သျှမ်းပြည်တောင်ပိုင်း တွင် ကိုဗစ်-၁၉ ဓါတ်ခွဲနမူနာ စစ်ဆေးရန်အတွက် အသွားအလာ ကန့်သတ်ထားသူ (၄၇၀) ခန့်ကို ရန်ကုန်အမျိုးသား ကျန်းမာရေး ဓါတ်ခွဲဌာန (NHL) သို့ ပို့ဆောင် စစ်ဆေးသွားမည် ဖြစ်ကြောင်း သိရသည်။
ယနေ့ ဇွန် (၁၈) ရက် ည ပိုင်း NHL သို့ ပို့ဆောင် စစ်ဆေးသွားမည် ဖြစ်ပြီး (၄၇၀) ဦးသည် အသွားအလာ ကန့်သတ်ထားသည့် သူများ ဖြစ်ကြောင်း သျှမ်းပြည် အထူး ရောဂါ နှိမ်နင်းရေး လက်ထောက်ညွှန်ကြားရေးမှူး ဒေါက်တာနှင်းအိဖြူ က သျှမ်းသံတော်ဆင့် ကိုပြောသည်။
“၄၇၀ ဦးက အသွားအလာကန့်သတ်ထားတဲ့ သူတွေ ဖြစ်တယ်။ ကလောမှာက စောင့်ကြည့်လူနာ တစ်ယောက် ပါတယ်။ ဒီနေ့ည NHL သို့ ပို့ဆောင် စစ်ဆေးသွားပါမယ်” ဟု ဒေါက်တာနှင်းအိဖြူ က သျှမ်းသံတော်ဆင့် ကိုပြောသည်။
အသွားအလာကန့်သတ်ထားသူ အားလုံးသည် သျှမ်းပြည်တောင်ပိုင်းရှိ တောင်ကြီး၊ ညောင်ရွှေ၊ ရပ်စောက်၊ ကလော၊ ဟိုပုံး၊ ဆီဆိုင် ၊ ပင်လောင်း ၊ ဖယ်ခုံ ၊ လွိုင်လင် ၊ ကျေးသီး၊ မိုင်းရှုး၊ လင်းခေး၊ မိုင်းပန် ၊ မောက်မယ်၊ မိုးနဲ နှင့် နမ့်စန် တို့ ဖြစ်သည်။
“စုစုပေါင်း ဒီညနေ့ ပို့ဆောင် စစ်ဆေးသွားမှာကတော့ (၄၇၃) ဦး ရှိပါတယ်။ အတည်ပြု လူနာ ၂ ဦးရဲ့ ဓါတ်ခွဲနာမူနာ အပါအဝင်ပါ။” ဟု ဒေါက်တာနှင်းအိဖြူ က သျှမ်းသံတော်ဆင့် ကိုပြောသည်။
သျှမ်းပြည်တောင်ပိုင်းမှာ ဇွန် (၁၈) ရက်ထိ တို့ဖတ်နမူနာ ပေးပို့ထားပြီး ဓါတ်ခွဲအဖြေစောင့်ဆိုင်းသူ (၈၀၀) ကျော် ကျန်ရှိနေသေးကြောင်း စုံစမ်းသိရှိရသည်။
Leave a Comments