လာမည့် ၂၀၂၀ ခုနှစ် ပါတီစုံ ဒီမိုကရေစီ အထွေထွေရွေးကောက်ပွဲ တွင် သျှမ်းပြည်တွင်းရှိ မဲရုံပေါင်း ၃၅၀၀ ကျော် ထားရှိမည်ဖြစ်ကြောင်း သိရသည်။
သျှမ်းပြည်တွင်းရှိ မဲရုံအရေအတွက် (၃၆၇၆) ခန့်ရှိပြီး အတိုးအလျော့ ဆက်လက်ရှိသွားမည်ဖြစ်ကြောင်း သျှမ်းပြည်နယ် ရွေးကောက်ပွဲ ကော်မရှင် အဖွဲ့ခွဲ ဥက္ကဋ္ဌ ဦးထင်ကျော် က ပြောသည်။
“မဲရုံတွေထဲမှာ အပြီးသတ်တော့မဟုတ်သေးဘူး။ ကြားထဲမှာ ပြင်ဆင်တာတွေရှိတယ်” ဟု ဦးထင်ကျော် က ပြောသည်။
တပ်မတော်သားနှင့် တပ်မိသားစု မဲဆန္ဒရှင်များကို ရပ်ကျေးနှင့် ပေါင်းလိုက်သည့်အတွက် မဲရုံ ပြန်လျော့သွားတာ ရှိသလို တချို့နေရာတွင် လည်း လိုအပ်ချက်အရ ထပ်တိုးပေးရတာရှိကြောင်း အတိုးအလျော့ အနည်းအငယ် ရှိမည်ဖြစ်ကြောင်း သိရသည်။
“လုံခြုံရေးကတော့ သက်ဆိုင်ရာ ထွေအုပ် ဦးစီးဌာန နဲ့ မြန်မာနိုင်ငံ ရဲတပ်ဖွဲ့ နဲ့ ပူးပေါင်းပြီးတော့မှလုံခြုံရေးစီမံချက်တွေ ရေးဆွဲပြီးတော့ ဆောင်ရွက်မှာပါ” ဟု သျှမ်းပြည်နယ် ရွေးကောက်ပွဲ ကော်မရှင် အဖွဲ့ခွဲ ဥက္ကဋ္ဌ ဦးထင်ကျော် က ပြောသည်။
လာမည့် ၂၀၂၀ ပါတီစုံ ဒီမိုကရေစီ အထွေထွေရွေးကောက်ပွဲသည် ကိုဗစ်-၁၉ ကာလလည်း ဖြစ်သည့်အတွက် ဘယ်လို ပုံစံ ဖြင့် မဲပေးရမည်ကို တိတိကျကျ မပြောနိုင်သေးကြောင်း လည်း သျှမ်းပြည် ရွေးကောက်ပွဲ ကော်မရှင်ထံမှ သိရသည်။
၂၀၁၅ ခုနှစ် ပါတီစုံ အထွေထွေ ဒီမိုကရေစီ ရွေးကောက်ပွဲ ကာလသည် မဲရုံပေါင်း (၃၃၃၁) ခုထားရှိပြီး ၂၀၂၀ ရွေးကောက်ပွဲသည် ၂၀၁၅ ထက် မဲရုံပေါင်း ၉ ရာခိုင်နှုန်း ပိုမိုများလာကြောင်း သိရသည်။
Leave a Comments