သျှမ်းပြည်မြောက်ပိုင်း ကျောက်မဲမြို့နယ် ဟောင်ဟိုင်( ချောင်းချောက် ) ကျေးရွာ အုပ်စု ဖာလိန်ရွာ တွင် အမျိုးသမီး ၂ ဦး အသတ်ခံရကြောင်း စုံစမ်းသိရသည်။

မေလ ၁၈ ရက် ယမန်နေ့ မနက် ၈နာရီ အချိန်တွင် ကျောက်မဲမြို့နယ်အရှေ့ဘက်ရှိ ဟောင်ဟိုင်ကျေးရွာအုပ်စု ( ) ဖာလိန်ရွာ မှ ၃ ဖာလုံ ဝေးသည့် လက်ဖက်ခြံ တောင်ယာတဲထဲတွင် အမျိုးသမီး ၂ ဦး အသတ်ခံရကြောင်း သိရသည်။

အသတ်ခံရသည့် အမျိုးသမီး ၂ ဦးသည် အသက် (၆၀) အရွယ် ဒေါ်အေးယိင်း နှင့် အသက် (၅၈)နှစ် အရွယ် ဒေါ်အေးထွေးတို့ဖြစ်ကြောင်း၊ ၎င်းတို့သည် လက်ဖက်ခြံ ပိုင်ရှင်များဖြစ်ကာ တောင်ယာတဲထဲတွင် နေထိုင်ကာ လက်ဖက်လုပ်ငန်း လုပ်ကိုင်နေကြသူများဖြစ်သည်။

“ အမျိုးသမီး ၂ ဦး က အိမ်မှာ ဓားခုတ်ခံရတာမဟုတ်ဘူး။ လက်ဖက်ခြံ တောင်ယာထဲမှာ သတ်ခံရတာ။ အိမ်ထဲမှာ မဟုတ်ဘူး။ ပလောင်(ခ) တအာင်း အမျိုးသမီးတွေပါ” ဟု ကျောက်မဲမြို့ ဇီဝိတ လူမှု ကူညီရေး အသင်း မှ ဦးတင်မောင်သိန်း က သျှမ်းသံတော်ဆင့် ကို ပြောသည်။

ဒေါ်အေးယိင်းသည် ယာဘက် နားထင်ထိုးသွင်း ဒဏ်ရာ တချက်၊ ယာမျက်ခုံပေါက်ပြဲ ဒဏ်ရာ တချက်၊ ဦးခေါင်း နောက်စေ့ပေါက်ပြဲဒဏ်ရာ တချက်၊ ဦးခေါင်းထိပ်ပေါက်ပြဲ ဒဏ်ရာ နှစ်ချက်တို့ ဖြစ်ကြောင်း ကျောက်မဲမြို့ရဲမှတ်တမ်း အရ သိရသည်။

ထို့ပြင် ဒေါ်အေးထွေး တွင် ဝဲပါးပြင် ညိုမဲ ဒဏ်ရာ တချက်၊ ဝဲဖက် ဦးခေါင်း နောက်စေ့ပေါက်ပြဲ ဒဏ်ရာ နှစ်ချက် ရရှိပြီး သေဆုံးနေကြောင်း လည်း ရဲမှတ်တမ်းတွင် ဖော်ပြထားသည်။ သို့သော် သေမှုသေခင်းနှင့်ပတ်သက်ပြီး ဖြစ်စဉ်အတိအကျ မသိရသေးပေ။

ထို အမျိုးသမီး ၂ဦး သေဆုံးမှု နှင့် ပတ်သက်ပြီး ကျောက်မဲ ရဲစခန်း တွင် (ပ) ၅၂။ ၂၀၂၀ ပြစ်မှု ပုဒ်မ ၃၀၂ ဖြင့် အမှုဖွင့် စုံစမ်း အရေးယူထားကြောင်းလည်းသိရသည်။