ထိုင်း – မြန်မာ နယ်စပ် တာချီလိတ်မြို့ရှိ ချစ်ကြည်ရေး တံတား အမှတ် (၂) မှာ မြန်မာရွှေ့ပြောင်း အလုပ်သမား ၁၈၀ ကျော် လက်ခံခဲ့ကြောင်း သိရသည်။
ယမန်နေ့ ( ဇွန် ၂၃) ရက် တွင် တာချီလိတ် ချစ်ကြည်ရေး တံတား အမှတ် (၂) ၌ ထိုင်းနိုင်ငံတွင် ပြစ်ဒဏ်စေ့ (၂၃) ဦး နှင့် မြန်မာရွေ့ပြောင်း အလုပ်သမား ( ၁၆၄) ဦး စုစုပေါင်း ၁၈၇ ဦး လက်ခံ ခဲ့ကြောင်း တာချီလိတ်မြို့နယ် အုပ်ချုပ်ရေးမှူး ဦးချမ်းမြေ့စော က သျှမ်းသံတော်ဆင့် ကိုပြောသည်။
“တာချီလိတ် ဒေသခံ တွေကိုပဲ Quarantine Center မှာ လက်ခံထားပါတယ်။ဒေသခံ မဟုတ်တဲ့သူတွေကိုတော့ သက်ဆိုင်ရာ မြို့နယ်တွေမှာပဲ Quarantine ပြန်ဝင်ရပါမယ်” ဟု ဦးချမ်းမြေ့စော က သျှမ်းသံတော်ဆင့် ကိုပြောသည်။
တာချီလိတ်မြို့နယ်ရှိ Quarantine Center တွင် မြန်မာရွှေ့ပြောင်း အလုပ်သမား ၃၁ ဦး ကျန်ရှိသေး ကြောင်း သိရသည်။
“ပြန်လာတဲ့ထဲက တာချီလိတ် ဒေသခံ ၃၁ ဦး ပါဝင်ပါတယ်။ Quarantine Center မှာသူတို့တွေပဲ ကျန်တော့မယ်။ ၇ ရက် ထားပြီး ဓါတ်ခွဲနမူနာ စစ်ဆေးသွားပါမယ်” ဟု တာချီလိတ် မြို့နယ် အုပ်ချုပ်ရေးမှူး ဦးချမ်းမြေ့စော က သျှမ်းသံတော်ဆင့် ကိုပြောသည်။
ဇွန် လ အတွင်း ထိုင်း – မြန်မာ နယ်စပ်ဖြစ်သည့် တာချီလိတ် တံတာအမှတ်(၂) မှာ မြန်မာရွှေ့ပြောင်း အလုပ်သမား အပါအဝင် ပြစ်ဒဏ်စေ့ များ ပြန်လည် ဝင်ရောက်လာသူ (၄၀၀) ကျော် ရှိကြောင်း သိရသည်။
Leave a Comments