သျှမ်းပြည်မြောက်ပိုင်း ကျောက်မဲမြို့နယ် အတွင်း အစိုးရစစ်တပ်မှ ကျူးလွန်သည့် လူ့အခွင့်အရေး ချိုးဖောက်မှု ကိစ္စကို ပွင့်လင်းမြင်သာစွာ တရားစီရင်ပေးရန် ဒေသခံများ တောင်းဆိုလိုက်သည်။
ကျောက်မဲမြို့နယ် ဟိုင်းကွီကျေးရွာအုပ်စု ပန်ကျန်ရွာတွင် ပြီးခဲ့သည့် ဇွန်နှောင်းပိုင်း က အစိုးရ တပ်မတော်မှ အရပ်သားတဦးကို သေနတ်ဖြင့် ပစ်သတ်ခဲ့ပြီး၊ ရွာသူတဦးကျည်ဆံထိမှန်ကာ အရပ်သား ဦးအိုက်မောင်ဆိုသူကိုလည်း ရိုက်နှက် ခဲ့သည်။
ထိုဖြစ်စဉ်နှင့် ပတ်သက်ပြီး ဇူလိုင် ၁၅ ရက်က အရှေ့မြောက်ပိုင်းတိုင်း စစ်ဌာနချုပ် လက်အောက်ခံ တပ်မမှူး အဆင့်ရှိ အရာရှိများ နှင့် မြို့နယ် အုပ်ချုပ်ရေးမှူး တို့ စုံစမ်းစစ်ဆေးရေးအဖွဲ့များ နှင့် အတူ ဟိုင်းကွီကျေးရွာအုပ်စု ပန်ကျန်ရွာသို့ ရောက်ရှိပြီး ဖြစ်စဉ်များ စုံစမ်းခဲ့သည်။
ထိုစုံစမ်းစစ်ဆေးမှုပြီးနောက် တိုက်ပွဲအတွင်း စစ်တပ်ဘက်မှ အမှန်တကယ် မှားယွင်းပစ်ခတ်မိ ခဲ့ခြင်းဖြစ်ကြောင်း တပ်မတော် သတင်းမှန် ပြန်ကြားရေး မှ ပြောရေးဆိုခွင့်ရှိသူ ဗိုလ်မှူးချုပ် ဇော်မင်းထွန်း က RFA သတင်းဌာနကို ဖြေကြားခဲ့သည်။
အဆိုပါကိစ္စနှင့် ပတ်သက်ပြီး ဗိုလ်မှူးချုပ်ဇော်မင်းထွန်းကို သျှမ်းသံတော်ဆင့် သတင်းဌာန မှသီးသန့်အင်တာဗျူးရန် ဆက်သွယ်ခဲ့သော်လည်း ဖုန်းကိုင်ခြင်းမရှိခဲ့ပေ။
ဟိုင်းကွီရွာ ဒေသခံ စိုင်းထွေးဟန် က “တိုက်ပွဲကြောင့် သေကြေသွားတယ် ထိခိုက် ဒဏ်ရာ ရသွားတယ်ဆိုတာ လုံးဝ မဟုတ်ပါဘူး။ လုံးဝ မဟုတ်တဲ့ဟာကို သူတို့က တိုက်ပွဲထဲမှာ လို့ပြောတယ် ။ သူတို့ တာဝန်ယူမှုကို ငြင်းဆန်တာပဲလို့ မြင်ပါတယ်” ဟု သျှမ်းသံတော်ဆင့် ကိုပြောသည်။
နှစ်ဖက် တိုက်ပွဲ ဖြစ်ပွားမှုကြောင့် ပန်ကျန်ရွာမှ ဒေသခံ အမျိုးသား သေနတ်ပစ်ခံရခြင်းမဟုတ်ကြောင်း၊ ထိုနေ့တွင် တိုက်ပွဲ ဖြစ်ပွားခြင်းမရှိဘဲ အစိုးရ တပ်မတော် ဘက်မှ တဖက်သတ် ပစ်ခတ်မှုကြောင့် သေဆုံးသွားရခြင်းဖြစ်ကြောင်း ဟိုင်းကွီ ဒေသခံများက ပြောသည်။
“တိုက်ပွဲကြားထဲမှာ ပစ်ခံရတာမဟုတ်ဘူးဆိုတာ အားလုံးသိရပြီးသား၊ စစ်တပ်လည်း သိတယ်။ ဒေသခံတွေလည်းသိတယ်” ဟု စိုင်းထွေးဟန် က ဆိုသည်။
ဟိုင်းကွီကျေးရွာ ပန်ကျန်ရွာသား သေနတ်ပစ်သတ်ခံရသည့် အမှုနှင့် ပတ်သက်ပြီး အစိုးရတပ်မတော်မှ ကျူးလွန်သည့် တပ်သားများကို အရေးယူသွားမည်ဖြစ်ကြောင်း၊ ထို့ပြင် ကျူးလွန်သည့်တပ်သားသည် တိုက်ပွဲအတွင်း သေဆုံးခဲ့ကြောင်းလည်း ဗိုလ်မှူးချုပ် ဇော်မင်းထွန်း က ပြောဆိုထားသည်။
ထိုကိစ္စနှင့် ပတ်သက်ပြီး ကျောက်မဲမြို့နယ် မဲဆန္ဒနယ် အမှတ်(၁) လွှတ်တော်ကိုယ်စားလှယ် စိုင်းထွန်းဝင်း က “ သူတို့ရဲ့ တပ်သား ပစ်သတ်သွားတယ်ဆိုတာ သူတို့ဘက်က ဝန်ခံသွားတယ်။ ဒါပေမယ့် ပစ်တဲ့သူက တိုက်ပွဲတွင်း သေဆုံးသွားပြီလို့ပြောတယ် ဒါဟာ အခြေအမြစ်မရှိတဲ့ စကားဖြစ်တယ်”ဟု သျှမ်းသံတော်ဆင့်ကိုပြောသည်။
အစိုးရ တပ်မတော် ဘက်မှာ ပြည်သူကို ပစ်သတ်ခဲ့သည့် တပ်သားကို အရေးယူပါက ပွင့်လင်းမြင်သာမှု ရှိစေချင်ကြောင်း၊ စစ်တပ်ဘက်မှ မြေပြင်ကွင်းဆင်းစစ်ဆေးမှုသည် အောက်ခြေထိ မရောက်ရှိကြောင်း လည်း စိုင်းထွန်းဝင်း ကပြောသည်။
“ စစ်တပ်ဘက်က ကွင်းဆင်းစစ်ဆေးတာ အောက်ခြေထိ လာရောက် စစ်ဆေးခြင်း မရှိဘူး။ အောက်ခြေအထိ အချက်အလက်တွေကို လာရောက်စုံစမ်းမေးမြန်းသင့်တယ်” ဟု စိုင်းထွန်းဝင်း က ဆိုသည်။
ကျူးလွန်ခဲ့သည့် တပ်သားကို စစ်ဥပဒေဖြင့် အရေးယူသွားမည် ဟု လည်း ဗိုလ်မှူးချုပ် ဇော်မင်းထွန်း က RFA ကို ပြောဆိုခဲ့သည်။
ထို့ကြောင့် တပ်မတော် မှကျူးလွန်သည့် ကိစ္စဖြစ်သည့်အတွက် စစ်တပ်ဥပေဒ နှင့် ပတ်သက်ပြီး ဒေသခံများက ရှင်းရှင်းလင်းလင်းသိချင်ကြောင်း၊ စစ်တပ်မှ ရေးဆွဲထားသည့် ဥပဒေကို ပြည်သူများ အားချပြခြင်းမရှိသည့် အတွက် စစ်ဥပဒေ ဖြင့် မသွားချင်ကြောင်းလည်း ဟိုင်းကွီ ဒေသခံများက ပြောသည်။
“ စစ်တပ်ဥပဒေမှာ ဘာတွေ ရေးဆွဲထားတယ်ဆိုတာ သူတို့ ချပြထားတာမရှိဘူး။ အဲ့အတွက်ကြောင့်မလို့ ကျနော်တို့ကတော့ ဒီဟာကို စစ်ဥပဒေ နဲ့ မသွားစေချင်ဘူး” ဟု စိုင်းထွေး ဟန်က ပြောသည်။
ဆက်လက်ပြီး လူ့အခွင့်အရေး ကာကွယ်စောင့်ရှောက်ရေး ကော်မတီ အနေဖြင့် လည်း ကျန်ရှိနေသည့် မိသားစု အပေါ် တာဝန် အပြည့်အဝ ယူပြီး၊ လူမှုရေး၊ ပညာရေး၊ ကျန်းမာရေး အစ တာဝန်ယူစေချင်ကြောင်းလည်း ဟိုင်းကွီ ဒေသခံများ က ဆိုသည်။
အစိုးရ တပ်မတော် မှ ရွာအတွင်း ဝင်ရောက်ကာ ဒေသခံများကို ဖမ်းဆီးရိုက်နှက် ပစ်ခတ်သည့် ကိစ္စနှင့် ပတ်သက်ပြီး ဇူလိုင် ၁၀ ရက် တွင် ကျောက်မဲမြို့နယ် ဟိုင်းကွီ ကျေးရွာအုပ်စု အတွင်း သေနတ်ပစ်ခံရသည့်သူ၊ ဖမ်းဆီးရိုက်နှက်ခံရသူများအတွက် တရားမျှတမှု ရရှိစေရန် ဒေသခံထောင်ချီတို့က ဆန္ဒထုတ်ဖာ်ခဲ့ကြကြောင်း သိရသည်။
