သျှမ်းပြည်တောင်ပိုင်း တောင်ကြီးမြို့နယ် သံတဲတိုက်နယ်အတွင်းရှိ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ကျားခေါင်းပါတီ ဆိုင်းဘုတ်ဖျက်ဆီးခံရကြောင်း စုံစမ်းသိရှိရသည်။
SNLD ဆိုင်းဘုတ်အား စက်တင်ဘာ ၂၂ ရက် ည ၁၀ နာရီဝန်းကျင်က ဖျက်ဆီးခံရခြင်းဖြစ်ကြောင်း၊ ညတွင်းချင်း လိုက်လံစုံစမ်းရာ တရားခံ ရှာတွေ့ ခဲ့ကြောင်း တောင်ကြီးမြို့နယ် အလုပ်အမှုဆောင်အဖွဲ့ဝင် တွဲဘက်အတွင်းရေးမှူး စိုင်းခမ်းသီ က သျှမ်းသံတော်ဆင့် ကိုပြောသည်။
“တိုက်နယ်မှာက ၁၁ ရွာရှိတယ်။ အဲ့ ၁၁ ရွာထဲက ကုံးမုံ့ရွာဆိုတာ ရှိတယ်။ အဲ့ ကုံးမုံ့ရွာက ကောင်လေးတွေပါ။ ဒီမနက်တော့ အိမ်ကို လာတောင်းပန်တယ်။ ၅ ဦး လာလုပ်သွားတယ်။ ရည်ရွယ်ချက် နဲ့ လုပ်တာ မဟုတ်ဘဲ အရက်မူးပြီးတော့ ဒီတိုင်းလုပ်မိသွားတယ်လို့ပဲ ဖြေပါတယ်” ဟု စိုင်းခမ်းသီ က ပြောသည်။
တောင်ကြီးမြို့နယ်တွင်း ဝင်ရောက်ယှဉ်ပြိုင်မည့် ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ပါတီ၏ ကိုယ်စားလှယ်လောင်း ၅ ဦး၏ ဆိုင်းဘုတ်တည်ထောင်ထားရာ ကိုယ်စားလှယ်လောင်း တစ်ဦး၏ ပုံရိပ်ကို ခဲဖြင့်ပေါက်ထားကြောင်း သိရသည်။
“တမင်တကာ ရည်ရွယ်ပြီးမှ လုပ်တယ်လို့တော့ ကျနော်တို့က ထင်ပါတယ်။ တဦးတယောက် က ခိုင်းစေမှုနဲ့ ဖြစ်တယ်လို့ ယူဆပါတယ်” ဟု စိုင်းခမ်းသီ ကပြောသည်။
ထိုကိစ္စနှင့် ပတ်သက်ပြီး ရွေးကောက်ပွဲ ကော်မရှင် ကို တိုင်ကြားသွားမည် ဟု စိုင်းခမ်းသီ က ပြောသည်။
“ဒီလိုမဖြစ်အောင်တော့ အားလုံးက ဝိုင်းဝန်းပြီးတော့ တားဆီးသင့်တာပေါ့။ မြို့နယ် ဂုဏ်သိက္ခာတွေလည်း ကျဆင်းတယ်။ တိုက်နယ်က ဂုဏ်သိက္ခာလည်း ကျဆင်းတယ်။ ဒီလိုမဖြစ်အောင်လည်း ဝိုင်းဝန်းပြီးတော့ လုပ်စေချင်ပါတယ်” ဟုလည်း စိုင်းခမ်းသီ က ဖြည့်စွက်ပြောသည်။
တောင်ကြီးမြို့နယ် သံတဲတိုက်နယ်တွင် အမျိုးသား ဒီမိုကရေစီအဖွဲ့ချုပ် ( NLD) ၊ ရှမ်းတိုင်းရင်းသားများ ဒီမိုကရေစီအဖွဲ့ချုပ် ( SNLD) ၊ ကြံ့ခိုင်ရေးပါတီ၊ ပြည်သူ့ပါတီ၊ ပြည်သူ့ကောင်းကျိုးဆောင်ပါတီ၊ တိုင်းရင်းသားစည်းလုံးညီညွတ်ရေး ပါတီ နှင့် ပအိုဝ်းအမျိုးသားပါတီ တို့ ဝင်ရောက်ယှဉ်ပြိုင်သွားမည်ဟု သိရသည်။
