သျှမ်းပြည် မြောက်ပိုင်း ကျောက်မဲမြို့နယ် အတွင်း တိုက်ပွဲများ ထပ်မံဖြစ်ပွားမည်ကို ဒေသခံများ စိုးရိမ်သဖြင့် ကျေးရွာ ဘုန်းကြီးကျောင်းများတွင် စစ်ဘေးရှောင်နေကြောင်း စုံစမ်းသိရသည်။

ထိုနယ်မြေများတွင် အစိုးရ တပ်မတော် နှင့် သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော်(RCSS/SSA)တို့သည် ဇွန် ၂၅ရက်မှ ယနေ့ထိတိုင်း ထိတွေ့မှု မကြာခဏ ဖြစ်ပွားကာ၊ အစိုးရ တပ်မတော်က စစ်အင်အားများ ဖြည့်တင်းနေမှုကြောင့် ဒေသခံများ တိုက်ပွဲထပ်မံဖြစ်ပွားလာမည်ကို စိုးရိမ်နေသည် ဟု ကျောက်မဲမြို့နယ် ဒေသခံ နန်းလှရီ က ပြောသည်။

“ တပ်က နေ့တိုင်း စစ်အင်အားတွေဖြည့်နေတော့ ဘယ်ချိန်တိုက်ပွဲဖြစ်မလဲမသိတော့ ရွာဘုန်းကြီးကျောင်းမှာ သွားစုပြီးနေနေရတယ်။ အားလုံးကတော့ ကြောက်နေတယ်” ဟု နန်းလှရီ က ဆိုသည်။

ဘုန်းကြီးကျောင်းသို့ သွားရောက်စုပြီးနေထိုင်နေရသည့် ရွာများမှာ ကျောက်မဲမြို့နယ် ကုန်းညောင်ကျေးရွာ၊ နမ့်မော်ဘီလူးကျေးရွာ။ နမ့်ဟန်ခိန်ရွာ၊ ရေဆန် ကျေးရွာ၊ ဟိုဖိုင်၊ ဟိုင်းကွီ၊ နမ့်ဝါ့ နှင့်ပန်ကျင်ကျေးရွာတို့ဖြစ်ကြကြောင်း နန်းလှရီ က ပြောပြသည်။

“ စားချိန်တန်ရင်တော့ ကိုယ့်အိမ်ကိုယ့်ပြန်ချက် စား၊ နောက် ဘုန်းကြီးကျောင်းမှာပြန်လာနေ။ အိမ်ပြန်ထမင်းချက်စားရင်တောင် တိုက်ပွဲ ဖြစ်မှာ ကြောက်နေရတယ်” ဟု နန်းလှရီ က ပြောသည်။

အစိုးရတပ်မတော် သည် ကျောက်မဲမြို့နယ် အတွင်း နယ်မြေရှင်းလင်းရေး အကြောင်းပြချက်ဖြင့် စစ်အင်အား တိုးချဲ့နေကြောင်း လည်းကျောက်မဲ ဒေသခံများ ပြောပြချက် အရသိရသည်။

ထို့ပြင် ယမန်နေ့ (ဇူလိုင် ၁၅)ရက်မနက်ပိုင်းတွင် အစိုးရတပ်မတော် မှ သေနတ်ပစ်ခတ်ပြီးသေဆုံးသွားသည့် လုံးဆု နှင့် သေနတ်ကျည်ဆံထိမှန်၊ ရိုက်နှက်ခံရ ရွာသားများကို စုံစမ်းစစ်ဆေးရန် အစိုးရတပ်မတော်မှ ကျောက်မဲမြို့ ဟိုင်းကွီကျေးရွာ အုပ်စု ပန်ကျန်ရွာ ကို သွားရောက်ခဲ့သည်။

ထိုသို့ သွားရာတွင် အရှေ့မြောက်ပိုင်း စစ်ဌာနချုပ် လက်အောက်ခံ တပ်မမှူး အဆင့်ရှိ အရာရှိ များနှင့် မြို့နယ် အုပ်ချုပ်ရေးမှူးများ လိုက်ပါပြီး လုံခြုံရေး စစ်အင်အားနှင့်အတူ လက်နက်များလည်း ပါသွားကြောင်းသိရသည်။

လုံခြုံရေး အရ ၊နယ်မြေရှင်းလင်းရေးအရ ဟု အစိုးရတပ်မတော် မှ စစ်အင်အားဖြင့် သွားကြသည့်အပြင် သေနတ်ပစ်ခတ်ခဲ့သည့်အပေါ် ဒေသခံများ က စိုးရိမ်ထိတ်လန့်ကာ ထွက်ပြေး တိမ်းရှောင်နေရခြင်းဖြစ်သည်။

“ ကျနော်တို့ ရွာသားတွေက စစ်တပ်လာတော့ ကြောက်ကြတယ်။ ဒါကြောင့် ဘုန်းကြီးကျောင်းတွေမှာ လူစုနေကြ၊ ညအိပ်ကြပေါ့။ တိုက်ပွဲဖြစ်မှာကို စိုးရိမ်တယ်” ဟု ကျောက်မဲမြို့နယ် ဒေသခံ တဦးဖြစ်သည့် စိုင်းဝင်း က ပြောသည်။

ဘုန်းကြီးကျောင်းတွင် သွားရောက်ခိုလှုံနေကြသော်လည်း ထမင်းကို နေအိမ်တွင်ပြန်ချက်ပြီး စားသောက်ကာ ဘုန်းကြီးကျောင်းသို့ ပြန်ရကြောင်း၊ လယ်ယာ စိုက်ပျိုးမှု မလုပ်ရကြောင်း လည်း စိုင်းဝင်း က ဆိုသည်။
“
ဇူလိုင်လ ၁၀ ရက် က ကျောက်မဲမြို့နယ် အတွင်းရှိ သျှမ်းလူထု ၁သောင်းကျော်သည် “ ပြည်သူကို သတ်သည့် တပ်မတော် အလိုမရှိ” ဟု ဆိုင်းဘုတ်ကို ကိုင်ဆောင်က ကျောက်မဲမြို့အတွင်း ဆန္ဒထုတ်ဖော်ခဲ့သည်။

ထို့နောက် အစိုးရတပ်မှ စုံစမ်းစစ်ဆေးရေးများပြုလုပ်ကာ စစ်အင်အားထပ်ဖြည့်လာခြင်းဖြစ်သည်ဟုလည်း ဒေသခံများ သုံးသပ်ချက် အရ သိရသည်။

“ ကျနော်တို့ ရွာသားတွေ ဆန္ဒထုတ်ဖော်ပြီးနောက်မှ အစိုးရတပ်ဘက်က အင်အားချဲ့လာတယ်။ နောက် တဖက်သက် ပစ်ခတ်တာတွေလုပ်တယ်။ ကျနော်တို့ အခု တိုက်ပွဲတွေ ထပ်ဖြစ်မှာစိုးရိမ်နေတယ်” ဟု စိုင်းဝင်း က ပြောသည်။

ယခု အစိုးရတပ်မတော် စစ်အင်အား တိုးချဲ့သည့်နေရာ ကျေးရွာပြည်သူများ ထွက်ပြေးတိမ်းရှောင်နေရသည့်နေရာသည် အပစ်ခတ်ရပ်စဲရေး သဘောတူညီစာချုပ် ( NCA) လက်မှတ် ရေးထိုးထားသည့် အဖွဲ့ ဖြစ်သည့် RCSS/SSA လှုပ်ရှားသည့်နေရာဖြစ်သည်။

“ အစိုးရတပ်တွေ အင်အားချဲ့နေသရွေ့တော့ ထိတွေ့မှုတွေဖြစ်နိုင်တယ်။ နောက် သူတို့(အစိုးရတပ်) ကပဲ တဖတ်သတ်ပစ်နေတာ။ NCA ကိုလည်း သူတို့ချိုးဖောက်နေတာ” ဟု RCSS/SSA ပြောရေးဆိုခွင့်ရှိသူ ဒုဗိုလ်မှူးကြီး စဝ်အုမ်ခေး က သျှမ်းသံတော်ဆင့်ကို ပြောသည်။

အစိုးရ တပ်မတော် သည် စစ်အင်အား ဖြည့်တင်းမှုကြောင့် ထိတွေ့မှုများ တိုက်ပွဲများဖြစ်လာနိုင်ကြောင်းလည်း ဒုဗိုလ်မှူးကြီး စဝ်အုမ်ခေး က ပြောလိုက်သည်။

ယခုအချိန်သည် သျှမ်းပြည်သားမျာအတွက် လယ်ယာ စိုက်ပျိုးသည့် အချိန်ကာလဖြစ်သဖြင့် တိုက်ပွဲများထိတွေ့မှုများမဖြစ်ရန်လည်း ကျောက်မဲပြည်သူများက ပြောဆိုလိုက်သည်။