သျှမ်းပြည် တောင်ပိုင်း ရပ်စောက်မြို့နယ် ဗထူးတပ်နယ်မှ ဧက ၁သောင်း ကို ယနေ့ တပ်မှ ပြန်လည် စွန့်လွှတ်ပေးခဲ့ကြောင်း သတင်းရရှိသည်။

လွန်ခဲ့သည့် ၁၉၆၂ ခုနစ် တွင် ရပ်စောက်မြို့နယ် ဗထူးတပ်နယ်ရှိ ကန်တော်မင်ဧရိယာအတွင်း ကာကွယ်ရေးဝန်ကြီးဌာနမှ မြေဧက ၄ သောင်းကျော် တပ်မြေအဖြစ်သိမ်းဆည်းခဲ့ပြီး၊ ထိုထဲမှ ဧက ၁ သောင်းကျော် ယနေ့( မေ ၂၀) တွင် တရားဝင် ပြန်လည် ပေးအပ်ခဲ့သည်။

ယနေ့ ပြန်လည် စွန့်လွှတ်သည့် မြေ ဧက ၁ သောင်းကျော် သည် လေ့ကျင့်ရေးကွင်းနှင့် ကင်းလွှတ်သည့် နေရာများဖြစ်ပြီး ကျန်သည့် ဧက ၃ သောင်းကျော် သည် မီတာ ၆ ရာ စစ်ပစ်ကွင်း အပါအဝင် သေနတ်ပစ်ပြိုင်ပွဲများ အဖြစ် အသုံးပြုကြောင်း ဗထူူးတပ်နယ် ဦးစီးအရာရှိ ပထမတန်း ဒုတိယ ဗိုလ်မှူးကြီး မင်းလတ် က ပြောသည်။

“ကျန်တဲ့ ဧက ၃ သောင်းကျော်က ကျနော်တို့ စစ်ရေး လေ့ကျင့်ကွင်းတွေ၊ သင်တန်းကျောင်းတွေ၊ လေ့ကျင့်ရေးစခန်းတွေ အများကြီးပဲ ကျည်စစ် ကျည်မှန် တွေနဲ့ ပစ်ခတ်တဲ့အတွက် အဲ့ကြောင့်မလို့ ကျနော်တို့က အဲ့လောက် ဧရိယာ ယူထားခြင်း ဖြစ်ပါတယ်” ဟု ဒုတိယ ဗိုလ်မှူးကြီး မင်းလတ် က ပြောသည်။

စွန့်လွှတ်မြေ ဧကပေါင်း ၁ သောင်းကျော် သည် စိုက်ပျိုးမြေ အပါအဝင် မြေလွှတ် မြေလတ် မြေရိုင်းများ သစ်တောမြေ များ စသည်တို့ ပါဝင်ကြောင်း သိရသည်။

“စသိမ်း တုန်းက ကျနော်တို့ သင်တန်းတွေ အများကြီးသုံးခဲ့တယ်။ စစ်တက္ကသိုလ်ဖွင့်တယ် အရာရှိ သင်တန်းတွေဖွင့်တယ်။အမြောက်တွေ သံချပ်ကာတွေ လုပ်တဲ့အတွက် အဲ့ဒီဧက ၃ သောင်းကျော်က အကြုံးဝင်တယ်။” ဟု ဗထူူးတပ်နယ် ဦးစီးအရာရှိ ပထမတန်း ဒုတိယ ဗိုလ်မှူးကြီး မင်းလတ် က ပြောသည်။

စိုက်ပျိုးမြေသည် တောင်သူပေါင်း ၁ ထောင်ကျော် ပိုင်ဆိုင်ထားသည့် မြေများဖြစ်ပြီး ၎င်းတို့သည် ပါမဲရွာ ၊ မားသဲရွာ ၊ ဖောင်းတောရွာ၊ မကျီးကန်းရွာ၊ လွယ်ကိုးရွာ ၊ ဟွေး ၊မြို့မကျေးရွာ အုပ်စုများပါဝင်သည်။

လက်ရှိတွင် သျှမ်းပြည် မြောက်ပိုင်း လားရှိုးမြို့နယ် နားမွန်းကျေးရွာ တောင်သူများနှင့် အရှေ့မြောက် တိုင်းစစ်ဌာနချုပ် တို့ မြေယာ အငြင်းပွားမှု ဖြစ်နေကြောင်းသိရသည်။
လွန်ခဲ့သည့် စစ်အစိုးရ လက်ထက်တွင် စစ်တပ်မှ ဒေသခံပြည်သူပိုင်မြေများစွာ သိမ်းဆည်းခဲ့ကာ ပြည်သူများ လယ်ယာ စိုက်ပျိုးရေး မလုပ်ကိုင်ရဘဲ စားဝတ်နေရေး ခက်ခဲ ကြကြောင်းသိရသည်။