လာမည့် ၂၀၂၀ ရွေးကောက်ပွဲတွင် လျှပ်စစ်မီး နှင့် ဆက်သွယ်ရေးလိုင်းများ မရသည့် မဲရုံများတွင် မဲ မသမာမှု ဖြစ်လာနိုင်မည်ကို စိုးရိမ်နေကြကြောင်း သျှမ်းပြည်တွင်း တက်ကြွလှုပ်ရှားသည့် လူငယ်များက ပြောဆိုကြသည်။

တောင်ကြီးခရိုင်အတွင်း လျှပ်စစ်မီး မရရှိသေးသည့် မဲရုံ (၂၀၀) ကျော် နှင့် ဆက်သွယ်ရေး မရသည့် မဲရုံ (၅၄) ရုံ ရှိကြောင်း တောင်ကြီးခရိုင် ရွေးကောက်ပွဲ ကော်မရှင် အဖွဲ့ခွဲ အရာရှိ ဦးသန်းဇော်ဦး က ပြောသည်။

“မဲရုံတွေ လျှပ်စစ်မီး မရတဲ့အပေါ်မှာ ဆိုးကျိုးတွေ အများကြီးဖြစ်နိုင်တယ်။ ဘာကြောင့်လဲဆိုတော့ မီး တွေ လမ်းပန်းဆက်သွယ်ရေး မကောင်းတဲ့အတွက် မဲ မသမာမှု တွေ၊ ခြိမ်းခြောက်မှုတွေက အစ ဖြစ်လာနိုင်တယ်” ဟု သျှမ်းလူငယ်တက်ကြွလှုပ်ရှားသူ စိုင်းဦး က သျှမ်းသံတော်ဆင့် ကို ပြောသည်။

လမ်းပန်း ဆက်သွယ်ရေး မကောင်းမွန်ပါက လမ်းမှ တဆင့် မဲအလှဲအလှယ်မှုများဖြစ်လာနိုင်ပြီး၊ လမ်းတွင် မဲပျောက်မှုများဖြစ်လာနိုင်ကြောင်း စိုင်းဦးက ထောက်ပြ ပြောဆိုလိုက်သည်။

ထို မီးမရရှိသေးသည့် မဲရုံ နှင့် ဆက်သွယ်ရေး မရသည့် မဲရုံများသည် တောင်ကြီးခရိုင် အတွင်းရှိ မြို့နယ် (၅)မြို့နယ် မှ မဲရုံများ ဖြစ်ကြောင်း သိရသည်။

မီးမရှိ၊ လမ်းပန်းဆက်သွယ်ရေး မကောင်းပါက မဲမသမာမှု ဖြစ်လာနိုင်ကြောင်း၊ များသောအားဖြင့် အုပ်ချုပ်ရေး လက်လှမ်းမမှီသည့် နေရာများတွင် ဖြစ်လေ့ဖြစ်ထရှိကြောင်း သျှမ်းပြည်အခြေစိုက် မြန်မာ့ ငြိမ်းချမ်းရေး နှင့် လုံခြုံရေး သိပ္ပံ မှ ကိုဝင့်ထည်ကောင်းမြတ် က သျှမ်းသံတော်ဆင့် ကိုပြောသည်။

လမ်းပန်းနှင့် ဆက်သွယ်ရေးလိုင်း မကောင်းသည့်အတွက် “အရင်ကဆိုရင် တရွာလုံးကိုယ်စား အုပ်ချုပ်ရေးမှူး တယောက်ကပဲ မဲပေးသွားတဲ့ကိစ္စမျိုးရှိတယ်။ ပါတီ တခုကိုပဲ မဲပေးရမယ့် ကိစ္စအဲလိုတွေရှိခဲ့တယ်” ကိုဝင့်ထည်ကောင်းမြတ်က ဆိုသည်။

လမ်းပန်းဆက်သွယ်ရေး မကောင်းသည့်နေရာများကို ရွေးကောက်ပွဲစောင့်ကြည့်လေ့လာမှု အားကောင်းပီး ကျေးရွာအထိ ဆင်းနိုင်မှာသာလည်း မဲမသမာမှု ဖြစ်နိုင်ခြေနည်းမည် ဟု ကိုဝင့်ထည်ကောင်းမြတ် က ပြောသည်။

သျှမ်းပြည်တဝှမ်း တွင် မီးမရသေးသည့် မဲရုံနှင့် လမ်းပန်းဆက်သွယ်ရေး မကောင်းသည့် မဲရုံများ မဲသမာမှု မဖြစ်လာအောင် ကြိုတင်ပြင်ဆင်မှုများပြုလုပ်သင့်ကြောင်းလည်း သျှမ်းလူမှုအဖွဲ့အစည်းများက ပြောဆိုလိုက်သည်။

မြန်မာနိုင်ငံတွင် ပါတီစုံအထွေထွေ ရွေးကောက်ပွဲကို ၂၀၁၀ခုနစ် နိုဝင်ဘာတွင် တကြိမ်၊ ၂၀၁၅ခုနစ် နိုဝင်ဘာတွင် တကြိမ် နှင့် ကြားဖြတ်ရွေးကောက်ပွဲများလည်း ကျင်းပခဲ့သော်လည်း မဲရုံပြင်ဆင်မှုမှာ ယနေ့ချိန်ထိ အားနည်းနေသေးကြောင်းလည်း သျှမ်းလူထုများက ပြောဆိုလိုက်သည်။

“ မီးတွေ မရတာဟာ ကော်မရှင်တွေ စိစစ်မှု အားနည်းတယ်လို့ပဲ မြင်ပါတယ်။ ဒါကတော့ သဘာဝ ကျကျ လက်တွေ့စဉ်းစားလို့ရှိရင် မဲဆန္ဒရှင်တွေရဲ့ လုံခြုံမှုတွေ ကအစ ဒါက မဖြစ်သင့်တဲ့အရာပါ” ဟု စိုင်းဦး က ထပ်လောင်းပြောသည်။

ယနေ့ချိန်ထိ မီးမရသေးသည့် မဲရုံ၊ ဆက်သွယ်ရေးမကောင်းသေးသည့် မဲရုံရှိနေမှုသည့် ယခင် လွှတ်တော်ကိုယ်စားလှယ်များ၏ လုပ်ဆောင်ချက်များအားနည်းသလို၊ အစိုးရဘက်မှလည်း မူဝါဒ ချမှတ်ထားပြီး အကောင်အထည်ဖော်ခြင်း မရှိကြောင်းကို တေ့ွရသည် ဟု စိုင်းဦးက ထောက်ပြပြောဆိုလိုက်သည်။

ဆက်လက်ပြီး သျှမ်းပြည် အတွင် နယ်မြေ အခြေအနေ အရ လုံခြုံရေး မကောင်းသည့် မဲရုံများကိုလည်း တပ်မတော် နှင့် ရဲတပ်ဖွဲ့တို့က မဲလာရောက်ပေးသည့်သူများကို လုံခြုံအောင် ဆောင်ရွက်ပေးသွားမည်ဟု သိရသည်။

လာမည့် ၂၀၂၀ ခုနှစ် ပါတီစုံ ဒီမိုကရေစီ အထွေထွေ ရွေးကောက်ပွဲတွင် သျှမ်းပြည်တွင်းရှိ မဲရုံပေါင်း (၃၅၀၀) ကျော် ထားရှိမည်ဖြစ်ကြောင်း သိရသည်။