သျှမ်းပြည်မြောက်ပိုင်း သီပေါမြို့တွင် နေအိမ်တစ်ခုအတွင်း ဓားဒဏ်ရာနှင့် အမျိုးသမီး တစ်ဦး သေဆုံးမှုဖြစ်ပွားခဲ့ကြောင်း သတင်းရရှိသည်။
ယနေ့ သြဂုတ်လ ၄ ရက် မနက် ၉ နာရီခွဲအချိန်က သီပေါမြို့နယ် ပေါက်၀ိန်းစန်းရပ်ကွက်ရှိ နေအိမ်တခုအတွင်း လင်မယား နှစ်ဦး ဓါးဒဏ်ရာများဖြင့်လဲကျနေပြီး အမျိုးသမီး ဖြစ်သူမှာ သေဆုံးလျှက်ရှိကြောင်း သီပေါမြို့ရှိ နယ်စည်းမခြား ပရဟိတ ကိုမျိုး က သျှမ်းသံတော်ဆင့် ကိုပြောသည်။
“လင်မယား စကားများရန်ဖြစ်တာလားတော့ မသိဘူး။ အမျိုးသမီးကတော့ သေဆုံးသွားပြီ။ အမျိုးသားကတော့ အရေးပေါ် ကုသနေပါတယ်။” ကိုမျိုး ကပြောသည်။
သေဆုံးသူ အမျိုးသမီးသည် အသက် ၂၄ နှစ်အရွယ်ရှိပြီး ဘယ်ဖက်ရင်ညွှန့်နားတွင် ထိုးသွင်း ဒဏ်ရာ ၂ ချက်တွေ့ရကြောင်း ကိုမျိုးက ပြောသည်။
အဆိုပါ လင်မယား ၂ ဦး ဓားဒဏ်ရာ ရရှိသည့် ကိစ္စနှင့်ပတ်သက်ပြီး အသေးစိတ်မသိရှိရသေး သော်လည်း သီပေါဒေသခံများ ပြောပြချက်အရ လင်မယား ၂ ဦးမှာ စကားများရာမှ ဓားထိုးသည့် အဆင့်ဖြစ်သွားခြင်းဖြစ်ကြောင်း ဆိုသည်။
အဆိုပါအမှုအား လက်ရှိ သီပေါမြို့မ ရဲစခန်းတွင်အမှုဖွင့်ထားကြောင်း၊ ဓါးထိုးမှုအထိ ဖြစ်ပွါးရခြင်းနှင့်ပတ်သက်ပြီး အမျိုးသားထံမှ စစ်ဆေးမှုရယူနိုင်ရန် ကြိုးစားနေဆဲ ဖြစ်ကြောင်းသာ သိရသည်။
