သျှမ်းပြည် အရှေ့ပိုင်း တာချီလိတ်မြို့တွင် ကိုဗစ်-၁၉ လူနာ သည် ဆေးရုံဆင်းပြီးနောက် ပိုးပြန်တွေ့ရှိကြောင်း စုံစမ်းသိရသည်။
တာချီလိတ် ကိုဗစ်-၁၉ အတည်ပြု လူနာ အမှတ် (၉၆) သည် ဆေးရုံဆင်းပြီး ရက်(၄၀) အကြာ ဇွန် (၃၀)တွင် ကိုဗစ်-၁၉ ပိုးပြန်လည်တွေ့ရှိခဲ့ကြောင်း သိရသည်။
“ပိုးမတွေ့ပဲ ဆေးရုံဆင်းပြီးတော့ ပိုးပြန်တွေ့တာက သူများ နိုင်ငံတွေမှာလည်း ရှိတာပေါ့နော်။ဒါပေမယ့် ကျနော်တို့ နိုင်ငံက ပထမဆုံး ဒီတစ်ယောက် ပြန်ဖြစ်တာပါ” ဟု ပြည်နယ် အထူးရောဂါ နိမ်နင်းရေး လက်ထောက်ညွှန်ကြားရေးမှူး ဒေါက်တာဇဝနကို က သျှမ်းသံတော်ဆင့် ကို အတည်ပြုပြောလိုက်သည်။
မြန်မာနိုင်ငံတွင် ကိုဗစ် အတည်ပြု လူနာ အားလုံးသည် ဓါတ်ခွဲနမူနာ စစ်ဆေးရာမှာ ၂ ကြိမ်ဆက်တိုက် Negative ဖြစ်လျှင် ဆေးရုံမှ ဆင်းခွင့် ပြုထားကြောင်းသိရသည်။
ကိုဗစ်-၁၉ လူနာများသည် ဆေးရုံတွင် ကျန်းမာရေး စစ်ဆေးပြီး Negative ၂ကြိမ်ဆက်တိုက်ဖြစ်ပါက ဆေးရုံဆင်းခွင့်ရသော်လည်း Facility Quarantine (၇) ရက် ဆက်ထားပြီး၊ Home Quarantine ကို (၇)ရက်ထက် ထားကြောင်း ဒေါက်တာဇဝနကို က ပြောပြသည်။
ထို ဆေးရုံဆင်းပြီးသွားသည့် ကိုဗစ်-၁၉ လူနာများနှင့် ပတ်သက်ပြီး ဒေါက်တာ ဇဝနကို က “ ပြန်စစ်ဖို့လည်း ကျန်းမာရေး ဝန်ကြီးဌာနကလည်း မထုတ်ထားဘူး။အဲ့လိုမျိုး ပြန်စစ်ဖို့ လောလောဆယ်တော့ မရှိသေးဘူး” ဟု ထပ်လောင်းပြောပြသည်။
ထိုလူနာ အမှတ် (၉၆) သည် သျှမ်းပြည်အရှေ့ပိုင်း တာချီလိတ်မြို့ရှိ တာချီလိတ်ပြည်သူ့ဆေးရုံမှာ ဆေးကုသမှု ခံယူနေပြီး ရက်ပေါင်း (၄၀) အကြာတွင် ပိုးပြန်တွေ့သော်လည်း ကျန်းမာရေး အခြေနေကောင်းမွန်လျက်ရှိကြောင်း စုံစမ်းသိရှိရသည်။
လူနာ အမှတ် (၉၆) သည် ဆေးရုံဆင်းပြီး အနီးကပ်ထိတွေ့သူများကို အသွားအလာကန့်သတ်ထားခြင်း ဖြစ်ကြောင်း သိရသည်။
သျှမ်းပြည်နယ်တွင် ကိုဗစ် – ၁၉ အတည်ပြု လူနာ ၁၀ ဦး ရှိပြီး ၎င်းတို့အားလုံးသည် ဆေးရုံမှ ဆင်းခွင့်ရပြီး ဖြစ်သော်လည်း လူနာ အမှတ် (၉ ၆) သည် ဒုတိယအကြိမ် ကိုဗစ် – ၁၉ ပိုး ပြန်လည်တွေ့ရှိကြောင်း စုံစမ်းသိရှိရသည်။
မြန်မာနိုင်ငံတွင် ကိုဗစ် -၁၉ အတည်ပြုလူနာ (၃၀၄) ဦး ၊ ပြန်လည် သက်သာလာသူ (၂၂၂) နှင့် သေဆုံးလူနာ (၆) ဦးရှိကြောင်း ကျန်းမာရေးဝန်ကြီးဌာန က ထုတ်ပြန်ထားသည်။
Leave a Comments