သျှမ်းပြည် မြောက်ပိုင်းသီပေါမြို့နယ် ကျေးလက်တခုတွင် အသက် ၁၃နှစ် အရွယ် မိန်းကလေးငယ်ကို ဖခင်အရင်း နှင့် အသက် ၂၀ကျော် အမျိုးသားတဦးတို့က မုဒိမ်းပြုကျင့်ခဲ့ကြောင်း စုံစမ်းသိရသည်။
ဖြစ်စဉ်မှာ သီပေါမြို့နယ်ရွာသစ်ကျေးရွာအုပ်စုနေ အသက် ၁၃ နှစ် အရွယ် မိန်းကလေးငယ်သည် အကျင့်စာရိတ္တပျက်ပြားသည် ဟုဆိုပြီး ၎င်းမိသားစုနှင့်နီးစပ်သည့် သီပေါမြို့ အမျိုးသမီးအရေး တက်ကြွဆောင်ရွက်သူ အမျိုးသမီးတဦး က မေ ၂၄ ရက်က သူမ အားကျေးရွာသို့သွားရောက် ခေါ်ဆောင်ကာ လူမှုဝန်ထမ်းဦးစီးဌာန ပို့ဆောင်ရန် ပြုလုပ်ခဲ့သည်။
ထိုသို့ဆောင်ရွက်နေစဉ် မိန်းခလေးအား စစ်ဆေးမေးမြန်းရာ ၎င်းသည် မူးယစ်ဆေးသုံးစွဲသည့် ဖခင် နှင့် အကိုဖြစ်သူအား ရှာဖွေကျွေး မွေးနေရကြောင်း ပြောသည် ဟု အဆိုပါ အမျိုးသမီးက ပြောသည်။
“ အစကတော့ သူ့ကို လူမှုဝန်ထမ်း ကျောင်းပို့ဖို့ ခေါ်လာတာ။နောက်ပိုင်း မေးမြန်းတော့ သမီးလေးက သူ မုဒိမ်းကျင့်ခံရတာတွေကို ပြောပြလာတယ်။အစကမယုံဘူး။ နောက် ဆေးသွားစစ်တော့ ဆေးစစ်ချက်ကလည်း မုဒိမ်းကျင့်ခံရတဲ့ လက္ခဏာရှိတယ်။အဲ့ဒါနဲ့တိုင်ချက်ဖွင့်လိုက်ကြတာ” ဟု မိန်းကလေးအား ကူညီပေးနေသည့် ၎င်း အမျိုးသမီး က ပြောပြသည်။
အသက် ၁၃နှစ် အရွယ် အဆိုပါမိန်းကလေးငယ်ကို မေ ၂၄ ရက်က သီပေါမြို့ပြည်သူ့ဆေးရုံမှ ဆေးစစ်ပေးရာတွင်လည်း သက်ငယ်မုဒိမ်းပြုကျင့်ခံထားရသည့် လက္ခဏာရှိကြောင်း ဆေးရုံက အတည်ပြုခဲ့သည်။
မေ ၁၇ ရက်ကမှ ဖခင်ဖြစ်သူသည် သူမကို မုဒိမ်းတကြိမ်ကျင့်ခဲ့ပြီး၊ မေ ၂၀ ရက်တွင် အကို ဖြစ်သူ၏ သူငယ်ချင်း အသက် ၂၀အရွယ် မင်းခန့် ဆိုသူကလည်း တကြိမ်အဓမ္မပြုကျင့်ခဲ့ကြောင်း သီပေါမြို့မ ရဲစခန်း တိုင်ကြားစာတွင် ရေးသားထားသည်။
သမီးအရင်းဖြစ်သူအား သက်ငယ်မုဒိမ်းကျင့်သည့် ဖခင် နှင့် အသက် ၂၀ကျော်ရှိ အမျိုးသားကို သီပေါမြို့မ ရဲစခန်းမှ ဖမ်းဆီးထားပြီး ၊ ထိုသူ ၂ဦးကို (ပ) ၄၃။၂၀၂၀ ရာဇသတ်ကြီး ပုဒ်မ ၃၇၆ ဖြင့် အမှုဖွင့် အရေးယူထားကြောင်း သိရသည်။