သျှမ်းပြည် အရှေ့ပိုင်း တာချီလိတ်မြို့ အတွင်း ငွေကျပ်သိန်းပေါင်း ၃၀၀၀ နီးပါး တန်ဖိုးရှိ မူးယစ်ဆေး၀ါးများကို ဖမ်းဆီးရမိကြောင်းစုံစမ်းသိရသည်။
ဇူလိုင် ၂၀ ရက် ည ၁၀ နာရီခွဲခန့် က သျှမ်းပြည် အရှေ့ပိုင်း တာချီလိတ်မြို့ ဆန်ဆိုင်း (ခ)ရပ်ကွက် ဝမ်မိုင်ရွာ အတွင်း ယာဉ်မောင်း ကျာဘ(ခ)ယာပါ မောင်းနှင်လာပြီး စိုင်းပွတ်(ခ) အိုက်ခက် နှင့် အိုက်ရီ တို့ လိုက်ပါလာသည့် ကားကို တာ၀န်ရှိသူများ တားဆီးစစ်ဆေးရာ ကျပ်သိန်းပေါင်း ၂၉၁၀ တန်ဖိုးရှိ စိတ်ကြွဆေးပြားကို သိမ်းဆည်းရမိကြောင်း မူးယစ်ရဲတပ်ဖွဲ့ ထုတ်ပြန်ချက် အရသိရသည်။
အဆိုပါ ဖမ်းဆီးရမိသူများကို စစ်ဆေးမေးမြန်းရာ စိတ်ကြွဆေးပြား ပိုင်ရှင်သည် တာချီလိတ်မြို့ ရန်အောင်မြေ ရပ်ကွက်နေ ဆိုင်ပေါင်း ဆိုသူဖြစ်ပြီး၊ ထို ပိုင်ရှင်ကိုလည်း ဇူလိုင် ၂၀ ည ၁၁ နာရီ တွင် ဖမ်းဆီးရမိခဲ့ကြောင်း သိရသည်။
ထိုသူများကို တာချီလိတ်မြို့မရဲစခန်း တွင် မူးယစ်ဆေးဝါး နှင့် စိတ်ကို ပြောင်းလဲစေသော ဆေးဝါးများ ဆိုင်ရာ ဥပဒေ ဖြင့် အမှုဖွင့်အရေးယူပြီး ကွင်းဆက်များကို ဆက်လက်ဖော်ထုတ်နေကြောင်း သိရသည်။
