှိ ဆေးကုသမှု ခံယူနေသည့် အတည်ပြု လူနာ (၆) ဦးရှိထားကြောင်း သျှမ်းပြည်နယ် ပြည်သူ့ ကျန်းမာရေး ဦးစီးဌာနမှ လက်ထောက်ညွှန်ကြားရေးမှူး ဒေါက်တာ ဇဝနကို ကပြောသည်။

မြန်မာနိုင်ငံတွင် ကိုဗစ်-၁၉ လူနာ စုစုပေါင်း (၁၄၃၈၃)ဦး ထိမြင့်တက်လာပြီး၊ ကိုဗစ်-၁၉ ကြောင့် သေဆုံးသူ (၃၂၁)ဦး ရှိကြောင်း ကျန်းမာရေး နှင့် အားကစား ထုတ်ပြန်ချက်အရ သိရသည်။