ကျောက်မဲမြို့သို့ရောက်ရှိခိုလှုံနေကြသည့် ကျေးလက်ဒေသမှ စစ်ဘေးရှောင် ဒုက္ခသည် ၂၀၀ကျော် မှာ နေရပ် မပြန်နိုင်သေးဘဲ ကျောက်မဲ မြို့ ပေါ်တွင် အိမ်၊ အခန်းငှားနေထိုင်နေကြရကြောင်း သတင်းရရှိသည်။

ကျောက်မဲမြို့နယ် ကွန်ကော် ကျေးရွာ၊ တော့ဖယ် ကျေးရွာ မှစစ်ဘေးရှောင်လူထုများဖြစ်ကြပြီး လက်ရှိတွင် တိုက်ပွဲ ငြိမ်နေသော်လည်း ၄င်းတို့ရွာအနီးတဝိုက် တပ်ဖွဲ့ ၂ ဖွဲ့လုံးမှ ဖြတ်သန်းသွားလာနေကြသဖြင့် အချိန်မရွေး တိုက်ပွဲများပြန်ဖြစ်လာမည်ကိုစိုးရိမ်နေကြကြောင်း စစ်ဘေးရှောင်များကပြောသည်။

ကျောက်မဲ နမ့်ခုံး ပရဟိတ အသင်း မှ ဦးလုံးသိန်းငွေက- “ အခု ကျောက်မဲ စစ်ရှောင်တွေ ခိုလှုံနေတဲ့ ဘုန်း ကြီးကျောင်းကလည်း သူတို့ကိုလက်မခံတော့ဘူး။ တချို့ကိုတော့ နေရပ် ပြန်ပို့ပြီ။ ဒီ ကျန်တဲ့အဖွဲ့ကတော့ မပြန်ရဲ သေးတာ။ ၂၀၀ ကျော်ရှိမယ်။ တချို့ က အမျိုးတွေအိမ်မှာသွားပြီးခိုလှုံနေကြတယ်။ တချို့ကလည်းအမျိုးမရှိတော့ အိမ်ငှားနေကြရတယ်” ဟု ဆိုသည်။

အိမ်ငှား စရိတ်မှာ ကျပ်ငွေ ၂သောင်း မှ ၆သောင်း ရှိပြီး၊ လက်ရှိမှာတော့ နေ့စား ဝင်ငွေ တရက်လျှင် ၅၀၀၀ ကျပ်ဖြင့် အလုပ်လုပ်နေကြသည် ဟုလည်း သိရသည်။

တော့ဖယ်ကျေးရွာမှ စစ်ရှောင် တဦး က “ ဝင်ငွေ မရှိဘဲ ရက်ရှည်နေလာတော့ အခက်အခဲရှိလာတယ်။ ပြန်မယ်ဆိုတော့လည်း တိုက်ပွဲတွေ ဖြစ်နေသေးတယ်။ ၂ ဖွဲ့လုံးက ရွာနားတဝိုက်သွားလာနေသေးတယ်။ အဲတာကြောင့် အခု မြို့ထဲမှာအိမ်ငှားပြီးနေနေရတယ်။ သင်္ကြန်မတိုင်ခင်ကတည်းကဘဲ” ဟု ပြောပါသည်။

သျှမ်းပြည်ပြန်လည်ထူထောင်ရေး ကောင်စီ၊ သျှမ်းပြည် တပ်မတော် (RCSS/SSA ) နှင့် တအာင်း (ပလောင်) TNLA တို့သည် မတ်လကတည်းက တိုက်ပွဲများ ဖြစ်ပွားမှုကြောင့် ကျေးလက်ဒေသခံများမှာ မြို့ပေါ်သို့ထွက်ပြေးတိမ်းရှောင်ခဲ့ကြသည်။

လက်ရှိတွင်လည်း အစိုးရတပ်မတော် သည် သျှမ်းပြည်တိုးတက်ရေးပါတီ SSPP/SSA အား လည်းကောင်း၊ တအာင်းတပ်မတော် TNLA အားလည်းကောင်း မေလ ဆန်းပိုင်းမှ စ၍ တိုက်ပွဲများ ပြန်ဖြစ်လာသည်။