လောက်ကိုင်တွင် အဆောက်အဦးပြိုကျ နယ်ခြားစောင့် ဒုဗိုလ်မှူးကြီးသေ၊ လူ၇ဦးဒဏ်ရာရ

ကိုးကန့်ကိုယ်ပိုင် အုပ်ချုပ်ခွင့်ရဒေသ လောက်ကိုင်မြို့နယ်တွင် အဆောက်အဦး တခုပြိုကျကာ နယ်ခြားစောင့်တပ် ဒုဗိုလ်မှူးကြီး တဦးသေဆုံး ၇ဦး ဒဏ်ရာရရှိကြောင်း သတင်းရရှိသည်။

ပြိုကျသည့်ဆောက်လက်စ အဆောက်အဦး

အဆိုပါ ပြိုကျသည့် အဆောက်အဦးသည် တရုတ်ကုမ္ပဏီ တခုမှ တာဝန်ယူ တည်ဆောက်ထားသည့် ဆောက်လက်စ ၂ထပ် အဆောက်အဦးဖြစ်ပြီး မေ ၂၁ရက် မနက် ၈နာရီတွင် ပြိုကျခဲ့ကြောင်း လောက်ကိုင်ခရိုင် ကြက်ခြေနီ တပ်ဖွဲ့မှူး တဦးက သျှမ်းသံတော်ဆင့် ကို ပြောသည်။

“သေဆုံးသွားတဲ့ အိမ်ရှင်က နယ်ခြားစောင့်တပ်က တပ်ရင်းမှူး ဖြစ်တယ်။ ဒဏ်ရာ ရတဲ့သူ ၇ ယောက်ထဲက ၁ ယောက်က စိုးရိမ်ရတယ်” ဟု ကြက်ခြေနီ တပ်ဖွဲ့မှူး က ပြောသည်။

ပြိုကျသည့်ဆောက်လက်စ အဆောက်အဦး

အဆောက်အဦးပြိုကျပြီး သေဆုံးသွားသည့် ကိုးကန့်ကိုယ်ပိုင်အုပ်ချုပ်ခွင့်ရဒေသ နယ်ခြားစောင့်တပ် မှ ဒုတိယ ဗိုလ်မှူးကြီးသည် နိုင်ငံတော်မှ ပေးထားသည့် ဂုဏ်ထူးဆောင် ဘွဲ့ ရထားသူတဦးဖြစ်ကြောင်း လည်း သိရသည်။

အဆိုပါ အဆောက်အဦး အပြိုကျမီ မိနစ်ပိုင်း နှင့် ပြိုကျသည့် အနေအထားကို CCTV (စီစီတီဗွီ) မှတ်တမ်းကို ဒေသခံများ လူမှု ကွန်ရက်တွင် တင်ထားသည်ကို တွေ့မြင်ရသည်။

အိမ်ရှင် အပါအဝင် လူ ၈ဦး သည် အဆောက်အဦး ၏ ဆောက်လက်စ ၂ထပ် တနေရာတွင် ရှိနေချိန် ပြိုကျခြင်းဖြစ်ကြောင်း သိရသည်။

ထိုပြိုကျသည့် အဆောက်အဦးနှင့်ပတ်သက်ပြီး သက်ဆိုင်ရာက စုံစမ်းစစ်ဆေးမှု ပြုလုပ်ကာ တာဝန်ယူ တည်ဆောက်သည့် ကုမ္ပဏီကို လည်း အရေးယူဆောင်ရွက်သွားရန် ပြုလုပ်နေသည် ဟု သိရသည်။


eastern_breeze
SHARE